35. ሳስትናሳ ማይ ጋላሙⶥ ባብ ጋህ

ማጥን ጎቅን ⶦዳስንድ ቃራጥ ጊዝ አካንጌንዳ፥ ጩቡዋስንዳ ዱብድናንቂ ይ ዳድን ጋህ ሲስኒ ውንን ኢሣይቅን ኤርሳሲ ይስቱ።

ካሲ ኩሣ ኡⶥን ይስቴንድ ጊባት ባብምንዳ ኡካርንዳይ ዬሱሲ ጩቡዋስንድ ኢንግ ፔቲኢሣይቅና ባና ይስኩⶢስ ቤቅንሲ ባ ባርቅን ይ ኩርቂ ሚጻትኒ ጋሂ ይስቴንድ፤ ኡⶣም ዬሱሲ ጋሀ ሀⶢስ ሀይጡዌ።

ይሲንድ«ናሳ ማጥን ናማስ ንያእንዲ ይስቴንዴ። ይ ናንሣ ጉሣሲ ባ ባቢስ፣ ‘ዎ ባቦ! ኒ ጊዝቃን ታ ቆድ ፔትንሱⶥ ጊዚስ ሀⶥ ታም ኡሦ!’ ማኪ ኦጩ። ኡⶣም ይ ባቢ ባ ጊዚስ ባ ንያእንዳ ናማስንዴሽን ጾጽን ቆዱዌ።

ኡⶣም ናሲ ናንሣ ጉሣሲ ግያርን ባ ጊዚስ ካንግ ዱብዳሲ ሀካጋ ዶድን ሀንቂ ጩቡ ይያም ቃይጺ ባይሲ ውርሱዌ።

ኡⶣጋ ጌሽን ናንሣ ኡⶢ ይስን ይስኩⶥ ዶድን ኤዛጋ ቤሊ ዶንቱ። ይሲንድ ይያም ሙእስ ጎቲ ሙእምሱⶥ ጊዚ ይ ዳድን ባአም ኢራትካን ዎጡዌ። ኡⶤሽን ሀንቂ ⶦብ ኪም ቃይጽቃን እያርዱ። ይሲንድ ቃጽ ቤይስቲ ቴፒ ኢራትናንቂ ⶦቢ ሙኢ ይስኩⶣጎን ባ ሙእምሱዌሽን ኡልኒ ይስቱዌ።

ናንሣ ኡⶢ፣ «ታና ሀⶥ ዎሳስን ታ ቃይጻ ይስታጋዎ? ታ ባብ ኬትን ይ ቃይጻስንዲ ሙኢ ቦርሲ ፓካሲ ይስኩⶥ ሙኢ ⶾንቂ ቦርታንቅያን ይስኩዌ። ኤስን ሀⶥ ታ ባብ ኬትን ካርታ ሀምምታኑዌ። ሀንቃ ይ ዳድን አታንቃ «ዎ ባቦ! ኒ ቃይጻስንድቃን ማጥናስ ታ አሦ! ማካ ቆልንታኑዌ» ማኪ ታሡ።

ኡⶣም ዶንቲ ናንሥ ይሲ ባ ባብ ኬትን ሀምሚ ዶንቱ። ዬኢ ጋሥ ሀክን ይሲ ይስትን ይ ባቢ ይ ቤቅንሲ አይኑ። ባ ናንሥ ዳድን ዎጺ ሀንቂ ይ ድያሲ ሱንቁዌ።

ናሥ ይሲንድ ባ ባቤሽን፣ «ዎ ታ ባቦ! ዬርና፥ ኒምማ ታ ባይሳንቁዌ።ኤስን ሀⶥ ጌሽን ኒ ናንሥ ማስትንሱⶢ ታም ኮይስታርጉዌ፤ ኒ ቃይጻስንድቃን ማጥናስ ታ አሦ!» ማኩ።

ይ ፔታስን ይ ባቢ ባ ቃይጻስንድቃን ማጥናሲስ ጼጊ አሥንሲ፣ «ብታሳ ሀንቃ ሲማር ታም ኤታ ዬአ ታ ናንሥ ማይሶ! ይ ኩችካን ይሥንሱ አንሥ ቃጥያ፥ ይ ቶእቃን ይሥንሱ ጫማ ኤታ ዬአ ይሦ! ካሲ ሙኢ ኡⶥኪ ኒኒ ካዥንሱⶥ ማንታ ዝያጲስ ኤታ ዬአ ⶡⶤን ሙኢ ኡⶥኪ ኒኒ ካዤ። ይ ናቢንድ ታ ናንሢ ሀይቃንቂ ይስቲ ሀⶥ ፕያጻንቁዌ! ባአንቂ ይስቲ ሀⶥ ያብስታንቁዌ!» ማኩ።

ኡⶣም አሢ ባ ካንግ ካዥቂ ጋዴንድ። ኡⶢ ኤስ ይሢ ይስታጉⶥን ናንሢ ኢቻ ይ ኤዝኒ ይስን ቃይጻ ባ ይስኩⶥ ቃይጽ ካምም ይስቲ አቱ። ይሲንድ ጋሥ ፑርን ይስቲ ሻላ፥ ዱባ፥ ⶤማ ስያሳ ካሥ ሲስክንሲ «ሀⶢ ሀራጋ ጋራ፥ ካዣጌዎ?» ማኪ ኦጩ።

አሢ ይዬሽን፣ «ኒ ኢቻጊ አትን ኒ ባቢ ጋር ይሥን ካዥቃ ኑ ይስኩዌ» ማኪ ሀይጥን ባ ሲስኩⶣም ቃጽ ያንቂ ኬትን እያርዳሽኒ ኢቹ። ይ ባቢ ኬትን ይስቲ ፑርን ኬስኪ ይ ቆልን ይሲንድ ኢቹ።

ናንሣ ኤዚ ባ ባቤሽን «ታና ⶦዳጋ ቤርግ ካንግ ጊባታስናንቃ ኒም ቃሞጥን ቃይጻ ታ ይስኩዌ። ጪር ኒ ቲዛዚስ ኮሣርታኑዌ፤ ዎይንቴን ሀⶥ ሀክ ታ ኢችንዳ ታና ታ ካዥንሱዌሽን ማጣጋ ኬሥ ⶾባላጎን ታም ኡሣርኔኑዌ። ኒናንሣ ሀንቂ ጩቡ ቃይጺ ኒ ጊዚስ ካሽካሲ ባይሲ ውርሱⶤሽን ይሲ ባ ⶡን ቃይጺ ፔሽኪ አትናጉⶥን ይስን ማንታ ዝያጲስ ይስን ⶡካ ካዥቃ ኔ ይስታጋሳ!» ማኩ።

ኡⶣም ይ ባቢ፣ «ዎ ታ ናንሦ! ኔና ካንግዎይን ታ ኔና ኔ ይስኩዌ፤ ታም ይስኩⶢ ባ ካንጊ ኒያሳ ጊዝዎ፤ ኑና ካዥቃ ይስኩⶢ ኢባራ ጊዝዎ፤ ይ ናቢንድ ኒ ኢቺ ሀይቃንቂ ይስቲያን ሀⶥ ፕያጺ ዶንቱዌ። ባአንቅያን ይስቱዌ፣ ሀⶥ ያብስታንቁዌ!» ማኪ ይስን ሀይጡዌ።