2. ጩቡይ ዶድ ቶሕን ዬኡ

አዳማ፥ ይ ማሽታ ሄዋናይ ዬሪ ኢሣይቅኔሽን ቶክንሲ ይቃን ኢሥ ይሡ እንቻ አፕ ኡጣጌንድ ጎብቃን ባ ይስታጉⶥን ቃጽ ካዥቂ ይስቴንዴ። ኢሣይቅኒ ጋናትካን ባ ይስታጉⶥን ጉዝካያን ይስቴንዴ፤ ጉዝ ካይንድ ባ ይስኩዌሽን ዬላርጌንዴ። ይ ናቢንድ ጩቡይ ዶድ ዴብም ካይጉዌሽና ጊዝዎ። ኢሣይቅኒ እንቻ ኤንድ ጎብቃን ጉድኒ ዎብቲ ዬራ ባና ጋርትኒ ይስቴንዴ።

ኡⶣጎን ይ ፔታስን አጻስ ፔቱⶥ ጾጥባቢ እንቻ ኡⶥ ዴንትካን ይስቱ።ይሲንድ አሥኒስ፣ «ዬሮሥንዲ ኢባሪያን እንቻ ሀንድ ዴንትካን ይስኩⶥ እንች ካንጌንድ አፒስ ሙአሽድንዴ ማኪ ይንታይቅኔሽን ሀይጣሴ?» ማኪ ው ኦጩ።

አሥን ውሳ፣ «ዬሮሥንዲ ኢንቻ ሶያ ኢታ ኤርሳሳ ይስኬን ዬቻም እንቻ ካንጌንድ አፒስ ኑና ሙእምሱዌሽን ኑም ሀይጡዌ። ሀማጊ እንቻ ኤን አፒስ ሙአጊንታን ሺዳን ይንታይቅን ኩቻማጎጥን ውስን ኡጣጊንታን ሀይብምሲንቱዌ ማኪ ኑም ሀይጡዌ» ማኬን።

ጾጥባብንድ አሥኔሽን፡- «ኡⶢ ኢባር ኤሳርጉዌ፤ ጪር ሀይብምሳርጊንቱዌ፤ እንች አፓ ሀኒስ ሙአጊንታጉⶥን ይንታይቅን አፒ ፒርስትንሱዌ፤ ኡⶣም ኢታ፥ ሶያይስ ባድ አሢ ኤሪ ዬሮጥን ይንታይቅኒ አትንሱⶢስ ኤራ ባ ይስኩሽን ሙአሺድንዴ ማኩዌ» ማኩ።

ኡⶣም አሥና እንቹ አፒስ ባ ሙእምሱዌሽን ኡልናንቃ ውሳ ኖታ ቤቃጉⶥን ው ሶይጡ፤ ኤርትስ ውሳ ያፕምሱⶢ ውይስ ቃጽ ኡላሱዌሽን እንቹ አፕካን ኤታ ሙኤኔ። ባ ባና ይስቱ ባ ቤሴሽን ኤታ ሀንቃ ኡሤን። ይሲንድ እንቹ አፒስ ኤቲ ሙኡዌ።

ግያርን ኢሣይቅን አፒ ባ ፒርቁ፤ ኢሣይቅኒንድ ጉዝ ካይ ባና ይስኩⶢስ ኤሬንዴ። ኡⶣም ኮች ሀይስ ሲኪ ባ ቡይኒስ ታፕሚ ካፕኔንዴ።

ናሳ አዳማ፥ ይ ማሽታ ኤንዲ ዬሮሥንዳጋ ካሢ እንቻጋ ጎብቃን ጉድኒ ዎብቲ ይስትን ሲስክንሲ ባ ሻይ ዬራጋ አፕም አሽቴንድ። ዬሮሥንዲ አዳሚስ ጼጊ «ዎ አዳሞ! ሀርቃናን ይስታጋዎ?» ማኩ። አዳምንድ «እንቻ አፕ ኡጢ ይስኬንድ ጎብቃን ጉድና ዎብታ ኔ ይስትን ኒ ካሥ ታ ሲስኩዌ። ጉዝካይ ታ ይስቱዌሽን ሼርቃንቃ ታና አሽቱዌ!» ማኪ ሀይጡ።

