40. ዬሱሲ ሶሡ

ዎታዴርንዲ ዬሱሲስ ዴክኒ ባ ይ ጾና ሶይሳ ኢራታሳ ፔሽኩ ጌሽን ይ ሶትኒ ኤቲ ሀንቄንድ። ይስን ይሲ ሶሥንሱⶥ ማስቃሊንድ ይ ጤብሴንዴ።

ዎታዳርንዲ ዬሱሲስ «ራስ ቅል» (ዴብ ቆር) ማስቲ ይስኩⶥ ኩሥን ኤቲ ሀንቂ አሥንሲ ይ ኩቻ፥ ይ ቶአይስ ማስቃልን ጦጌንድ። ኢሣይቅኒ ኡⶢስ ካንግ ይ ዴብም ይሡⶣም ዬሱሲ «ዎ ታ ባቦ! ኢሣይቅኒ ባ ይሣ ይስኩⶢስ ኤራርጌንዳጊስን ኢሥ ማሮ!» ማኪ ጾኩ። ጲላጦሲ «አይሁድ ትያት» ማኪ ይስኩⶥ ጻፒስ ጻፓሲ ሀይቅን ይ ዴብም ጦጋሱዌ።

ኡⶥ ጌሽን ዎታዳርንዲ ዬሱስ ሲማርን ኢጣ ቦኪ ቆድኔንድ። ኡⶢስ ኢሣይቅኒ ይሡⶢ «ታ ሲማሪስ ኢጣ ቦኪ ቆድኔንዴ» ማስቲ ኮናስናቂ ይስኩⶥ ኮኒ ኢባር ፔትንሱዌሽና ጊዝዎ።

ይሱሲ ናማስንድ አሣ ቦክንዳ አሥ ካሥ ዎጤንድ ዴንትካን ሶሡ። ማጥናሲ ዬሱስ ዴብም ሚጻትኒ ጋሁ፤ ማጥናሲ «ኔና ዬሪስ ሼራራኔ? ኒናጎጥን ኒ ቃይጹⶥ ኢት ቃይጻማን ሶሡዌ፤ ናሳ ሀⶢ ጪር ኢት ቃይጻርጉዌ።» ማኩ። ኡⶥ ጌሽን ዬሱስ ዳድን ካርቲ «ኔና ይስን ትያታ ይስኩⶥካን ታምም ታሦ!» ማኪ ቆሉ። ዬሱሲንድ፣ «ኢባር ታ ሀይጣ ይስኩዌ፣ዎይንቴን ታኔና ጋናትካን ኔ እያርድንሱዌ!» ማኩ።

አይሁዳጋ ኡካርንዳ፥ አሥንዳ ማጥማጥንዳይ ዬሱስ ዴብም ሚጻትኒ ጋራትኒ ጋሄንዴ። ኢሣይቅኒንድ፣ «ዎስ ዬር ናንሥ ኔ ፔታን ማስቃልን ይስታ ዎርትና ኔ ቄር ፕያሦዎ!ኡⶣም ኑኒንድ ኒያም ጊባትንሱዌ!» ማኬንዴ።

ኡⶣም ጎቅን ዶዲ ሳፕም ሳት ፓዥ ዴንት ይስቱ፤ ሳፕም ሳትን ጋድንሲ ዶድ ጡሚ ኡርዲ ⶢፕ ጥጱ። እርስትን ሳት ሀክ ኡርዳንቂ ይስቱዌ።

ኡⶣጋ ጌሽን ዬሱሲ «ኤስን ባ ካንጊ ይሢ ውራንቁዌ! ዎ ታ ባቦ! ታ ካሢስ ኒም ኤጋ አሣ ኡሣ ታይስኩዌ!» ማኪ ኤዛም ኬኡ። ኡⶣም ባ ዴቢስ ቶር ካርሲ ይርⶥ ማሳንቂ ባ ካሥ ኡሡዌ። ይሲ ግያርን ሀይባጉⶥን ዶዲ ጉርጡ። ዬርን ጎይን ኬትካን ይስቱⶥ ማንጻላቲ ባ ዴንት ጾጽን ታካሽ ባ ማሂ ሀርጭኑዌ።

ዬሱሲ ባ ሀይቁⶣም አሢ ዬር ዳድን ውንሱⶥ ቦዲስ ፒርቁዌ። ዬሱሲስ ባቂ ይስቱⶥ ዎታዴርንዳጋ ኡካሪ ይሡⶣ ፔቱⶣ ቃይጺስ ካንግ ቤቅንሲ፣ «ናሳ ሀⶢ ኢባሪ ዬር ናንሣ ሶይናሳ ጊዝዎ!» ማኩዌ።

ካሲ ዬሱሲ ማስህ ፔቱⶢስ ጊባትኒ ይስቴንድ አይሁድ ኡካርንዳ ዮሴፓ፥ ኒቆዶሞሳ ማስቲ ይስኬንዲ ዬሱስ አⶪስ ጲላጦስ ዳድን ሀንቂ ቆሌንድ። ኢሣይቅኒንድ ኤቲ ሀንቂ ሲማራም ካቢ ንያል ቦምባርቃን ይሻስኑⶥ ዎጥ ባምቃን ይሥንሲ ንያላ ኤዝ ጋርሲ ኤቲ ዬኢ ባማጋ ሜጊስ ይያም ይንጼንዴ።