21. ዬሪ ማስህ ማስቱⶥኪርስቶሲስ ባ ቲሥንሱዌሽን ታሥ ኡሡ

ዬሮሥንዲ ጋሥ ይጋድን ማስሂስ ባ ቲሥንሱዌሽን ታሡዌ። ይ ጋድን ይሲ ውንሱⶥ ታሢ አዳማ፥ ሄዋና ዳድን ዬኡ።ዬሪ ሄዋን ዛርቃን ዬይስንሱⶢ ጾጥንባብ ዴቢስ ጣንጭንሱዌ ማኪ ታሥ ኡሡ። ሄዋኒስ ግያዱⶥ ጾጥባቢ ሼጣናንይስቱዌ። ሄዋኔሽን ኤስቱⶥ ታሥ ሀይጢ ማስሂይ ሼጣኒስ ውርስንሲ ጋምሢ ቦክንሱⶣን ሀይጢ ይስኩዌ።

ዬሮሥንዲ ይዝቅን ብርሃሜሽኒንድ ይ ቦዳም ዶድ ቶሕን ይስኩⶥ አሥ ዛሪ ባ ካንግ ዲርስንሱⶢስ ታሥ ኡሢ ሀይጥንሲ ይስቱዌ። ዲርታ ኡⶢማስህይ አትናጉⶥን ፔትንሱⶣ ጊዝዎ። ይሲ ዶድ ቶሕን ይስኩⶥ አሢ ባ ካንግ ፕያጽንሱⶢስ ኮዪይ ይስኩዌ።

ዬሪ ሙሴሽኒንድ ግያር አፕም ይ ሀርኩⶥ ኮናሲስ ባ ዶንሥንሱዌ ማኪ ታሥ ኡሥንሲ ይስቱዌ። ኡⶢⶦድ ቤርግ ጌሽን አትንሱ ይ ፔቱዌሽን ማስሄሽናን ሀይጢ ይስኩⶣ ጊዝዎ።

ካሲ ዬሮሥንዲ ትያታ ዳዊቴሽን ይ ዛርቃን ማጢ ካንግዎይናም ሀኬሽን ትያትንሱⶢስ ይስን ታሥ ኡሢ ሀይጥንሲ ይስቱዌ። ኡⶢ ማስሂይ ዳዊት ዛርቃን ማጥናስ ፔቱⶣን ቤሲ ይስኩዌ።

ዬሪ ቃያጋ ዎጊስ ባ ይሥንሱⶥ ሀይጢ ኮናሳ ኤርምያሳም ታሥ ኡሢ ሀይጡ። ዎጋ ኡⶢ ዬሪ ሲና ጉድንባ አሥንዳ ባና ይሡⶦጥን ኤሳርጉዌ። ቃያጋ ዎጋም ዬሪ ባ አሥንድ ማይቃን ባ ሂጊስ ጻፕምሱዌ። አሢ ባ ማጥማጣም ዬሪስ ኤርንሴንዴ። ዬራጋ አሥንድ ፔትንሴንዴ። ዬሪንድ ኢሣይቅን ጩቡይስ ማሪ ሺችንሱዌ። ማስሂይ ቃያጋ ዎጋ ኡⶢስ ጋድንሱዌ።

ካሲ ኮናስንዲ ማስሂይ «ኮናሳ፥ ቆምባ፥ ትያታ ፔትንሱዌ» ማኪ ሀይጤንዴ። ኮንናሲ ዬራጋ ሀይጢስ ሲስኪ አሤሽኒንድ ኤይሲ ሀይጢ ይስኩⶥ አሣ ጊዝዎ። ዬሪ ይ ቲሥንታኑዌ ማኩⶥ ማስሂይ ኮናሳ ጊዝዎ።

ኢስራኤል አሥንድ ቆምብንዲ አሥ ጩቡ ናባም ማጋጬሽን ኤስቲ ይስኩⶥ ኡዲስ ኤቲ አሣጋ ቆድን ሺርሺ ይስቴንዴ። ካሲ ቆምብንዲ አሣጋ ቆድን ጾኪይንድ ይስቴንዴ። ማስህይ ባ ቄሪስ ኡድ አሢ ዬርን ኡሡⶥ ቆምባ ጉዳ ጊዝዎ።

ትያቲ ዶድ ጎቲ አሂ አሣጋ ዴብምንድ ባሢ ይስኩⶣ ጊዝዎ። ማስህይ ዳዊታጋ ዳፕም ዎግንሱⶥ ትያታ ጊዝዎ። ዶድ ቶሕን ካንግ ትያቲ ካንግዎይናም ሀክ ጎትንሱዌ። ካሲ ኢባር ባሢስ ባሢ ይስኩⶣ ጊዝዎ።

