26. ዬሱሲ ባ ዎስ ቃይጺስ ጋዱ

ዬሱሲ ሼጣናጋ ዎንሳሲስ ባ ጋምሣ ቦኩ ጌሽን ማⶣ ሀናሳጋ ጊዳም ይስን ባ ይስቱ ጌሊላ ዶድን ካርቲ ሀንቁዌ። ይሲንድ ባ ቄራም ቄራሙⶥ ጋፕካና ካታምንድቃን ጉድኒ ዎብቲ አሥ ኤርሳሱ። አሢ ባ ካንግ ይሲ ሶይ አሣ ጊዝዎ ማኪ ሀይጢ ሚጥኒ ይስቴንዴ።

ዬሱሲ ባ ንያአም ይስን ባ ይስቱ ናዝሬት ካታምም ካርቲ ሀንቁ። ይሲንድ ⶣምባታም ጎቅን ጎይን ኩሥንድ ሀንቁ። ይሲ ናባብሚ ኤርሳስማኬ ማኪ ኮናስ ኢሳይያስ ማጻፒስ ይስን ኡሤንድ። ይሲንድ ማጻፓ ኡⶢስ ፒርቂ አሤሽን ናባብሙዌ።

ዬሱሲ ናባብሙ ኩሢ «ግራስንዴሽን ካዥ ሀይጥ ታ ሀይጥንሱዌሽን፣ ካታስናንቂ ይስኬንዲስ ታ ካርስንሱዌሽን፣ አፓ ባልንዲስ ታ ኖታስንሱዌሽን፣ጽያሣስናቂ ይስኬንዲስ ታ ኬስንሱዌሽን ካዥ ሀይጢስ ሀይጥና ታ ዬኡዌ። ካሲ ⶡናስናንቃ ይስኬን ትያታጋ አባ ሀና ጊዛዎ!» ማኪ ይስኩ ኩሢስ ናባባሙ።

ኡⶣም ዬሱሲ ካርቲ ባ ኩሥን ዎጉ። አሢ ባ ካንግ ዶንቲ ይ ኖቴንድ። ይሲ ናባብሙ ማጻፒ ማስሄሽን ሀይጢ ይስኩⶥ ኮና ሀይጥናስኑⶣ ጊዝዎ። ዬሱሲ፣ «ሀⶥ ታ ናባብሙ ማጻፕ ሀይጢ ዎይንቴን አቲ ቤስታንቁዌ!» ማኩ። አሢ ባ ካንግ ዲታንቂ፣ «ናሳ ሀⶢ ዮሴፕ ናንሣታማን ይሲ ኦናጌዎ?» ማኪ ባ ባርቅን ኦጬንዴ።

ኡⶣም ዬሱሲ «ኮናሲ ባ ዶድን ዎብሳቃይጉⶢ ኢባራ ጊዝዎ! ኮናሳ ኤልያስ አባም ኢስራኤል ዶድን ማይና ቤስ ኤትኬና ⶦዳስንድ ይስቴንዴ፤ ካዝ ቤርጋ ሳፕም እያርፓ ዎሊ ቡካርጉⶥ ይስቱⶣም ኤልያሴሽን ውሳ ጋሥንሱዌሽን ዶዳ ዱማርስ አሥ ዳድናታማን ኢስራኤል ዶድን ይስኬንድ ማይንድ ዳድን ኤልያሲ ሀማርጉዌ» ማኩ።

ዬሱሲ ቃዝቂ «ኮናሳ ኤልሳ አባም ኢስራኤል ዶድን ዶርⶣ ኩምሣ ፑጋም ⶦዳስ አሥንዲ ፑርስቲ ይስቴንዴ። ይ ፔታስን ኤልሳይ ኢሣይቅንቃን ማጥናሳጎን ፕያሣርጉዌ። ኢስራኤል አሥንዳጋ ጋግናስንድ ማይት ኡካራ ኒእማን ኩምሥ ፑጋናን ኢካን ፕያሡዌ» ማኪ ሀይጡ። ጋሀ ኡⶢስ ሲስኪ ይስቴንዲ አይሁድ አሥንዳጊ ያንቄንዴ።

ናዝሬት ካታም አሥንዲ ዬሱሲስ ጎይን ኩሥን ይሢ ኬሲ ሳካን ጋርስኒ ኤቲ ሳክ ዴብም አሤንድ። ይ ፔታስን ዬሱሲ አሣጋ ዴንታም ፑይቲ ኤራሲ ይ ጉዝን ያፓራጊ ይስትን ካታምቃን ሀንቁዌ።

ኡⶥ ጌሽን ዬሱሲ ጌሊላ ዶድ ጎብቃን ካንግ ጉድኒ ዎብቲ ዬርጋ ሀይጢስ ኤርሳሲ ይስቱዌ። ⶦዳጋ አሥንዲ ይ ዳድን ዬኤንድ። አፓ ባልንዳ፥ ዎብትኒ ሀካርጌንዳ፥ ሀያ ዱድንዳ፥ ጋህኒ ሀካርጌንድ ዲቅንዳ፥ ⶦዳስንድ ፑግናስንዳ፥ ቶእ ሴጋላሜንዳ፥ ኢንትንዳ ፔቴንዲስ ይ ዳድን ኤቲ ዬኤንዴ።

ካሲ ሼጣን ማⶥንዳ፥ ሶቴታም ኡስታንቂ ይስኬንዲንድ ይ ዳድን ኤቲ ዬኤንዴ። ዬሱሲ ኢትናስ ማⶥንዳ ኤንዲስ አሥ ጉዝቃን ኬሲ አሢስ ፕያሢ ይስቱ። ሼጣን ማⶥንዲ፣ «ኔና ዬራጋ ናንሣ ጊዛዎ!» ማኪ ኬኢ ኬስኪ ይስቱዌ። ኡⶣም አሢ ሶይሲ ዲታንቂ ዬራም ጊባትኔንዴ።

ኡⶣም ዬሱሲ ይ ማⶥ ንያእንድ ማስቴንድ ባ ዳብምሴንዲስ 12 አሥንድ ኩርሱ። ኢሣይቅኒስ ሀዋሪያት (ዎስኪ ቲሤንድ) ማኪ ሱምሡ ኢሣይቅኒንድ ይያ ባና ዎብቲ ይ ዳድን ታማርኒ ይስቴንዴ።