30. ዬሱሲ ኡⶭ ውም አሥንዲስ ሙሱ

ዬሱሲ ባ ቄራም ቄራሜንድ ጋፕካን ዎብቲ ኢሣይቅኒ ሀንቂ ኤርሳስንሱዌሽን ባ ማⶥ ንያእንዲስ ዎሲ ቲሡ።ዎስኪ ቲሤንዲ ሀንቃ ባ ቃይጹⶢስ ካርቲ ዬኢ ዬሱሴሽን ይ ካንግ ሀይጤንድ። ኡⶣጋ ጌሽን ዬሱሲ ሶአ ባሀርን ሴጋም ኬስኪ ኢሣይቅኒ ኮት ካሽንሱዌሽን ሀይጡ። ኡⶣም ኢሣይቅኒ ጃልባቃን እያርዲ ሴጋም ኬስኬንዴ።

ዬሱሳ፥ ይ ማⶥ ማያእንዳይ ጃልባም ሀማጉⶥን አሣ ⶦዳስንዲ ቤቄንዴ። አሥንዳ ኤንዲ ኢሣይቅን አፓርቅን አትኒ ባሀር ጌⶫም ቶአም ዎጼንዴ። ዬሱሳ ይ ማⶥ ንያእንዳይ ሴጋም አትናጉⶥን አሣ ⶦዳሲ አፓርቅን አቲ ዪሣይቅን ባቂ ይስቴንዴ።

አሣ ዱብድኔንዲ ማይና፥ ንያአ ፕያሣርጉ እያን ኢኪ 5,000 ዴብም ይስቴንዴ። ኡⶣም ዬሱሲ አሥንዳ ኤንዴሽን ቃጽ አይኑ። ይሲ ኖታጉⶥን ኪምናሲ ኢሣይቅኔሽን ካይጌንድ ዶሮጥን ፔታንቂ ይስቴንዴ። ይሲንድ ኢሣይቅን ኤርሳሲ (ታማርሲ) አሥ ዴንትካን ይስቴንድ ፑግናስንዲንድ ፕያሡዌ።

ዶዲ ሶክ ፓዥ ካርታጉⶥን ይ ማⶥ ንያእንዲ ዬሱሴሽን፣ «ዶዲ ጡምያን ይስኩዌ፤ ካታሚንድ ሺክን ካይጉዌ፤ ኩሣ ሀⶥን ሙስትንሱⶢ ካይጉⶣጊንስን አሢስ ቲሤን ሀንቂ ሙኢስ ኮዪይ ጎትማኮ» ማኬንድ።

ይ ፔታስን ዬሱሲ ባ ማⶥ ንያእንዲስ፣ «ይንታይቅኒ ኢሣይቅኒ ሙእምሱⶢስ ኡሥንዴ!» ማኩ። ኢሣይቅኒ «ኡⶢስ ዎሳሳማን ኑና ይሥና ሀክንሳጋዎ? ኑ ዳድን ይስኩⶢ ኡⶭ ጤስ ቡዳ፥ ናም ኦሩዋ ኢካ ጊዝዎ!» ማኬንድ።

ኡⶥ ጌሽን ዬሱሲ አሢስ 50፣ 50 ፕያዲ ዝራሲ ኢሣይቅኒ ማትን ዎጋስንሱዌሽን ባ ማⶥ ንያኤሽን ሀይጡ።

ኡⶣም ዬሱሲ ኡⶭ ቡዳ፥ ናም ኡሩዋይስ ኤቲ ሀይቅን ጫርቃን ካርሲ ኖትንሲ ዬሪስ ጋላትኑ።

ዬሱሲ ቡዳ ኦሩዋ ኡⶣይስ አሤሽን ኢሣይቅኒ ቆዲ ኡሥማኬ ማኪ ባ ማⶥ ንያእንዴሽን ኡሡዌ። ኢሣይቅኒንድ አሤሽን ቆዴንድ። ሙአ ኡⶢ ቆዲ ውራርጉⶥ ሺዱ፤ አሢ ባ ካንግ ሙኢ ክያቁዌ።

ኡⶥ ጌሽን ማⶥ ንያእንዲ ሙስቲ ቦርቱⶥ ሙኢስ ዱብዳሴንድ፤ አርስቲ ዱብድኑⶥ ሙኢ 12 ሶንዳራ ⶾን አቱ። ሙአ ኡⶢ ባ ካንግ ኡⶭ ቡዳ ናም ኦሩቃን ይስትያን ኬስኩዌ።