13. ዬሪ ኢስራኤል አሥንዳ ባና ዎግ ይሡ

ዬሮሥንዲ ኢስራኤል አሥንዲስ ዞቅ ባሀር ቦዳም ቤሲ ኤቲ ባ ሀንቁ ጌሽን ዶዳ ኮልን ቦዳም ሲና ጉድ ማስቲ ይስኩⶥን ኤቲ ሀንቁዌ። ጉዳ ኡⶢ ሙሴይ ሀይቅን ይ ባስን ኩእቃን ታሚ ሳንቂ ይስትን ቤቁⶣ ጊዝዎ። ኢስራኤል አሥንዲ ጉዳ ኡⶣጋ ቶእቃን ባ ዱካም ኬትስ ቶኬንዴ።

ዬሮሥንዲ፣ «ታ ሀይጢስ ሲስኪ ታ ትዛዛ ታ ዎጋይስ ባቃጊንታን፣ዎብሳካንቂ ይስኬንድ ዶዲስ ይንታይቅኔሽን ኡሣ፣ ትያትንድ ቆብምንዳ፣ ሀናስ አሥንዳይንት አሥንታኑዌ» ማኪ ሙሴሽና ኢስራኤል አሥንዴሽ ሀይጡ።

ኢስራኤል አሥንዲ ካዞይን ዬምⶽ ኡጢ ጣልኒ ዬሹ ጌሽን ዬሮሥንዲ ዙያማ ድያድ ጊራማ፥ ⶹባማ ኤዛጋ ⶣሚት ፔይስኪ ይስኩⶥካሣማ ሀይቅን ሲና ዴብም ዎርትኑ። ሙሴ ኢካናናጊ ጉድ ባስን ኬስንሱዌሽን ሀይጣስኑዌ።

ኡⶣም ዬሮሥንዲ ኢሣይቅኔሽን ዎጊ ሀይጢስ፣ «ይንታይቅኒስን ጊብጽ ቃም ኬትካን ኬሳ ፕያሡⶥ ይንት ካሐ ዬሮሥንዳ ያህዌሂ ታና ጊዛዎ! ዱማርንድ ካሕንዲስ ጎይናሺድንዴ» ማኪ ሀይጡ።

ካሲ «ካሕንዳጋ አምሥንዲስ ቃይጻ ኢሣይቅኔሽን ጎይናሺዶ፣ ታና አይና ⶻንቃ ይስኩⶥ ካሐ ጊዛዎ፣ ታ ሱሚንድ ሀሪ ኒ ብያታም ጼጋሺዶ (ታ ሱሚስ ጋጽንሳርጉⶥ ጋህን ጼጋሺዶ፣) ⶣምባታጋ አቢስ ሶይሳ ጣላሳ ኔ ዎብስንሱዌሽን ታሦ፤ ኒ ቃይጺስ ይ ካንግ ሳፕምዎይን ቃይጾ፤ ይ ናፕም አቂ ኔና ካሽንሱⶣ፥ ታይስ ኔና ይያም ታሥንሱⶣ አባ ጊዝዎ» ማኩ።

ካሲ ቃዝቂ «ኒ ባባ ኒ ባያይስ ዎብሶ።ዎጣሺዶ። ቤስ ዴብም ቤስ፣ ማሽት ዴብም ማሽት ኮያ ቢሣሺዶ።ዙካሺዶ። አጣጥ ጋሀሺዶ። ኒ ማጥናስ ማሽትስ ይ ኬትስ፣ ይ ሀስ ፔቱⶥ ቃይጺ ኤትና ኡልናሺዶ» ማኩ።

ታሕም ቲዛዝንዳኤንዲስ ዬሮሥንዲ ንያላ ሚያሳስኑⶥ ናምጭን ጻፕምሲ ሙሴን ኡሡዌ። ካሲ ዬሪ ዱማርንድ ⶦዳጋ ሂጋ፥ ዳምባይስ ኡሡዌ። አሢ ሂግንዳ ኤንዲስ ባና ይሣን ዬሪ ኢሣይቅኒስ ባ ዲርንሱⶣ ኢሥ ባ ባቅንሱዌሽና ታሥ ኡሡ። ሂጋ፥ ቲዛዛ ኤንዳይስ ኢሣይቅኒ ባቃሺዳን ኢሥ ዴብም ማጋጭ ቦክንሱዌ።

ካሲ ዬሮሥንዲ ዱካም ኬት ቃይጽኒ ኮዪይ ይስኬንዴሽን ቃይጻጋ ዶሲስ ኤርሳሱ። ዱካም ኬታ ኡⶥ ይስንድ ድያም ዱካም ኬት ማስቲ ይስኩዌ። ማንጻላታ ናማ ኤዛም ቆዳንቂ ይስኩⶥ ናም ዴጊ ይዬሽን ይስኩዌ። ዬሪ ይቃን ይስኩ ፔቱዌሽን ማንጻላታ ኡⶥ ጎብቃን ይስኩⶥ ኩሥካን እያርድኒ ሀክንሱⶢ ቆምባ ጉድ ኢካ ጊዝዎ።

