20. ካታ፥ ካትካን ይስቲ ካርታ

ኢስራኤላ፥ ይሁዳ ዶድ ትያትንዲ ባ ሻይ ዬራጋ ዴብም ጩቡ ቃይጼንዴ። ዬሮሥንዲ ሀይቅን ሲና ጉድ ባስን ኢሣይቅና ባና ይሡⶥ ዎግስ ኮሢ ቦኬንድ። ዬሪ ሶይቃን ኢሣይቅኒ እያርዲ ባ ጎይንሱዌሽን ካርሲ ካርሲ ኢሣይቅን ኬንዛሲ ኮናንስዲስ ዎሲ ቲሡ። ኢሣይቅኒ ዬርን ጎስታሺድኒ ኢቼንዴ።

ኡⶣጋ ናባም ዬሪ ኢስራኤላ፥ ይሁዳ አሥንዲስ ኢሣይቅን ጋግናስንዴሽን ኤጋም አሢ ኡሡ። ⶢል ጩምጫራ ሀካሜንድ አሶር ትያትስ ዶንሢ ኤቲ ዬኢ ኢስራኤል ትያትስ ባይሱዌ። ኢሣይቅን ጊዛ አሥንዳ ቆፒ ይስን ይስኩⶥ ቂጽንዲስ ካንግ ቦርሳርጉ ካቲ ኤቲ ባ ዶድን ሀንቄንዴ። ው ካታምንዳ ⶦዲንድ ታማም ክያቢ ቡንሤንዴ።

አሶር ዶድ ኡካርንዲ ኢስራኤል አሥንድ ኬሔትናስንዳ፥ ኩች ቃይጻም ኤርትናስንዳይስ ካንግ አኪ ኤቲ አሶርቃን ሀንቄንድ።ግራስንዳናን ዎጣርጉ ቦርሲ ሺቼንዴ።

ኡⶣጋ ጌሽን ዶዳ ዱምርንድ አሥንዲ ኢስራኤል ዶድን ቶክንሱዌሽን ኤቲ ዬኤንዴ። አሥንዳ ኤንዲ ዬኢ ካታምንዲስ ካርሲ ጊጺ ይስን ቦርቴንድ ኢስራኤል አሥንዲስ እያርሲ ዎጌንዴ። አሥንዳ ኤንድቃን ዬይስኬንዲ ሳማራ አሥንድ ማስቲ ጼስቲ ይስቴንዴ።

ኢስራኤል አሥንዳ ኢሣይቅን ትያትንዳይ ዬራም ጊባትናርጉ ሺዲ ይ ትዛዝንድ ይሣርጉ ሺድንሲ ዎሳሳን ኢራትኒ ማጋጭ ባ ዴብም ቦስታሳን ይሁዳ አሥንዲ ቤቄንድ። ኡⶢስ ቤቂ ይስቲ ይሁዳ አሥንዳ ኢሥ ትያትንዳይ ካናአን አሥንድ ካሕንዴሽን ባሚ ጎይኔንዴ። ዬሪ ኢሣይቅን ኬንዛሲ ኮናስንዲስ ዎሲ ቲሡ፤ ኮናስንዳ ኤንዳጋ ሀይጢስ ሲሳሺድኒ ኢቼንዴ።

አሶር ትያትንዲ ኢስራኤል አሥንዲስ ጫዲ ዎሢ ባይሱ ጌሽን ካሲ ባብሎን ትያቲ ይሁዳ ዶድ ጫድንሱዌሽን ዬሪ ቲሡ። ባብሎን ትያቲ ቃጽ ሀካሙⶥ ትያታ ጊዝዎ። ይሁዳ ትያቲ ባብሎን ትያቴሽን ጋባር አቲ ቤርጋ ቤርጋም ጊብር ባ ቃጽንሱዌሽን ⶡን ይሡ።

ይ ፔታስን ኮት ቤርግንድ ጌሽን ይሁዳ ትያቲ ጌጹዌ። ኡⶣም ባብሎን ማይትናስንዲ ካርቲ ዬኢ ይህዳ ዴብም ጫድ ፒርቄንድ። ዬሩሳላም ካታሚንድ ኡጢ ዬርን ጎይን ኬትስ ታማም ቡንሢ ኮሢ ባይስኔዴ። ዬርን ጎይን ኬትካኑⶥ ቃጽንዳ ካታምቃኑⶥ ጊዛ ቂጻይስ ካንግ አኪ ካቲ ኤቲ ሀንቄንዴ።

