3. ዎጢ ውርሲ ባይሳጉ ሶእ

ጳዳጋ ቤርግንድ ጌሽን ⶦዳስ አሥንዲ ዬይስኪ ጌቢ ዶድ ቶሕን ይስቴንዴ። አሥንዳ ኤንዲ ሀካሜንዳ ኢትናስንዳ ፔቴንዴ። ኢት ቃይጺ ቤሺ ዬኡዌሽን ዬሮሥንዲ ዶድ ቶሕን ይስኩ ድያዲስ ይ ካንጊ ቆጢ ባይሳጉ ሶእ ኤቲ ዬኢ ባይስኒ ታሢ ዶንቱዌ።

ኖሂ ዬራጋ አፕም ናⶢስ ያኩዌ፤ ኖሂ ባ አባም ይስቴንድ አሥንድ ካንድ ዴንትካ ሶይናሳ ኢት ቃይጽቃን ሀካንቂ ይስኩ አሣጊ ይስቱዌ። ዬሮሥንዲ ሶአም ዶዲስ ባና ባይስና ታሡⶢስ ኖሄሽን ሀይጡ። ኖሂ ኤዛጋ ማርካቢስ ቃይጽንሱዌሽኒንድ ሀይጡዌ።

ዬሮሥንዲ ኖሄሽን ማርካቢስ ይሲ ምያሲ ቃይጽንሱዌሽን ሀይጡ። ይሲንድ «ማርካባ ኡⶣጋ ጳዲ 140 ሜትር፣ ይ አኪ 23 ሜትር፣ ይ ዝያጻስኒ 13 ሜትራ ⶦጳ ይስኩⶥ ፔትማኬ» ማኩዌ። ኖሂ ቃይጽንሱⶥ ማርካቢ እንቻም ቃይጽንሱⶣጊ ካዝ ፖቂ ይስን ይስኩⶥ ፔታንቂ ⶦዳጋ ኩሢ ይ ጎብቃን ይስኩⶣ ፑዳልንዲ ይስን ይስኩⶣን ይስቱዌ። ማርካባ ኡⶢኖሀ፥ ይ ንያእንዳ፥ ዶድ ዴብም ይስኬንድ ድያዳ ካንጌድ ዛርቃን አኪ ይቃን እያርሲ ይሲ ጊዝንዲስ ፕያሥንሱዌሽን ዬሪ ይስን ሀይጡዌ።

ኡⶣም ዬሪ ኡሡⶥ ቲዛዛም ዬሪ ይስን ሀይጡⶢዎጥን ኖሀ፥ ይ ንያእንዳ ካዛስንዳይ ማርካቡይስ ቃይጼንዴ። ማርካባ ኡⶢ ቃጽ ኤዝ ይሲ ፔቱዌሽን ⶦድ ቤርግ ቃይጼንዴ። ኖሂ ውንሱⶥ ቆጢ ባይስንሱⶥ ሶኤሽን አሢስ ኬንዛሲ ዬርጋ ዳድን ኢሣይቅኒ ካርትንሱዌሽኒንድ ሀይጢ ይስቱዌ። ይ ፔታስን አሥንዲ ጊባትናርጌንዴ።

ዬሮሥንዲ ኖሀ፥ ይ ኬት አሥንዳይ ባ ቄሬሽና ጊዝንዴሽና ቤድንሱⶥ ሙእስ ዱብዳስንሱዌሽን ቲዛዝ ኡሡ። ካንጉⶥ ቃይጺ ዬሺ ውሩ ጌሽን ዬሮሥንዲ ማርካቡቃን ኢሣይቅኒ እያርድንሱዌሽን ኖሀ ይ ማሽቴሽና፥ ይ ንያእንዴሽና፥ ኢሣይቅን ማይንዴሽና አቢ አትኒ ሺኩⶢስ ሀይጡ። ንያርትን አሥንዲ ማርካቡቃን እያርዴንዴ።

ዬሪ ቆጢ ባይሳጉ ሶአም ኢሣይቅኒ ባእንሳርጉዌሽን ጊዝንዳ፥ ጾጥንዳ ካንጌንድቃን ካፕምንዳም ፓሺእያና ማይና ናማስ ናማስ ይሥንሲ ኖህ ዳድን ቲሡዌ። ኡዳስንሴንድ ጊዝንድቃን ናፕም እያና፥ ናፕም ማይናይስ ቃዝቂ ኖህ ማርካብቃን ቲሡ። ካንጌዲ ዬኢ ማርካብቃን እያርዱ ጌሽን ዬሮሥንዲ ባ ባሪ ማርካቡ ሜጊስ ይንጹዌ።

ኡⶣጋ ጌሽን ዎሊ ቡኪ ጋዱዌ። ዎላ ኡⶢቡኩዌ!ቡኩዌ! ባ ዶማርጉ 40 ፓዣ፥ 40 ጡማ ቡኩዌ። ዶድቃኒንድ ይስቲ ሺቺ ቱቃልኒ ኬስኪ ይስቱዌ። ዶድ ቶሕን ይስኩ ቃይጺ ባ ካንግ ሶአም ቆስቱዌ። ዶድ ጉድንዳ ጳድ ጳድንዲ ቦርታርጉ ሶአም ቆስቱዌ።

