1. ድያድ

ሀⶣጋ ዱንጋም ኒኒ ቤቅንሱⶢ ዬሮሥንዲ ካንጉⶣጋ ጋሂስ ጋዲ ድያዱⶣጋ ጋሀ ጊዝዎ። ኡⶥ ይሲንድ ዬሮሥንዲ ዶዳ፥ ው ጎብቃን ይስኬንዳይስ ካንግ ሳፕም አቅ ጎብቃን ድያዱዌ። ዬሪ ዶዲስ ባ ድያዱ ጌሽን ዶዳ ኡርዳ ቡፓ፥ው ዴብም ኤርንባት ቃይጺ ሺዳን ካሣሙⶥ ድያዲ ካይጉⶣን ይስቴኔ። ይ ናቢንድ ው ጎብቃን ድያዳ ማጣጎን ድያስታርጉⶣን ይስቱዌ። ይ ፔታስን ዬራጋ ማⶢ ሶአጋ ዴብም ሲሞጥን ባ ታክንሲ ይስቱዌ።

ኡⶣም ዬሮሥንዲ «ጮብት ፔትማኬ!»ማክን ጮብትንድ ፔቱዌ። ዬሮሥንዲ ጮብቲ ሶይ ፔቱⶢስ ቤቅንሲ «ፓዥ» (ፓዥ ዴንት) ማኪ ጼጉዌ። ዬሮሥንዲ ጮብቲስ ኡርድቃን ባድ አሥንሲ ኡርዲስ ጡማስን ማኪ ጼጉዌ። ዬሮሥንዲ ይ ጋድኑⶥ ጎቅን ጮብትስ ድያዱዌ።

ይ ናም አቅ ጎቅን ዬሮሥንዲ ዶዳጋ ዴብም ሀይቅን ይስኩⶢስ ድያዱ። ኡⶣም ዬሮሥንዲ ሶእስ ዶዳም ፓሺ ቤⶥኪ ባድ አሡዌ።

ይ ካዝ አቅ ጎቅን ዬሮሥንዲ ሶኢ ዶዳ ኮላም ፓሺ ባድ አሡዌ። ዬሪ ኮሉባቢስ «ዶድ» ማኪ፣ ሶእንድ «ባሀር» ማኪ ጼጉ። ዬሮሥንዲንድ ባና ድያዱⶥ ቃይጺ ሶይ ፔቱⶢስ ቤቁዌ።

ኡⶥ ጌሽን ዬሮሥንዲ ዶዳ ካንጌንድ ቃይጽንዲስ ይ ዛራም ዛራም እንችንዳ፥ ኮችንዳ ጶርስንሱዌሽን ሀይጡ። ይሲ ሀይጡⶢዎጥን ፔቱዌ። ዬሮሥንዲንድ ባና ድያዱⶥ ቃይጺ ሶይ ፔቱⶢስ ቤቁዌ።

ይ ኦድ አቅ ጎቅን ዬሮሥንዲ ኦባርን አፓ፥ እያርፓ፥ ሻይትንዳይስ (ዣትንዳይስ) ድያዱዌ። ዬሮሥንዲ ፓዥ ዴንታ፥ ጡማስና፥ ያርም ኤንታ፥ ቤርግንዳይስ ባድ ባድ አሢ ይሡዌ። ዬሮሥንዲንድ ባና ድያዱⶥ ቃይጺ ሶይ ፔቱⶢስ ቤቁዌ።

ይ ኡⶭ አቅ ጎቅን ዬሮሥንዲ ሶእ ጎብቃን ይስኬንዳ፥ ካፕምንዳይስ ካንግ ድያዱዌ። ዬሮሥንዲንድ ባና ድያዱⶥ ቃይጺ ሶይ ፔቱⶢስ ቤቁዌ። ዬሪ ባና ድያዴንዲንድ ካንግ ዲሩዌ።

ይ ሳፕም አቅ ጎቅን ዬሮሥንዲ «ዶድ ዴብም ጊዝንዲ ባ ካንግ ባዛራም ዛራም ፔትማኬ!» ማኩ። ዬሪ ሀይጡⶢዎጥን ፔቴንዴ። ኢሣይቅንቃን ማጥማጥንዲ ድያንታ፥ባ ቄራም ቄራሜንድ ጊዝንዳ ፔታ፥ ማጥማጥንዲ ባ ⶢላም ክያክኒና ባዝቂ ሀማጌንድ ፔታ፥ ማጥማጥንዲ ጾጣ ኮችካኔንድ ፔቴንዴ። ዬሮሥንዲንድ ኤንዲ ባ ካንግ ሶይ ፔቱⶢስ ቤቁዌ።