ይሁዳ ትያት እያን ንያእንዲስ ባብሎን ማይትናስዲ ይ አፕም ዎጤንድ። ይ አፒንድ ቡርቂ ባይሴንድ። ኡⶥ ጌሽን ባብሎንቃን ይሁዳ ትያትስጽያጺ ኤቲ ሀንቄንዴ። ይሲንድ ባብሎን ጽያጽ ኬትካን ይስቲ ሀይቁዌ።

ናባካዳናጾራ፥ ይ ማይትናስዳይ ዶድ ካⶪ ቃይጽ ኢሣይቅኒ ቃይጽንሱዌሽን ቃጽ ግራስንዲስ ሺችንሲ ይሁዳ ትያታ ይሁዳ አሥንዳይስ ካንግ ካቲ ኤቲ ባብሎንቃን ሀንቁዌ። ዬራጋ አሥንዲ ይዝቅኔንድ ኢሣይቅን ባብምዴሽን ታሥ ኤስታንቃ ይስታ ኢሣይቅኔሽን ኤስቴን ዶድቃን ይስቲ ጊዳም ኤስቲ ሀንቁⶥ አቢ ካታጋ አብ ማስቲ ይስኩዌ።

ዬሪ ኢሣይቅን ጩቡ ናባም ኢሣይቅን ዴብም ማጋጭ ቦካሲ ኢሣይቅና ታሥ ባ ኡሡⶥ ሀይጣ ባ ዎጋይስ ብያታርጉዌ። ዬሪ ባ አሥንዲስ ባቃ ባ ይስኩⶣ ኮናስንዳም ኢሣይቅና ባና ጋርትና ባ ይስኩⶣይስ ሺቻርጉዌ። 70 ቤርግ ጌሽንኢሣይቅን ካርሲ ኢሥ ዶድን ባ ኤታ ውንሱዌሽን ታሥ ኡሡ።

70 ቤርግ ጌሽን ፓርስ ዶድ ትያቲ ባብሎን ትያቲስ ጫዲ ዎሡ። ኡⶣም ፓርስ ዶድ ትያትንዳጋ ትያቲ ባብሎን ዶዲስ ኡጢ ባ ቶእቃን ባኪ ጎቱ። ኡⶣጋ አባም ኢስራኤል አሥንዲ አይሁድ አሥንድ ማስቲ ጼስቴንዴ። ⶦዳስንዲ ባብሎንቃን ⶦድ ቤርግ ባ ዎጉዌሽን ባብሎን ዶድ አሥ አታንቂ ይስቴንድ። ኢሣይቅንቃን ቃጽ ኤርጋንቂ ይስቴንድ አሥንዳናጊ ይሁዳ ዶዲስ ታሢ ይስቴንዴ።

ፓርስ ዶድ ትያትንዳጋ ትያቲ ባ ኡጣ ጋባርሳ ይስኬንድ አሥንዴሽን ማር ይሢ ይስቱ። ቂሮሲ ፓርሳጋ ዶድ ትያት ባፔቱⶥ ኮት አብ ጌሽን ባ ዶድን ካርትኒ ኮዩይ ይስኩⶥ አይሁድ አሣ ኦናጎን ባ ፔታን ፓርስ ዶዲስ ፖንሥንሲ ባ ዶድን ሀምሚ ሀክንሱዌ ማኪ ትዛዝ ኡሡ። ዬርን ጎይን ኬትንድ ኢሣይቅኒ ይያም ጊጽንሱⶥ ጊዝንድ ኢሣይቅኔሽን ጋሥኒ ኡሡ። ኡⶣም አይሁድ አሥንዲ ካታስና ሀንቃ 70 ቤርግ ባ ቤሱ ጌሽን ኮታቤቅንድ አይሁድ አሥንዳጋ ቦምቢ ዬሩሳላም ካርቲ ዬኤንዴ።

ይሁዳ አሥንዲ ዬአ ዬሩሳላም ባ አቱⶣም ዬርን ጎይን ኬታ፥ ዬሩሳላም ካታም ⶦራም ይስቱ ማጋ ካርሲ ጊጼንዴ። ኢሣይቅኒንድ ዱማርንድ አሥንዳም ጎስታንቂ ይስቲ ዬኤንድ ፔታሲ ካርቲ ዬኢ ዬርን ጎይን ኬት ጊጺ ይቃን ጎይኔንዴ።