ማርካቡቃን እያርዴንድ አሥንዳ፥ ጊዝንዳ ዬቻም ዶድ ቶሕን ይስኬንድ ድያድንዲ ባ ካንግ ሀይቄንዴ። ማርካባ ሀይቅን ሶእ ዴብም ቆስታርጉ ሀንቃ ባ ጎብቃን ይስኬንድ ካሣም ፕያጺ ይስኬንዲስ ካንግ ዎጥቃን ፕያሤኔ።

ዎላ ኡⶢ ቡካ ባ ይስኩⶢስ ⶣንቂ ይጡ ጌሽን ማርካባ ኡⶭ እያርፕ ሶእ ዴብም ዎብታ ይስቴኔ። ኡⶣጋ ጌሽን ሶኢ ኮብⶢ ኮብⶢ ሀንቁ። ማጥን ጎቅን ማርካብ ውሳ ጉዳጋ ዴብም ዎጌን። ይ ፔታስን ዶድ ቶሕን ሶኢ ጋብታንቂ ይስቱዌ። ካዝ እያርፕ ጌሽን ዶድ ጉድንዳጋ ባሲ ቤስቲ ጋዱዌ።

40 አቅ ጌሽን ኖሂ ዶድ ቶሕን ሶኢ ኮሉⶢስ ይሲ ቤቅንሲ ውዌ ማኪ ክሪስ ዎሲ ቲሡ። ክራ ኡⶢ ኤካ ሀካ ፑኪ ዎብቲ ዶዳ ኮሊስ ያፕምባኑ ሀካርጉ ሺዱዌ።

ኡⶥ ጌሽን ኖሂ ጉጊስካሲ ዎሲ ቲሡ። ውሲንድ ይስን ባና ዎግንሱⶥ ዶዲስ ባይስንሳ ካርታ ኖህ ዳድን ዬኤኔ። ማጥ ⶥምባት ቤስንሲ ኖሂ ጉጉይስ ካርሲ ቲሡዌ። ውሲንድ ዎይራ ማስቲ ይስኩⶥ እንች ሀዪይስ ባ ኖናም ጮጋ ኤታ ዬኤኔ። ሶኢ ዶድ ቶሕን ኮሊ ይስኩⶥ ፔቱዌሽን እንቻ ኮቻይ ጋዲ ጶቂ ይስቱዌ።

ኖሂ ካሲ ማጥ ⶣምባት ቤስንሲ ጉጉይስ ካርሲ ቲሡዌ። ውሲንድ ይስን ባ ዎግንሱⶥ ኩሥ ባ ያኩዌሽን ካርታ ውዋርጉⶥ ሺዴኔ። ሶእንድ ኮሊ ባኢ ይስቱዌ።

ናም እያርፕ ጌሽን ዬሮሥንዲ ኖሂስ «ኔና ኒ ኬት አሥንዳ፥ ጊዝንዳያ ይንታይቅን ካንግ ማርካቡቃን ይስቲ ኬስንዴ» ማኪ ሀይጡ። ኢሣይቅኒንድ ባ ካንግ ኬስኬንዴ። ኡⶣም ዬሪ «ⶦድ ንያእንድ ዬሊ ዬይስኪ ጌቢ ዶዱዋም ⶾንዴ» ማኪ ኢሣይቅን ዲሩዌ።

ኖሂ ማርካቡቃን ይስታ ባ ኬስጉ ጌሽን ኡድ ኩሥ ቃይጺ ጊዝንዳጋ ማጥማጥቃን ኡዳስኒ ዬርን ኤስትኒ ሀክንሴንዲስ ኡድ አሢ ሺርⶡዌ። ዬሮሥንዲ ኡዳ ኡⶣም ካዥቂ ኖሀ ይ ኬት አሥንዳይስ ዲሩዌ።

ዬሮሥንዲ፣ «አሥንያኢቃይጺይስኩኢትቃይጼሽንዶዲስካርሳታባይስንሳርጉዌሽንዎግኒሀይጥንታኑዌ፤አሥንያኢባንያአምጋድንሲጩቡዋስፔቱዌሽንዶዲስሀⶥጌሽንቆጢባይሳጉሶአምባይስንሳርታኑዌ!» ማኩ።

ዬሪ ዎግና ባ ሀይጡⶥ ዎጌሽን ማላት ፔትንሱⶥⶦርኪስ ይ ጋድን ቃይጹዌ። ካንግዎይን ⶦርኪ ሀይቅን ጫርን ቤስቲ ይስኩዌ። ዬሮሥንዲ ⶦርካ ኡⶣም ባ አሥንዴሽን ዎግና ባ ሀይጡⶥ ጋሂስ ታሢ ይስኩዌ።