ዬሮሥንዲ «አሢስ ኒሕ ⶣብም ኒሕ አምሦጥን ኒኒ ድያዴ፤ ኢሣይቅኒንድ ዶድ ቶሕን ካንጋ ጊዝንዳ ጾጥንዳ ቶሕን ካንግ ሀኪ ኢሥያቅኔሽን ይስትማኬ!» ማኩ።

ኡⶣም ዬሮሥንዲ ዶድን ቡይጢስ ኤቲ አሥ አሢ ቦሺ ድያድንሲ ባ ካሢስ ይስን ⶦኪ ኡሡዌ። ናሳ ኡⶣጋ ሱሚስ አዳም ማኪ ሱምሡዌ። ዬሮሥንዲ አዳሚ ይስን ይስትንሱⶥ ኩሥን እንቻ አፕም ኡጣጌንዲስ ቶክንሲ ኡⶢስ ይሲ ባቂ ቃይጽንሱዌሽን ይ ዴንትካን ይ ዎጋሱዌ።

ዬሮሥንዲ እንቻ አፕ ኡጣጌንዳ ባ ቶኬንድ ዴንትካን ናም እንቻ ባ ቄራሜንዲስ ቶኩ። ኤንድ ይሲንድ ካሣጋ እንቻ፥ ሶያ ኢታይስ ኤርሳሳጌንድ ኤርታጋ እንቻጊ ይስቴንዴ። ዬሮሥንዲ አዳሚስ እንቻ አፕ ኡጣጌንዲ ይስን ይስኩⶥ ኩሥን ይስኬንድ እንች ዴንትካን ሶያ፥ ኢታ ኤርሳሳጉ ኤርት እንች ዬቻም ዱማርዲንድ ካንግ ይሲ ሙእንሱዌሽን ይስን ሀይጡ። ሀማጊ ሶያ ኢታ ኤርሳሳጌን እንች አፒስ ባ ሙአን ይሲ ሀይብምሱ ፔቱⶢስ ይስን ሀይጥንሲ ይስቱዌ።

ዬሮሥንዲ ባ ድያዱⶥ አሢ ባ ካይ ይስትንሱⶢ ሶይ ፔታርጉⶢስ ሀይጡ። አዳሜሽን ጊዝንድቃ ማጥናሳጎን ይስን ይ ሀርኩⶥ ጋሥ ፔትንሱⶢ ያፕስታርጉዌ።

ዬሮሥንዲ አዳማጋ ዴብም ኤዛጋ ሱዲስ (ጊሲስ) ቦኩ። ይሲንድ ሱርቅንሲ ይስታጉⶥን ይ ናባልቃን ማጣጋ ሜርትስ ጋዚ ኤቲ ሀንቂ ማይን አሢ ድያድንሲ አዳም ዳድን ካርሲ ኤቲ ዬኡዌ።

አዳሚንድ ውይስ ባና ቤቁⶣም «ሀና ታ ሀርኬና ጊዛዎ፤ ውሳ እያን ዳድን ይስታ ያፕስቴናጋ ማይን ማስትማካ!» ማኩ። ኡⶤሽናን አሢ ባ ባባ፥ ባ ባያይስ ሺችንሲ ባ ማሽታ ባና ማጥ አⶭ ፔቲ ይስኩዌ።

ዬሮሥንዲ እይና፥ ማይናይስ ባ ⶣብም ድያዱዌ። ዬሪንድ ኢሣይቅኒስ «ⶦዳጋ ንያእንዳ፥ ንያእ ንያእንዳይ ይንታይቅኔሽን ይስትማኬ። ዶዳ ሀናም ቤሺ ጌቢ ⶾንዴ!» ማኪ ዲሩዌ። ዬሮሥንዲ ባ ቃይጹⶥ ቃይጽንዲ ባ ካንግ ቃጽ ሶይ ፔቱⶢስ ቤቁዌ። ካንግ ባና ድያዱⶣም ካዥቁዌ፣ ኤንዲ ባ ካንጊ ሳፕም አቅ ጎብቃን ፔቱዌ።

ይ ናፕም አቅ ጎቅንዬሮሥንዲ ባና ድያዳ ይስኩⶥ ቃይጺስ ውርሱዌ። ኡⶤሽን ዬሮሥንዲ ቃይጻ ባና ይስቱ ቃይጽቃን ካሹዌ። ኡⶣም ናፕም አቅስ ዲሪ ሶይሱዌ። ይ ናቢንድ ዬሪ ይያም ጎቅን ቃይጻ ካንጌንድቃን ባ ካሹዌሽና ጊዝዎ። ዬሮሥንዲ ሀይቅን ጫራ፥ ዶዳ ኢሣይቅን ጎብቃን ይስኬንዳይስ ባና ድያዱⶣም ይሲንድ ይ ካንጊ ቃይጺ ድያዲ ውርሱⶢ ኡⶢዎጥኑⶥ ቦዳማ ጊዝዎ።