36. ዬሱስ ⶣቢ ባ ሻዱ

ማጥን ጎቅን ዬሱሲ ባ ማⶥ ንያእንዳ ካዛስንድ ጴጥሮሳ፥ ዮሀኒሳ፥ ያይቆባይስ ኤቲ ኢሣይቅና ባና ጾክኒ ሀይቅን ጉዳ ጳዳጋ ባስን ኬስኩ።

ዬሱሲ ጾኪ ይስታጉⶥን ይ አፒ ኦባር ሻምቶጥን ሳንቁ። ይ ሲማርንድ ሳንቂ ጮብቱ፤ ዬሱስ ሲምር ማቂ ዶድ ዴብም ይስኩⶥ አሣ ኦናጎን ይ ማስኪ ማቃሲ አሥንሳርጉⶦጥናን ዳልቂ ይስቱዌ።

ኡⶢ ኤስ ይስታጉⶥን ሙሴያ፥ ኮናስ ኤልያሳይ አቲ ቤስቴንድ። አሥንዳ ኤንዲ ⶦዳጋ ባል ቤርግ አፓርቅን ዶድ ዴብም ይስቴንድ። ሀⶥ ዲሢ ይስኩ ቦዳም ዬኢ ሺክ አብ ጎብቃን ዬሩሳላምም ዬሱስ ዴብም አትንሱⶥ ኢራቴሽና ይ ዎጣ ዎጥቃን ዶንታዬሽን ይያ ባና ጋርትኒ ይስቴንዴ።

ሙሴያ ኤልያሳ ኤንዲ ዬሱሳ ባና ጋርትኒ ይስታጉⶥን ጴጥሮሲ፣ «ሀⶥን ኒኒ ይስታን ኒሕም ሶያ ጊዝዎ! ኤስን ማጥ ባⶢስ ኒም፣ ማጢስ ሙሴን፣ ማጢስ ኤልያሴሽን ካዝ ባⶢስ ኑና ጊጼ!» ማኪ ዬሱስን ሀይጡ። ጴጥሮሲ ኡⶣ ሀይጣ ባ ይስኩⶢስ ኤራርጉⶣን ይስቱዌ።

ጴጥሮሲ ኡⶢስ ሀይጢ ይስታጉⶥን ዳላ ፓግ ዱልዱሊ አቲ ኢሣይቅን ⶦር ቆሩ፤ ዱልዱል ጎብቃን፣ «ይያም ታ ካዣሲ ይስኩⶥ ታናንሢ ሀⶣ ጊዝዎ!» ማኪ ይስኩ ካሢ ሲስቱ። ኡⶣም ማⶥ ንያእንዳ ካዛስንዲ ሼርቃንቂ ዶድን ዎጤንዴ።

ዬሱሲ ኢሣይቅን ዳድን አቲ ኢሥ ጉዝን ታብቲ ይስቲ «ሼራሺዲ ዶንትንዴ!» ማኪ ኢሣይቅን ዞይሳሱዌ። ኢሣይቅኒንድ ዶንቲ ኖታጉⶥ ዬሱሳጊ ባ ካይ ይስትን ቤቄንዴ።

ዬሱሳ፥ ይ ማⶥ ንያእንዳ ካዛስንዳ ሀይቅን ጉድ ባስን ይስቲ ዎርትኔንድ። ኡⶣም ዬሱሲ ኢሣይቅኔሽን፣ «ኩሣ ሀⶥን ይንታይቅኒ ቤቁⶥ ጋሂስ ኤራሴሽን ሀይጣሺድንዴ፤ ታና ሀⶥ ሺክ ሀይብምሱዌ፤ ካሲ ዎጥቃኒንድ ዶንታ ታ ፕያጽን ይስኩ ታ ፔትንሱዌ። ኡⶣጋ ጌሽናን ይንታይቅኒ አሥን ሀይጥንሱዌ!» ማኪ ሀይጡዌ።