9. ሳዓቢ ሙሳም ኤዔልስምሽ

ዬሶፕ ዴእሳኬት ቡዑር ሱሴንክት ሙዳ ግብጽግር ዶዖቕሴኬ፤ ኬቴሬ ካዓሥንኬቴሬ ቤድሚ ቦንካን ዋዓር ዶዖቕሴኬ፤ ቤድሚ ይንሤሬ ኣእሴኬ ኬዔሜሬ እስራኤሌ ጋዓርሴ።

ቤድሚ ማቶ ቦንት ቡዑር እስራኤል ኤዔድና ቤዳሮ ካዬኬ፤ ግብጽ ኤዔድኔሬ ዬሶፓምኬ ኬዔምክ ክ ኬልሽዳቓኬታም ሙዳ ዋልሴኬ እስራኤል ኤዔድንት ቤድንትንዛንክ ዻዓምሳቕንዳ ግብጽ ኤዔድና ኬካን ጳሼኬ፤ ካንካን ኮዖ ሴጽንግር ግብጽ ኤዔድናም ጌሥዜን ዶዖቕዳብን ፓርኦን እስራኤልናም ግብጽ ኤዔድንቴን ፕክሽዴድ ኬዔም ማዓስሴ።

ግብጽ ኤዔድና እስራኤል ኤዔድናም ኬዔልቲ ኣክሼርድንዳ ኤያ ኬ እክቴምሽ ካትሜን ሙዳም ኬ እክቴምሽ ማዓስንትክ ዛምክ ኬ ዎዖንቴምሽ ካሌርስዳቔኬ፤ ዴዔጽዳክ ዎዖንና ዶዖቕንትኬታም ካሌርስድንዳ ማዓሤ፤ ሳዓቢ ዳይንክ ኬዔም ኣንጄ ቤድሚ ይንሤሬ ኣእሴኬ።

ፓርኦኔሬ እስራኤል ኤዔድንት ቤድሚ ይንሢ ቶክማይሴድ ዶዖቕድምሽ ሼጄ፤ ካንካን ፓርኦን ኬት ኣንግ ይንሢ ኣዼርስንክ ኣባይ ኖቔንግር ዣቕንትክ ኬዔም ዴይሴርቴምሽ ዛፕስትዮ ኬዔዜ።

እስራኤል ኤዔድንግራንክ ማዓ ዎላቔንዳ ኣንግ ይንሢ ኣጼ፤ ኮዖኬ ክእስክ ዪን ማዓድንዴትክ ዬካ ይንሥስናም ኣዓቼኬ።

ይንሥስንት ኣጼድና ይንሥስናም ኣዓችንትካን ኬዔን ማዓትካኬንክ ይንሥስናም ኖቓ ጼዔርዜን ካይድንዳ ዳቼግር ዎድቶ ኣባይ ኖቔንት ሼዔጌር ዶዖቕዳክ ሱጽርንግር ኪም ዴይስራይምሽ ዻቕሽካን ኖቔንት ዜን ኪም ጋርሼኬ፤ እናንክት ቶይድቴኔሬ ክ ማዓዳኬታም ሼድንትካን ኡሤክ ኪም ሼዳቔ።

ፓርኦንት ማዓ ይንሢ ዳቼናም ይ ሃዓፕታኬንክ ዋዓር ዶዖቕዳብናም ሼጄ፤ ይንሥስናሜሬ ይንት ይንሥምሽ ማዓስሶ ኪም ቴዬ፤ ናዓሬ ይንሥስናም ዪን ጋጵሽድንዳ እስራኤል ኤዔድንግራንክ ባዛ ካሽዮ ጋጵሽንትካን ኤዔድምሴ፤ ዪም ኤዔድምሴርሳቓክ ኤዔቴን ይንሥስስንት እንዴን ማዓትንትንኮታም ኤስክ ሃዓቔ፤ ይንሥስኔሬ ክ ጋጵሳኬንኬ ኣሚ ጋእ ክ ጋርሻኬንክ ኤዔቴን ፓርኦንት እኔንዳ ኪም ማዓስሴ ናዓምንክታሜሬ «ሙሳ» ጋይሶ ዎጄኬ።

