14. ዶዳ ኮልን ዡሊ ኢራትኔንድ

ዬሮሥንዲ ኢስራኤል አሥንዳ ባና ዎግ ይሢ ይሲ ኡሡⶥ ቲዛዛ ሂጋይስኢሣይቅኔሽን ባ ሀይጡ ጌሽን ሲና ጉድን ይስቲ ዶንቲ ሀንቄንዴ። ዬሪ ባ አሥንዲስ ሲና ጉድን ይሢ ካናአን ዶዳ ኢሣይቅኔሽን ኡሥና ባ ሀይጤን ኤቲ ሀንቁ። ዱልዱላጋ ቡቲ ኢሣይቅን አፓርቅን አቲ ካናአንቃን ሀንቁዌ። ኢሣይቅኒንድ ይ ያፓርን ዳቤንዴ።

ዬሮሥንዲ ዶዳ ኤኒስ ኢሣይቅን ዛርንዴሽን ኡሥባኑዌ ማኪ አብርሃማ፥ ይስሀቃ፥ ያይቆባዬሽን ሀይጥንሲ ይስቱዌ። ኡሻጎን ይ ፔታስን ዶዳ ኤንን ⶦዳጋ አሥ ዛርንዲ ቶክንሲ ይስቱ። አሥንዳ ኤንዲ ካናአን አሥንድ ማስቲ ይስቴንዴ። ኢሣይቅኒንድ ዬራም ጊባትኒ ጎይናርጌንድ አሥንዳ ጊዝዎ። አጣጥ ካሕንዴሽን ጎይኒ ⶦዳጋ ኢት ቃይጽ ቃይጺ ይስቴንዴ።

ዬሮሥንዲ ኢስራኤል አሥንዴሽን፣ «ካናአን ዶድን ይስኬንድ አሥንዲስ ይ ካንግ ባይስንዴ። ኢሣይቅና ይንታ ⶡን ይሢ ኢሣይቅን ንያእንዲስ እያርሳሺድንዴ። ኢሣይቅን ካሕንዲንድ ካንግ ታሽ ባይስንዴ። ታና ሀይጣ ይስኩⶢስ ሲስኪ ይሣሺዳጊንታን ታ ቆድን ኢሣይቅናጋ ካሕንዴሽን ጎይንሲንቱዌ» ማኪ ሀይጡ።

ኢስራኤል አሥንዲ ካናአን ዶድ ኬምም አቱⶣም ሙሴይ ኢሣይቅን ዛርቃን ማጥ ማጥ አሥ አኪ 12 አሥንድ ኩርሱ። ሀንቂ ኢሣይቅኒ ዶዱሳ ሀርኬሶጥን ሀርካ ይስታን ውⶢ ዝምሢ ቤቅንሲ ውዌ ማኪ ሀይጢ ቲሡዌ። ካናአንቃን ይስኬንድ አሥንዲ ዞላሳጎ? ጋምናሳጊሳን ኢሣይቅን ይሢስ ባ ኤርንሱዌሽን ሀንቂ ኢሣይቅኒ ዶዱ ቃⶢ ቤቅንሱⶢ ኮይስቲ ይስኩዌ።

አሥንዳ 12 ኤንዲ ካናአን ዶድን ሀንቂ 40 አቅ ጉድኒ ዎብቲ ቤቂ ውርስንሲ ካርቲ ዬኤንዴ። ኢሣይቅኒንድ ባ ዎሲ ቲሤንድ ሙሴሽና ኢስራኤል አሥንዴሽና «ዶዱሳ ቃጽ ጪማ ሶያ ጊዛዎ! ሙኢ ውቃን ⶾንቂ ቦርታንቅያን ይስኩዌ፤» ማኬንድ። ይ ፔታስን ኢሣይቅንቃን ታሕማስንዲ «ውቃን ይስኬንድ ካታምንዲ ዞላጋ ንያል ማጋም ጊጺ ይንጻንቅያን ይስኩዌ። ውቃን ይስኬንድ አሥንዲ ዶርጋ ኤዛ ጣጣር ካያን ይስኬንዴ። ኢሣይቅን ዴብም ጫድ ኒኒ ፒርቃን ኢባሪ ኒሕ ዎጢ ውርስንሴንዳ ጊዝዎ!» ማኬንድ።

