27. ሶይናስ ሳማር አሥ

ማጥን ጎቅን አይሁድ ኡካርንድቃን ማጥናስ ፔቱⶥ ሂግ ኤርትናሲ ዬሱሲስ ውⶢ ዎንሳሲ ቤቅኒ ይዳድን ዬኡ። ይሲንድ «ዎ ኤርሳሳጉⶦ! ካንግዎን ካሥ ፕያጽ ታ ያፕምሱዌሽን ሀራን ታ ቃይጽንሱⶣጌዎ?» ማኩ። ዬሱሲ ካርሲ «ዬርጋ ሂግ ማጻፕካን ሀር ማስትያን ጻፓዴዎ?» ማኪ ይ ኦጩ።

ናስ ይሲንድ ዬራጋ ሂግቃን፣ «ኒ ትያታ ኒ ካሐይስ ⶾናጋ ኒ ማያም፣ⶾናጋ ኒ ካሣም፣ⶾናጋ ኒ ታሣም ⶡኖ! ኒ ማጥናስንድ ኒ ካሦጥን ⶡኒ!» ማኪ ይስኩⶣ ጊዝዎ። ኡⶣም ዬሱሲ «ኢባር ኔ ሀይጣንቁዌ፤ ኤንዲስ ኔና ይሣን ካሣም ፕያጻ ይስትኔኑዌ» ማኪ ይስን ሀይጡ።

ይ ፔታስን ናስ ይሲ ቃዝቂ ቃጽ ሶይናስ ባ ፔትንሱⶢስ ኤርኒ ኮይንሲ፣ «ታ ማጥናሲ ኦኔዎ?» ማኪ ኦጩ።

ኡⶣም ዬሱሲ ናስዬሽን፣ «ዬሩሳላምም ይስቲ ኢያርኮ ካታምም ማጣጋ አይሁድ አሢ ሀንቂ ይስቱዌ።

«ናሲ ቦዳም ሀንቂ ይስታጉⶥን ቦክንዲ ይ ኡጤንዴ። ይ ጊዚስ ካንግ ቦጊ ኤትንሲ ይ ዴክኒ ዎጣ ፕያጻ ዴንትካን ይ ቦክንሲ ሀንቄንዴ።»

ኡⶣጋ ጌሽን ቆምባ ማጢ ቦዳ ኡⶣም ሀንቂ ይስቲ ይ ቤቁ። ቆምባ ኡⶢ ጎⶪቦጋስኒ ዴካስኒ ቦስታንቂ ይስኩⶥ ናሲስ ቤቂ ይስቲ ይ ሺሻም ኩሥ ባሢ ሀንቁ። ናሳ ኡⶥን ኤር ጋሥናርጉ ባ ቦዳም ሀንቁዌ።

«ኡⶣጋ ጌሽን ቃጽ ሀካርጉ ሌዊ አሣ ማጢ አቱ። ሌዊ አሣ ኡⶥ ይሲንድ ናሲስ ቤቂ ይስቲ ኩሥ ባሢ ሀንቁዌ።

«ካሲ ሳማር አሣ ማጢ ቦዳ ኡⶣም ዬኢ አቱ። ሳማር አሥንዳ አይሁድ አሥንዳይ ፓሽትኒ ⶡንናቃይጌንዳጊ ማጥናሲ ማጥናሲስ ሚዝኒ ይስቴንዴ።ይ ፔታስን አይሁድ አሣ ዴካስኒ ቦስታንቂ ይስኩⶢስ ባቤቁⶣም ሶይሲ አይኑ፤ ይ ዶንሢ ይ አዲስ ማስኪ ጽያጹዌ።

«ኡⶣጋ ጌሽን ሳማር አሣ ኡⶢ ባ ኩር ዴብም ይ ዎጋሲ ኤቲ ዎፒ ይስን አቂ ይስኩⶥ ኬትን አሢ ይ ቦኩ።

«ሳምር አሣ ኡⶢ ዱታ ኤንታም ባ ቦዳም ሀምሚ ዶንቱ፤ ይሲንድ ኬት ባቢስ ጼጊ አሢ ይስን ጊዝ ኡሥንሲ ‘ናሳ ሀⶢስ ታም ሺማ ባቃ ይስቶ፤ ሀማጋ ጊዛ ሀⶥ ዴብም ቃዝቃ ኔ ኬስንሳ ይስታን ታና ካርታ ታ አታጉⶣም ኒም ቆጽንታኑዌ’ ማኪ ሀይጡዌ» ማኩ።

ኡⶣጋ ጌሽን ዬሱሲ ናሳ ሂግ ኤርትናሴሽን፣ «ኤስን ሀⶥ ሀራን ታሣ ይስታጋዎ? ናሳ ቦጋስኒ ዴካስኑዌሽን ኢንግ ሺዳን ይ ማጥናስ ፔቱⶢ ሀኑⶣጌዎ?» ማኩ። ይሲንድ «ይስን ማር ይሢ ጋሥኑⶣ ጊዝዎ» ማኩ። ኡⶣም ዬሱሲ «ኔኒንድ ሀንቃ ኡⶢዎጥን ይሦ!» ማኩዌ።