ይዝቅኔንድ ኮናስንዲ ማስሄሽን ⶦድ ጋሂስ ኮኒ ሀይጤንዴ። ኮናስ ሚልክያሲ ማስህይ አፓርቅን ኤዛጋ ኮናሳ ማጢ ውንሱⶢስ ኮኑዌ። ማስህይ ዎር ንያአ ሙምኒንቃን ዬይስንሱⶢ ኮናስ ኢሳይያሲኮኑዌ። ካሲ ኮናሳ ሚክያሲ ማስህይ ቤቴሌምቃን ዬይስንሱⶢስ ኮኑዌ።

ኮናስ ኢሳይያሲ «ማስህይ ጋሊላን ይስትንሱዌ፤ ኢሣይቅን ማዪይ ባሣንቂ ይስኬንድ አሥንዲስ ዞይስንሱዌ፤ ካታስኔንዲስ ሀሪ ኬሲ ጽያሣስናንቂ ይስኬንዴሽን ሀርስቲ ኢሣይቅኒ ኬስንሱⶢስ ኤይሲ ሀይጥንሱዌ። ካሲ ፑርስቴንዲስ፣ አፓ ባልንዲስ፣ ቶእ ሴጋላሜንዲስ፣ ሀያዱዳ፥ ዲቅንዳይስ ፕያሥንሱዌ» ማኪ ኮኒ ሀይጡዌ።

ካሲ ኮናስ ኢሳይያሲ ማስህይ ኤር ባይሳራጊ ይስቲ ኢቻስንሱⶢስ፣ ይ ዴብም ጋሂ ኮይስቲ ኢራት ይ ቤቅንሱⶢስ ኮኒ ሀይጡ። ካሲ ዱማርንድ ኮናስንዲ ማስህይ ኡስቲ ሀይብምሱⶡስ፣ ይ ሲማሪስ ኢጣ ቦኪ ቆድንሱⶢስ፣ ይ ኢንጊ ካርሲ ይ ጎትንሱⶢስ ካንግ አፓርቅን ዴሣሲ ኮኔንዴ። ካሲ ኮናስ ዛካሪያሲ ይ ኢንጊ 30 ቢሪያ ይ ጎትንሱⶢስ ኮኑዌ።

ቃዝቂ ኮናሳ ኡⶢማስሀይ ዎሳሳማን ሀይብምሱ ፔታን ሀይጡዌ። ኢሳይያሲ ካሲ ማስህይ ባ አፕካን ⶾⶫስኒ ጾናስኒ ዴካስኑⶢስ ኮኒ ሀይጡዌ። ይሲንድ ኢት ቃይጻራጊ ይስቲ ኡስቲ ኤጋም አቲ ኤስቲ ኤዛጋ ኢራት ቤቂ ጫሽቲ ሀይብምሱዌ።

ካሲ ኮናስንዳ ኤንዲ ማስህይ ጪር ጩቡ ቃይጻርጉⶥ ሶይናስ አሥ ፔታንቂ ይስቲ አሣጋ ጩቡ ማጋጭ ኤቲ አሥ ቆድን ሀይቁዌ። ይሲ ኢራት ቤቂ ሀይብምሱⶢስ አሣ፥ ዬራጋ ዴንትካን ዲጊስ አሥንሱዌ፤ ኡⶣጋ ቦዳም ማስህይ ኢራት ቤቂ ሀይብምሱⶢ ዬርጋ ⶡን ፔቱዌ።

ማስህይ ሀይብምሱⶣ፥ ዎጥቃኒንድ ይሲ ዶንትንሱⶣይስ ኮናስንዲ ኮኒ ሀይጤንድ። ዬሪ ማስህይ ዎጣ፥ ዎጥቃን ዶንታጋ ቦዳም ጩቡዋስንዲስ ባ ፕያሥንሱዌሽን ባ ⶡን ይሢ ቃያጋ ዎግ ይሢስ ጋድንሱዌ።

ዬሮሥንዲ ማስህያጋ ቃይጼሽን ኮናስንዴሽን ⶦድ ጋሂስ ሀይጥንሲ ይስቱዌ። ይ ፔታስን ማስህይ ኮናስንዳ ኤንዳ አባም ውዋርጉዌ። ኮናስንዳ ኤንዲቃን ይ ውርን ኮኑⶢ400 ቤርግ ቤሱ ጌሽናን ዬሪ ዶድ ቶሕን ማስህይስ ቲሡዌ።