ካሲ ኢሣይቅንቃን ናማስንዳ ያሱዋ፥ ካሌባይ «ካናአንቃን ይስኬንድ አሥንዲ ጳድ ካያ ዞላስንዳ ፔቱⶢ ኢባራ ጊዝዎ። ይ ፔታስን ዬሮሥንዲ ኒሕም ጫድንሱዌ፤ ኒኒንድ ኢሣይቅን ጋምሢ ዶዱቃን እያርድኒኑዌ፣» ማኬንድ።

ኢስራኤል አሥንዲ ካሌባ፥ ያሱዋይ ሀይጡⶢስ ሲሳሽድኒ ኢቼንዴ። ሙሴያ፥ አሮና ዴብም ያንቂ ባጪ ይስቲ «ሀሬሽናን ኢታጋ ዶዳ ሀⶥን ኑ ኤቲ ዬአዴዎ? ማይት ጫዳም ሀይቃ ኑ ውርን ኑ ማይና ኑ ንያእንዳይ ቃም አቲ ጎስቴሽን ጊብጽቃን ኑና ይስታሳን ኑም ሶያ ጊዝዎ!» ማኬንድ። ኡⶣም አሥንዲ ዶንቲ ጊብጽቃን ባ ካርሲ ኤቲ ሀምሱⶥ ኡካሪስ ኩርስኒ ኮዬንዴ።

ጋሀ ኡⶥ ናባም ዬሪ ቃጽ ያንቂ ድያም ዱካም ኬትን ዬኡ። ይሲንድ «ይንታይቅኒ ታ ዴብም ጌጺ ጊባትናሺድኒ ኢቼንዳጊ ዶዳ ኮላ ሀⶥን ኢራትኒ ዡልንሴንዴ። ያሱዋ፥ ካሌባ ዬቻም 20 ቤርግ ቤሴብዳ፥ ኡⶣም ዝያጽ ኢሣይቅን ቤርጊ ይስኬንዳይ ባ ካንግ ሀⶥን ሀይቂ ውርንሴዴ፤ ታሥ ታ ኡሤን ዶዱቃኒንድ እያርድንሳርጌንዴ» ማኪ ሀይጡ።

ኢስራኤል አሥንዲ ጋሀ ኡⶢስ ባ ሲስኩⶣም ጩቡ ባ ቃይጹⶢስ ኤርንሲ አይኔንዴ። ባ ማይት ቂጽ ኤቲ ካናአን አሥንዳ ባና ጫድኒ ዶንቲ ሀንቄንድ። ሙሴይ ዬሪ ኢሣይቅና ባና ሀማርጉዌሽን ጫድቃን ሀማሺድንንዴ ማኪ ኢሣይቅን ኬንዛሱ። ኢሣይቅኒንድ ሙሴ ሀይጢስ ሲሳሽድኒ ኢችንሲ ሀንቄንዴ።

ዬሪ ኢሣይቅና ባና ጫድቃን ሀማርጉዌ፤ ኡⶤሽን ጋምጢ ብያርስኪ ኢሣይቅንቃን ⶦዳስንዲ ሀይቄንዴ። ኡⶣም ኢስራኤል አሥንዲ ካርቲ ዶዳ ኮልን ዬኢ 40 ቤርግ ኢራትኒ ዡሌንዴ።

