28. ⶤት ንያአ ኬሔትናስ (ኬሔትናስ ፔቱⶥⶤት ንያእ)

ማጥን ጎቅን ኬሔትናስ ፔቱⶥⶤት ንያአ ማጢ ዬሱስ ዳድን ዬኢ አታንቂ፣ «ዎ ሶይናሳ ኤርሳሳጉⶦ! ካንግዎይን ይስትንሱ ካሥ ታ ባርዝንሱዌሽን ሀራን ታ ይሥንሱⶣጌዎ?» ማኪ ኦጩ። ዬሱሲ ይዬሽን ካርሲ «ሀሬሽናን ዎ ሶይናሶ! ታ ማካ ይስታጋዎ? ሶይናሲ ዬር ኢካ ጊዝዎ፤ ይ ፔታስን ኔና ካንግዎይን ይስትንሱ ካሥ ፕያጽ ኔ ያፕማ ኔ ማካን ዬራጋ ሂጊስ ባቃ ይሦ» ማኩ።

ናስ ይሲ «ሂጋ ሀኔንዴዎ?» ማኪ ዬሱስ ኦጩ። ዬሱሲ ናሲዬሽን፣ «ዎጣሺዶ። ዙካሺዶ። አጣጥ ጋሀሺዶ። ኒ ባባ፥ ኒ ባያይስ ዎብሶ። ኒ ማጥናሲስ ኒ ካሦጥን ⶡኖ» ማኪ ይስን ሀይጡ።

ይ ፔታስን ናሳ ኬሔትናሲ «ታ ንያአም ጋድንሳ ሂጋ ኤንዲስ ካንግ ይሣ ባቃ ታ ይስኩዌ! ኤስን ዱማርስ ሀራን ታ ይሥንሱⶣጊ ታም ኮይስቲ ይስታጌዎ?» ማኩ። ኡⶣም ዬሱሲ ናሲስ ⶡኑዌ።

ካሲ ዬሱሲ ይስን ካርሲ፣ «ኤስን ሀⶥ ኔና ውርስንሲ ይስኩ ሶስናስ አትና ኔ ኮያን ኒምም ይስኩⶥ ጊዝስ ካንግ ጎታ ግራስንዴሽን ኡሦ፤ ሀይቅን ጫርቃን ኤዛጋ ኬሔትስ (ቆፒስ) ያፕምኔኑዌ። ኤስን ኡⶢስ ይሥንሳ ዬአ ታ ዳቦ!» ማኪ ይስን ሀይጡ።

ኬሔትናሳ ኡⶢ ዬሱሲ ሀይጡⶢስ ባ ሲስኩⶣም አሣ ዱማርሴሽኒንድ ባ ጊዝ ኡሥና ባ ኮያርጉዌሽን ቃጽ አይኑ። ይሲንድ ዬሱስ ዳድን ይስቲ ባ አፒስ ዳድን ካርስንሲ ዶንቲ ሀንቁዌ።

ኡⶣጋ ጌሽን ዬሱሲ ባ ማⶥ ንያእንዴሽን፣ «ኬሔትናስንዲ ዬራጋ ጫር ባስካን ኢሣይቅኒ እያርድንሱⶢ ቃጽ ኢራታ ጊዝዎ። ኢባሪ ኬሔትናሲ ዬራጋ ጫር ባስካን እያርዳጉዌሽን ጊማላ ናፓጋ ፔላም እያርዳን ኡⶢ ሀካስንሱዌ» ማኪ ሀይጡዌ።

ዬሱስ ማⶥ ንያእንዲ ኡⶢስ ባ ሲስኩⶣም ዲታንቂ «ኤስ ይ ፔታን ኦናጊ ፕያጽኒ ሀክንሳጌዎ?» ማኬንድ።

ዬሱሲ ኢሣይቅኒስ ቤቅንሲ፣ «ኡⶢ አሣም ሀካስንሳርጉዌ፤ ዬራማን ካንጉⶢ ሀካስንሱዌ» ማኩ።

ጴጥሮሲ ዬሱሲስ፣ «ካንጉⶢስ ሺችንሳ ኒ ዳቡⶥ ኑና ኑ ቆፒ ሀራን ፔትንሳጌዎ?» ማኪ ኦጩ።

ዬሱሲ ይዬሽን ካርሲ፣ «ታዬሽን ማኪ ባ ኬትስ፣ ባ ኢችንዲስ፣ ባ ሚችንዲስ፣ ባ ባቢስ፣ ባ ባይስ፣ ባ ጊዝንድ ይ ካንጊ ሺቹⶢ ማጥ ባል ካርትንሲ ማጥ ባል ኩቺስ ዎምሣም ኤትንሱዌ። ካሲ ካንግዎይናሙⶥ ካሥ ፕያጽንድ ባርዝንሱዌ። ይ ፔታስን ⶦዳስንድቃን አፓርኔንዲ ጌሻር አታ፣ ጌሻርንዲ አፓርቅን አትንሱዌ» ማኪ ሀይጡ።