34. ዬሱሲ ዱማርንድ ጋሂስ ኤርሳሱ

ዬሱሲ ዬራጋ ጫር ባሴሽና ዬሪ አሥ ዴብም ትያትንሱዌሽን ⶦድ ጋሂስ አምሣም ኤርሳሱ። ይሲንድ፣ «ዬራጋ ጫር ባስ ጋሂ አሢ ኤቲ ሀንቂ ባ ሙእ ካም ውዱቄን ዻጥ አፕ ዛር ሀርኬና ጊዛዎ። ዛራ ኤና ሙእ ዛራ ካንጉⶤሽንኮብⶣን ይስኬኔ።

«ኡⶣጎን ይ ፔታስን ዳጥ ዛራ ኤና ጶቃ ባ ኢቃጉⶥን ሀይቅን ጫርኔንድ ካፕምንዲ ው ሀርጽቃን ዎጊ ካሻጉⶥ ሀክ ካምም ይስኩⶥእንች ካንግ ቤሽ ኤዛጋ እንች አትንሴኔ» ማኩ።

ዬሱሲ ካሲ ዱማርስ አምሢስ ሀይጡ፤ ይሲንድ «ዬራጋ ጫር ባስ ጋሂ ማይና ኤታ ሀንቃ ይሲ ጻይድናጉ ሀክ ቡድ ፑሕካም ፓሻ እርኩⶥ ቡድ ዳክ ሀርኩⶣ ጊዝዎ!» ማኩ።

ካሲ «ዬራጋ ጫር ባሳ አሢ ኤቲ ሀንቂ ባ ሙእ ካምቃን አቹⶥ ጊዞጥን ሀርካ ይስኬኔ። አሣ ዱማርሲ ጊዛ ኡⶢስ ያክንሲ ካርሲ ዱኩዌ። ይሲንድ ሶይሲ ካዥቂ ይስቲ ሀንቂ ባም ይስኩⶥባ ጊዚስ ካንግ ጎቲ ይያም ሙእ ካማ ኡⶢስ ጎቱዌ።» ማኩ።

ካሲ ዱማርስ አምሢስ፣ «ዬር ጫር ባስ ጋሂ ይ ቆፒ ቃጽ አጥ ፔቱⶥ አንሥ ንያል ሀርኩⶣ ጊዝዎ። አንሥ ጊጣናስንዲ ኡⶢስ ባ ያኩⶣም ባም ይስኩⶢስ ካንግ ጎቲ ይያም አንሥ ንያላ ኡⶢስ ጎቴንዴ» ማኩ።

ኡⶣጋ ጌሽን ዬሱሲ ባ ሶይ ቃይጻም ጊባትኒ ባ ናⶥጊ ዱማርንድ አሥንዲስ ቃላሲ ሚዝኒ ይስኬንድ አሥንድ ጋሂስ ሀይጡ። ይሲንድ፣ «ናማስ አሢ ጾክኒ ዬርን ጎይን ኬት ሀንቄንዴ፤ ማጥናሲ ቃራጥ ጊዝ አካጉⶥ፣ ዱማርሲ ጊባት ባብ ይስቱዌ።»

«ናሳ ጊባት ባቢ ባ ጾካጉⶥን፣ ‘ዎ ዬሮሥንዶ! ታይስ ዱማርዶጥን ጩቡዋሳ፥ ጎⶪ ሙአጌንዳ፥ ጌጻሳ፥ ቢሣጌንዶጥን ኔ ታ አሣርጉዌሽን፣ ካሲ ናሳ ዳⶣ ቃራጥ ጊዝ አካጋⶦጥኒንድ ታ ፔታርጉዌሽን ኒ ጋላትና ታ ይስኩዌ’ ማኪ ጾኩ።»

ይሲንድ ቃዝቂ «ታና ማጥ ⶣምባትካን ናምዎይን ጾማ ታ ይስኩዌ፤ታና ያካ ታ ይስኩⶥ ጊዝቃን ካንግ ይ ባር ኬሳ ታሕምቃን ማጥ ኩቺስ ኡሣ ታ ይስኩዌ» ማኩ።

ናሳ ቃራጥ ጊዝ አካጉⶢ ዎታም ሀክን ይጥንሲ ሀይቅን ጫራን ካርሳ ባ ኖትንሱⶥ ሀካርጉዌ፤ ይሲንድ ባ ዱጽ ቂጪ ይስቲ «ዎ ዬሮሥንዶ! ታና ጩቡዋሳ ጊዛዎ!ታ ማሮ!» ማኪ ጾኩዌ።

ኡⶣጋ ጌሽን ዬሱሲ፣ «ኢባር ኢባር ማካ ታይስኩዌ፣ ዬሮሥንዲ ናሳ ጩቡዋስ ጾኪስ ሲስኪ ይዬሽን ኔና ሶይናሳ ጊዛዎ ማኩዌ። ናሳ ጊባት ባብ ጾኪስ ⶡናርጉዌ። ዬሪ ባ ዴብስ ኮንቅ ኮንቅ ማኪ ይስኬንዲስካንግ ይርⶥ ይርⶥ ማስንሱዌ። ባ ዴብ ዎሢ ይርⶥ ማሲ ይስኬንዲስ ኮንቅ ኮንቅ ማስንሱዌ» ማኩዌ።