ኢስራኤል አሥንዲ ዶዳ ኮልን ይስቱⶣም ዬሪ 40 ቤርግ ኢሣይቅን ሙሱ። ሀይቅን ጫርቃን ይሢ «ማና» ማስቲ ይስኩⶥ ቡዲስ ኢሣይቅኔሽን ኡሡዌ። ካሲ አⶪስ ኢሣይቅኒ ሙእንሱዌሽን ድርጭት ማስቲ ይስኬንድ አኩባይንዲስ ኢሣይቅን ጋፕካን ቲሡዌ። ኡⶣጋ አባሚንድ ዬሮሥንዲ ኢሣይቅን ሲማራ፥ ጫማይ ባህኒ ሀርጭንሳርጉዌሽን ይሡዌ።

ካሲ ዬሮሥንዲ አሥ ዲሢ ይስኩⶥ ቦዳም ንያልቃን ይሢ ሶእስ ኬሲ ኢሣይቅን ኡⶣሹዌ። ኡⶢ ካንግ ኤስ ይሢ ይስትን ኢስራኤል አሥንዲ ሙሴያ፥ ዬራጋ ዴብም ዚሚ ባጪ ይስቴንዴ። ይ ፔታስን ዬሪ አብርሃማ፥ ይስሀቃ፥ ያይቆባዬሽና ባ ታሥ ኡሡ ጋሄሽን ጊባታስናንቂ ይስኩⶥ ካሐ ጊዝዎ።

ዱማርሳጋ አባም ሶኢ ካሲ ባኡዌ። ዬሪ ሙሴሽን፣ «ንያል ጫሬሽን ሀይጣኔን ሶኢ ይቃን ይስቲ ኬስንሱዌ» ማኪ ሀይጡ። ኡⶣም ሙሴይ ንያል ጫሬሽን ኖናም ባ ሀይጥንሱ ሺችንሲ ቤዣም ናም ካርሲ ዴክኒ አሣጋ አፕም ዬራጋ ሀይጢስ ቃላሱዌ። አሣ ኢሣይቅን ጊዝንዳይ ሶአ ኡⶢስ ኡⶥኮዳ፣ ዬሪ ሙሴ ዴብም ያንቂ ባጪ «ኔኒንድታሥ ታ ኡሤን ዶድቃን እያርድንሳርኔኑዌ!» ማኩዌ።

ኢስራኤል አሥንዲ 40 ቤርግ ዶዳ ኮልን ባ ኢራትና ዡሉ ጌሽን ዬራጋ ዴብም ጌጼንዲ ባ ካንግ ሀይቄንዴ። ኡⶥ ጌሽን ዬሪ አሢስ ዶዱ ኬምም ኤቲ ዬኡ። ኡⶣጋ አባም ሙሴይ ቃጽ ኤርጋንቂ ይስቱዌ። ይስን ጋሥኒ ኢስራኤል አሥንዲስ ይሲ ቤስንሱዌሽን ያሱይስ ዬሪ ኩርሱ። ካሲ ዬሮሥንዲ ማጥን ጎቅን ሙሴ ሀርኩⶥ ኮናሲ ቲሥንባኑⶢስ ሙሴሽን ታሥ ኡሢ ሀይጡዌ።

ኡⶣጋ ጌሽን ዬሮሥንዲ ሙሴይ ዶዱ ካንግ ትያፓሲ ይ ቤቅንሱዌሽን ሀይቅን ጉዳጋ ባስን ኬሶ ማኪ ይስን ሀይጡ። ኡⶣም ሙሴይ ዶዱይስ ቤቁ፤ ይሲ ውቃን እያርድንሱⶢስ ዬሪ ⶡናርጉ ይ ናጉዌ። ኩሣ ኡⶥን ሙሴይ ሀይቁ። ኢስራኤል አሥንዲ ካስታሞይን (ማት እያርፕ) ይ ዬኬንዴ። ያሱይ ኢስራኤል አሥንድ ኡካራ ቤሳጉⶥ አቱ። ያሱይ ዬራም ጊባትና ዬራጋ ቲዛዝ ባቃ ባ ይስቱዌሽን ሶያጋ ኡካር ፔቱዌ።