29. ማር ይሢ ኤራርጉ ቃይጻስ ጋህ

ማጥን ጎቅን ጴጥሮሲ ዬሱሲስ፣ «ዎ ኤርሳሳጉⶦ! ታ ኢቺ ታም ባይስንሳን አም ካርሳን ታና ይስን ማር ይሥንሱዋጊዎ? ናፕም ካርሳ ታና ይ ማራን ቤዳራጌ?» ማኪ ኦጩ። ዬሱሲ ይስን ካርሲ፣ «ናሕፕታም ካርሲ ናፕማታማን ናፕም ካይ ኤሳርጉዌ፤» ማኩ። ዬሱሲ ኡⶢስ ኤስ ማኩⶢ ካንግዎይን ሺድማኬ ማኪ ማር ኒ ይሥንሱⶣን ሀይጡዌ። ኡⶣጋ ጌሽን ማጥ ቶሲስ ዬሱሲ ሀይጡ።

ዬሱሲ፣ ዬሪ አሥ ቶሕን ትያቲ ይስኩⶥን ናሳ ማጢ ባ ቃይጻስንዲስ ውⶢ ቤቅኒ ኮዩⶢጥናን ሀርኪ ይስኩዌ። ይ ቃይጻስንድቃን ማጣንሴሽን 10,000 አሺ ይ ዴብም ይስቱዌ።

ቃይጻሳ ኡⶢ ባ ትያት አሺስ ቆጽኒ ሀካርጉ ሺድን ይ ትያቲ «ናሳ ሀⶢ ታ አሽ ቆጽንባኑ ሀካርጉⶥ ሺዱዌሽን ናሳ ኡⶣ፥ ይ ኬት አሥንዳይስ ኤቲ ሀንቂ ጎትንዴ» ማኩ።

ቃይጻሳ ኡⶢ ባ ትያት አፕም ዶድን ዎጢ ጉራትንሲ «ዎ ታ ትያቶ! ኮት አብ ታም ኡሦ! ኒ አሺስ ይ ካንጊ ቆጽንታኑዌ» ማኩ። ትያታ ኡⶢ ባ ቃይጻሳ ኡⶤሽን አይንሲ ይ ዴብም ይስኩ አሺስ ካንግ ማሪ ሺችንሲ ይ ፖንሢ ቲሡ።

ይ ፔታስንቃይጻሳ ኡⶢ ኬስኪ ቦድን ይሲ አትንሳጉⶥን ይ አሺ ይ ዴብም ይስኩⶥ አሣ ማጢስ ያኩ። ይሲንድ ናሳ ኡⶢስ «ታ አሺስ ክያም ቆጾ!» ማኪ ይ ኡልቃን ኡጡ።

ይ ማጥናሳ ኡⶢ ዶድን ዎጢ ጉራትንሲ «ዬሪ ኒ ማሬ! ኮት አብ ታም ኡሦ! ኒ አሺስ ይ ካንግ ቆጽንታኑዌ!» ማኪ ይ ቆሉ። ቆሊ ይሲ ይስትን ኢችንሲ ጽያጽ ኬትካን ይ ቦኩዌ።

ቃይጻስንዳ ዱማርንዲ ኡⶥ ቤቅንሲ ሶይሲ አይኔንድ፤ ባ ትያት ዳድን ሀንቂ ይሲ ይሡⶢስ ይ ካንግ ሀይጤንዴ።

ኡⶣም ትያቲ ባ ቃይጻሳ ኡⶢስ ጼሲ አሥንሲ «ዎናሳ ኢትናስ ፔቱⶥቃይጻሳ ሀⶦ! ኔና ታ ቆልን ኒ አሺስ ካንግ ታ ማሩዌ። ኔኒንድ ኡⶢዎጥን ማራ ኔ ሺችንሱⶢ ኮይስቲ ይስኩዌ» ማኩ። ትያታ ኡⶢ ያንቂ ባጪ ባ አሺስ ካንግ ይሲ ቆጺ ውርሳጉ ሀክ ቃይጻሳ ኢትናሳ ኡⶢስ ጽያጽ ኬትካን ቦኩዌ።

ኡⶣጋ ጌሽን ዬሱሲ፣ «ይንታይቅኒ ይንት ካንግ ይንታይቅን ኢቺስ ማራሺዳን ኡⶢዎጥን ጫርቃኑⶥ ታ ባቢ ይንታይቅን ዴብም ይሥንሱዌ» ማኩ።