18. ኢስራኤል ትያቲ ባ ቆዱ

ዳዊቲ ⶦድ ቤርግ ቤስንሲ ሀይቁ። ይ ናንሣ ሳላሞኒ ይ ኩሥን ትያቱዌ። ዬሪ ሳላሞኒ ሀራን ኮዪይ ይስታን ይ ኦጩ። ሳላሞኒ ኤርትስ ታም ኡሦ ማኪ ኦጩⶣም ዶድ ቶሕን ቃጽ ኤርትናስ ይ አሡዌ። ሳላሞኒ ⶦድ ጋሂስ ኤሪ ኤዛጋ ኤርታም ባሣጉⶥ ትያት ፔቱ። ዬሪ ቃዝቂ ቃጽ ኬሔትናስ ይ አሡዌ።

ሳላሞኒ ይ ባባ ዳዊቲ ታሢ ዬሻሲ ይያም ይሲ ጊጽንሱⶥ ቃይጽንዲ ዱብዳሲ ይሡⶥ ዬርን ጎይን ኬትስ ጊጹ። ኢስራኤል አሥንዲ ዱካም ኬትካን ዬሪስ ጎይና ባ ይስቱⶥ ሺዳንቂ ጎይን ኬትካን ዬርን ኡድሺርሺ ጎይኔንዴ። ኡⶣም ዬሮሥንዲ ዬኢ ጎይን ኬታ ኡⶥካን ያፕስቲ ይቃን ይስቱዌ።

ይ ፔታስን ሳላሞኒ ዶዳ ዱማርንድ አሥ ዎር ንያእንዲስ ⶡኑዌ። ኢሣይቅንቃን 300 አትንሴንድ ማይንዲስ እያርሲ ዬርን ጎስታርጉ ሺዱዌ። ማይንዳ ኤንድቃንⶦዳስንዲ ባ ዶድን ይሢ ባ አሥንድ ካሕንድ አምሥ ኤቲ ዬኢ ጎይኔንድ። ሳላሞኒ ባ ኤርግን ካሕንድ አምሣ ኤንዴሽን ጎይኑዌ።

ዬሪ ሳላሞኒስ ባጩ።ዬራም ጊባትናርጉ ይሲ ሺዱዌሽን ሳላሞኒ ሀይቁ ጌሽን ይ ትያቲ ናም ባ ቆድንሱⶢስ ሀይጡዌ።

ሳላሞኒ ሀይቁ ጌሽን ይ ናንሣ ሮቢአሚ ይ ኩሥን ትያቱ። ሮቢአሚ ኤር ኤራርጉⶥማይ ግራሳ ጊዝዎ። ኢስራኤል አሥንዲ ይ ትያቲስ ዞይስኒይ ይ ዳድን ባ ካንግ ዱብድኒ ዬኤንድ፤ ይ ባባ ሳላሞኒ ⶣዳጋ ቃጽ ኢሣይቅን ቃይጻሲ ግቢርንድ ቅጽ ቆጻሲ ኢሣይቅን ኢራትሲ ይስቱⶢስ ኑም ኮብⶣⶦ ማኪ ይስን ሀይጤንድ።

ሮቢአሚ ባ ናይንዳም ኪሣንቂ ኢሣይቅኔሽን «ታ ባቢ ኤዛጋ ቃይጽ ይንታይቅን ቃይጻሱዌ ማኪ ሀይጥንቱዌ። ታና ኡⶥ ቤሽ ይንት ቃይጻስንታኑዌ፤ ኢቻጊንታን ጡር ግያዳ ሱይስክኖጥን ጫዲ ይስኩⶣም ይንታይቅን ዴክና ማጋጭንድ ቦካ ይንት ጎትንታኑዌ» ማኪ ሀይጡ።

ኡⶢስ ባ ሲስኩⶣም ኢስራኤል አሥንድ ዛራ ታሕማስንዲ ሮቢአም ዴብም ጌጺ ዶንቲ ባ ቆዴንድ። ናማስ ዛራናን ይያ ባና ሺዴንዴ። ናማስ ዛርንዳ ኤንዲ ይሁዳ ትያትስ ትያሤንዴ።

ባ ቄራም ባ ቤⶥኪ ኬስኬንድ ኢስራኤል አሥንዲ ኢዮሪቢአም ማስቲ ይስኩⶥ ናሲስ ባ ዴብም ትያሤንዴ። ዝያጻ ሴሜን ኮብ ይስኩ ኢስራኤል ዶድን ይስኬንዳጊኡⶢስ ይሤንዴ፤ ኢሣይቅኒንድ ኢስራኤል ትያት ማኪ ባ ዴብም ትያቲስ ኡካርሴንዴ።

ኢዮቢአሚ ዬር ዴብ ጌጺ ኢስራኤል አሥንዲ ጩቡ ቃይጽንሱዌሽን አሡ። ይሲንድ ዬሩሳላምም ይስኩ ጎይን ኬትን አሢ ሀንቂ ዬርን ጎይንሱⶢስ ናስንሲ ናም ካሕንድ አምሢ ቃይጺ ኤንዴሽን ኢስራኤል አሥንድ ጎይናሱዌ።

ኡⶣጋ ጌሽን ይሁዳ ኢስራኤላ ትያትንዲ ጋግናስንድ ፔቲ ባ ባርቅን ⶦዳጋ ቤርግ ጫድኔንዴ።

ኢስራኤል አሥንድ ትያት ፔቴንዲ ባ ካንግ ኢትናስንድ ካያን ይስቴንዴ። ኢሣይቅንቃን ሾዳስንዲ ባ ኩሥን ትያትንሱⶣ፥ አሥንዳ ዱማርንዳይስ ዎጢ ኢራትሲ ይስኬንዳን ይስቴንዴ።

ትያትንዳ ኤንዲ ባ ካንግ ኢስራኤል አሥንዲስ ካሕንዳ ዱማርንዴሽን ጎይናሲ ባ ንያእንዲንድ ካሕንዳ ኤንዴሽን ኡዲ ይስቴንዴ። ኡⶣጋ ዴብም ቃጽ ኢት ቃይጻ አሥ ሚዛሳጉⶥንድ ቃይጺ ይስቴንዴ።

ይሁዳ ዶድ ትያትንዲ ዳዊት ዛርንዳ ጊዝዎ። ኢሣይቅንቃን ማጥማጥንዲ ዬርን ጎስታጌንድ ሶይ ትያትንዳጊ ይስቴንዴ። ካሲ ማጥማጥንዲ ዬርን ጎስታርጌንድ ኢትናስንዳ ጊዝዎ። ኢሣይቅን ቃይጺ ሶይጣርጌንድ ዱማርንድ ካሕንዴሽኒንድ ጎይኒ ዬቴንዴ። ትያትንዳ ማጥማጥንዲ ባ ንያእስ ዱማርንድ ካሔዴሽን ኡዲ ጎይኒ ዬር ዴብም ጌጺ ይስቴንዴ።