ሴጻ ዎላቕ ሙሳ ይ ጋጵሳኬንክ ግብጽ ኤዔድ ዎላቕባብ እስራኤል ኤዔድ ዎላቕባባም ክ ግእድክ ኪም ሼጄ ሙሴሬ ይንት ኤዔዴስን እስራኤል ኤዔሥናም ዻቕሽካን ጴጼ።

ሙሳ ሃይዬሬ ዪም ሼዳይንዳ ኪን ካምስክ ግብጽ ኤዔሥናም ዴይሶ ኪም ዴዑክሴ፤ ዳይንኬሬ ሙሳ ዬእሳቓኬታም ኤዔድ ዎላቕባብ ኪም ሼድታ ሃዓቔ።

ሙሳ ዬእሳቓኬታም ፓርኦን ይ ኤሴርታኬንክ ኪም ዴይስካን ጶቕሼ፤ ሙሳ ዳይንክ ፓርኦንት ፖሊስንዳክ ይካሣም ዻቕሽካን ግብጽግራንክ ፔጫ ጉርንግር ሃስትዮ ካዬ።

ግብጽግራንክ ፔጋ ማዓድንዳ ፔጫ ጉርንግር ሙሳ ቖሊ ግሽዳብ ማዓሤ፤ ፔጬን ኮዖግራንኬሬ ማዓ ቴዮ ቓስቴን ኣንግ ይንሢ ኣእሴ።

ሴጻ ዎላቕ ሙሳ ቖልናም ግሻሮ ክ ዳይክ ኖዖ ዋዓርንት ሮጵድንዳ ትርሻ ሼጄ፤ ዳዓኖንምሺ ትርሼና ኣትክዬ፤ ሙሴሬ ላቕምስትዮ ሼድንትካን ትርሼንት ሼዔጌር ኡሣ ሃዓዴ፤ ክ ኡሥድንክ ሳዓብት ኡፕሲ «ዬ ሙሶ ፔጫ ጪልንዴት ዜን ሃ ዎእሳቕንካን ዱዑትግራንታንክ ኮጴናም ዉሥካ» ኪን ጋይሴ።

ሳዓቤሬ ኮይን ጋይሴ፤ «ኤዔድእስቴት ካልርናም እ ሼጃቕንካን ፓርኦንዳ ሃዓም ኦይድቴ እስራኤል ኤዔድናሜሬ ግብጽት ሃይልስንግራንክ ባዛ ካይሳ ኬዔም ዉሥዳዬ፤ ኣብራምካን፥ ይሳቕካንኬ ያይቖብካንክ እ ኬዔዛቓክ ጉሜር ፔጭን ካናኣናም ኬዔን እምድቴ።

ኤዔድና ሃይ ሃዓም ኦይሤ ጋይሶ ኢም ኬ ጎይስንክ ሃሪ ኬዔን ጋዓዴ? ጋይንትክ ሳዓባም ጎይሴ፤ ሳዓቤሬ ሙሴን «እታ ዶዖቕዳቓብኬ ኮዛንክ ኦሴሬ ዶዖቕዳብቴ፤ ካንካን ኖዖ ኢም ኦይሣቔ ጋይሳዮ ኬዔን ኬዔስካ» ኪን ጋይሴ።

ሙሳ ይ ጳሽንካን ፓርኦንዳ ካይካን ዝግክዬ፤ ሃራካኔ ጋዓርስንክ ኬዔዛም ኤሳይቴ ጋይሶ ይ ጶቕሽንካን ሃዓቔ፤ ካንካን ሳዓቢ ሙሴት እንዴፕስ ኣሮናም ክ ኪክን ክ ካይቴምሽኬ ሙሳሜሬ ክ ኬልሽቴምሽክ ኪም ኦይሤ፤ ሳዓቢ ሙሳምኬ ኣሮናምክ ፓርኦን ኤዔድናም ጋራይቴ ጋይንትክ ቡዑድንታም ክ ዛፕስድምሽ ኬዔን ጶቕሽሽንትክ ኬዔዜ።