ዬራጋ ሂግ ይሣርጉⶥ አሣ ኦናጎን ባ ፔታን ዱካም ኬት ፑርን ይስኩⶥ ኡድ ኩሥን ዬርን ኡድ ፔትንሱⶥ ጊዚስ ኤቲ ዬኢ ኡሥኒ ሀክንሱዌ። ቆምቢ ጊዛ ኡⶡስ ⶡኪ ኡድ ኩሥ ዴብም ቡንሢ ይስቱዌ። ኡዳስኑⶥ ጊዝ ሱቲ ናሳ ኡⶥ ጩቡ ማራሲ ዬራጋ አፕም ይ ሶይሲ ጣላሲ ይስቱዌ። ዬራጋ ቆምቢንድ ኢሣይቅኒ ፔትንሱዌሽን ዬሮሥንዲ ሙሴ ኢቻ አሮና፥ ይ ዛርንዳይስ ኩርሱዌ።

ኢስራኤል አሥንዲ ባ ካንግ ዬሪ ኡሡⶥ ትዛዚስ ባ ይሥንሱዌሽና ዬር ኢክ ባ ጎይንሱዌሽና፥ ዬርን ባድ አኣትንቃ ይስኩ አሥ ባ ፔትንሱዌሽን ⶡኔንዴ። ኡⶣጎን ይ ፔታስን ዬርን ባ ጎስትንሱዌሽን ዎግቃን ባ እያርዱ ኮት አብ ጌሽን ኢታጋ ጩቡ ቃይጼንዴ።

ሙሴይ ⶦዳጋ አብ ሀይቅን ሲና ጉድ ባስን ዬራ ባና ጋርትኒ ይስቱ። አሥንዲ ይሲ ካርቲ አታጉ ሀክ ባቃ ባ ይስትንሱⶢስ ኩርቄንዴ። ኡⶥጋ ናባም አሮን ዳድን ባ አንሥ ⶣⶭአኪ ኤቲ ዬኢ ካሕ አምሥ ይሲ ቃይጽንሱዌሽን ይ ኦጬንዴ።

አሮኒ ኦይዝ ንያእ አምሣም አንሣጋ ካሕ ቃይጹ። ኢስራኤል አሥንዲ ባም ኮይስታርጉⶥ ቦዳም ካሕንዳጋ አምሤሽን ጎይኒ ጋዴንዴ። ኡዲንድ ይስን ኡዴንድ፤ ኢሣይቅን ጩቡዋ ኡⶥ ናባም ዬሪ ቃጽ ኢሣይቅን ዴብም ያንቂ ባጪ ኢሣይቅን ባይስኒ ታሡዌ። ይ ፔታስን ሙሴይ ኢሣይቅኔሽን ጾኩ። ዬሪ ሙሴ ጾክ ሲስኪ ኢሣይቅን ባይሳርጉ ሺዱዌ።

ሙሴይ ሀይቅን ጉድቃን ይስቲ ዎርትኒ ካሕ አምሣ ቃይጹⶥ ባ ቤቁⶣም ቃጽ ያንቂ ታሕም ቲዛዝንዲ ይስን ጻፑⶥ ንያላ ኤታ ዬአ ባይስኩⶢስ ፕያዚ ባሡዌ።

ኡⶣም ሙሴይ ኢሣይቅኒ ቃይጹⶥ ካሕ አምሢስ ዎጢ ቡሕኒ ሚቃስንሲ ሶእ ዴብም ፓካሱ። ኡⶢስ አሥንዲስ ኡⶣሹዌ። ዬሮሥንዲ ኡⶣጋ ናባም ባ ዬማት ኤቲ ዬኢ ⶦዳስንዲስ ዎጡዌ።

ሙሴይ ካርቲ ሀይቅን ጉድ ባስን ኬስኪ ዬሪ አሥንዲስ ማርንሱዌሽን ጾኩ። ዬሪንድ ሙሴ ጾክ ሲስኪ ኢሣይቅኔሽንማርይሡዌ።ሙሴይካሲባናባሤንድንያልቆድንዱማርስንያልኤቲዬኢታሕምቲዛዝንዲስጻፓሱ።

ኡⶣጋ ጌሽን ዬሮሥንዲ ሲና ጉድን ይሢ ኢስራኤል አሥንዲስ ታሥ ባ ኡሤስን ዶድቃ ቤሲ ኤቲ ሀንቁዌ።