ዬሮሥንዲ፣ «ጉዝካይ ኔ ይስኩⶢስ ኦናጊ ኒም ሀይጣዴዎ? እንቻ ው አፒስ ሙአሺድንዴ ማካ ታ ሀይጤን አፒስ ሙእምሳኔ?» ማኪ ይ ኦጩ። አዳሚ «አሥና ታ ባና ይስትማካ ማካ ኔና ታም ኡሤና እንቹ አፒስ ታም ኡሥን ታና ሙኡዌ!» ማኩ። ኡⶣም ዬሮሥንዲ አሥኒስ፣ «ሀሬሽና ኡⶥ ቃይጻዳዎ?» ማኪ ው ኦጩ። ውሲንድ « ጾጥንባባጊ ታ ብያታስናን ታ ሙኡዌ» ማኬን።

ኡⶣም ዬሮሥንዲ ጾጥንባቢስ፣ «ኔና ዱርታስናንቃ ይስኩⶣ ጊዛዎ፤ ኒ ⶢላም ክያክና ኔ ዎብትንሱዌ፤ ኒ ካሣጋ ቤርጋም ካንግ ቡይጢስ ሙእምኔኑዌ፤ ኔና አሥን ሀና ኔና ጋግናስንድ ፔትንሲንቱዌ፤ ኒ ንያእንዳ፥ ው ንያእንዳይ ጋግናስንድ ፔትንሴንዴ። አሥኑ ዛሪ ኒ ዴቢስ ጣንጭንሱዌ፤ ኔኒንድ ይ ዡንጊስ ሳአ አዳስኔኑዌ!» ማኩ።

ካሲ ዬሮሥንዲ አሥኑዌሽን፣ «ንያእስ ዬልና ኔ ሳስታጉⶥን ቃጽ ኔ ኢራትንሱዌሽን ይሥንታኑዌ። ኒ ማይ ታሢ ኒ ቤስ ዳድናን ፔትንሱዌ፤ ይሲንድ ኒ ጎቲ አሂ ይስኩ ኒ ⶣጥ ፔትንሱዌ» ማኩ።

ካሲ ዬሮሥንዲ አዳሚስ፣ «ኒ ማሽት ጋሂስ ኔና ሲስካ ሙአሺዶ ማካ ታና ኒም ኡሡⶥ ቲዛዝስ ሲስካ ይስታ እንቹ አፒስ ሙእኔኑዌ። ኡⶤሽን ዶዳ ንያም ዶንቱⶣም ዱርታስናንቃ ይስኬን ፔትንሴኔ። ኒ ካሣጋ ቤርጋም ኔና ይስኩⶥ አባም ካንግ ኒ ሙእስ ኢራታና ጋይድና ቃይጻ ኒ ኤርክኒስ ው ዴብም ባርሳ ኔ ሙእንሱዌ። (ኔ ያፕምሱዌ።) ሀይቃይንድ ቡይጣጋ ቡይጥቃን ኔ ካርትንሱዌ» ማኩዌ። ኡⶥ ጌሽን አዳሚ ባ ማሽትስ ውሳ ካሣሜንድ ካንግ ባይ ው ፔቱዌሽን ሄዋን ማኪ ው ሱምሡዌ። ይ ፖርሽንድ ካሥ ኡሣጉ ማክያን ይስኩዌ። ዬሮሥንዲ ጊዝንዳጋ ቤትስ ዬሻሲ አዳማ፥ ሄዋናይስ ማይሱዌ።

ኡⶣጋ ጌሽን ዬሮሥንዲ አሢ ኢታ፥ ሶያይስ ባድ አሢ ኤሪ ሀⶥ ኤስን ኒሕዎጥን አታንቄንዴ። ካሲ ዶንቲ ሀንቂ ካሥ ኡሣጌን እንች አፒስ ይሲ ጮጊ ኤቲ ሙኢ ካንግዎይናም ሀክ ሀይባርጉ ይሲ ይስትንሳርጉዌሽን አዳማ ሄዋናይስ እንቻ አፕ ኡጣጌንድ ባ ቶኬንቃን ይሢ ኬሱዌ። ኡⶣም ካሣጋ እንች ዳድን ኤቲ ሀንቂ ይስኩ ቦዲስ ባቅንሴንድ፣ ኦናጎን ፔቲ ካሣጋ እንች ዳድን አቲ ጮጊ ኤቲ ሙእምሳርጉዌሽንሀካሜንድ ዎሳስንዳ ኩሩቤል ማስቲ ይስኬንዲስ ኩሣ ኡⶥን ይሡዌ።