10. ታማ ሳዓብት ጋዓምና

ሙሴኬ ኣሮንክ ፓርኦንዳ ካዬኬ፤ «እስራኤልት ሳዓብስን ኤዔድእስታም ጋርካ» ሃዓን ጋዓዴ ኪን ጋይሴኬ፤ ፓርኦን ኬራ ኤሴርክዬ እስራኤል ኤዔድናም ባዛ ካይሳ ኬ ዉትዳኬት ኦዖላይሲ ብሬንዛንክ ጋዓጽድንዳ ዎዖኒ ኬ ዎዖንቴምሽ ካሌርሴ።

ፓርኦን ኤዔድናም ጋራይቴ ይ ጋዓዳኬትዜን ዛብዝዮ ኔጌ፤ ካንካን ሳዓቢ ግብጽ ኤዔድንዜን ታማ ካርክ ጋዓምይንታም ኦይሤ፤ ሳዓቢ ኬዔና ጋዓምንጎክ ፓርኦንቴኬ ግብጽ ኤዔድንት ጾይስን ሙዴዛንክ ዛምባብ ማዓትንትይንታም ፓርኦንካን ዻዉስሴ።

ሳዓቢ ኣባይ ኖቔናም ዞምእምሽ ማዓስሶ ኦዖክሴ፤ ዳይንኬሬ ፓርኦን ታዓሬ እስራኤል ኤዔድናም ጋርክዬ።

ሳዓቢ ፔጬን ሙዴዜን ፓንቓም ኦይሤ፤ ፓርኦን ሙሴን ፓንቔናም ክ ፔግምስቴምሽ ኪም ምክሴ፤ ማዓታኖንምሺ ፓንቔና ሙዳ ዴእሴኬ፤ ፓርኦን ቡዑዴይንታም ዛፕስንትክ እስራኤል ኤዔድን ግብጽ ፔጭግራንክ ኬ ዉትቴምሽ ኬዔም ጋርክዬ።

ካንካን ሳዓቢ ግምዛም ኦይሤ፤ ኮዖዛንኬሬ ሱንግላም ኦይሤ፤ ፓርኦን ሙሳምኬ ኣሮናምክ ኤዔልቴዳቦ ኬዔና ጋዓምናም ዬ ሜርስንክ እስራኤል ኤዔድን ግብጽግራንክ ዉትንቲ ኬዔን ማዓድምሽ ኬዔዜ፤ ሙሳ ምክሳኬንክ ሳዓቢ ሱንግሌናም ሙዳ ግብጽግራንክ ሜርሴ፤ ዳይንኬሬ ፓርኦን ቡዑዴይንታም ዛፕስንትክ ኤዔድናም ጋርክዬ።

ኣልክምሲ ሳዓቢ ግብጽ ኤዔድንት ቖልሜና ሙዳ ሃዤርሽዮ ኬ ዴእቴምሽ ማዓስሴ፤ ዳይንኬሬ ፓርኦንት ቡዑዴና ዛብዝንካን እስራኤል ኤዔድናም ጋርክዬ።

ኮዖዛንኬሬ ሳዓቢ ፓርኦንት ብሬዜን ብንዲ ርኬዜን ክ ኮፕቴምሽ ሙሴን ኬዔዜ፤ ብንድናሜሬ ክ ኮፕሳኬንክ ግብጽ ኤዔድንዜን ሴዔቕስድንዳ ዲድ ማዓሤ፤ እስራኤል ኤዔድንዜን ዳይንክ ዲድና ዉትክዬ፤ ሳዓቢ ፓርኦንት ቡዑዴናም ክ ዛፕስንካን ፓርኦን ኤዔድናም ጋርክዬ።

ኮዖት ቡዑር ሳዓቢ ግብጽግር ዶዖቕዳክ ባቕላም ሙዳ ካይስድንዴትኬ ኤዬግራንክ ማዓል ሃዓቓብ ኤዔዳም ዴይስድንዳ ኣዚ ኦይሤ፤ ፓርኦን ሙሳምኬ ኣሮናምክ ኤዔልትዮ «ዳቔልስትቴ ካይንቲ ዬዔን ማማዓዴ» ጋይሶ ኬዔን ኬዔዜ፤ ካንካን ሙሳ ሳዓባም ምክሴ፤ ኣዝኔሬ ርኬግራንክ ቓንንትን ጋርሼ።

ዳይንኬሬ ኣልክምሲ ዳቔልሲ ዎዖንሴ፤ ቡዑዴይንታሜሬ ዛፕሴ፤ እስራኤል ኤዔድናም ጋርክዬ።

ካንካን ሳዓቢ ግብጽዜን ኤይኪ ኤዔሌኬናም ታዓዴ፤ ኬዔና ኤይክና ኣዝን ካይሳቓክ እስንን ሙዳም እሤ።

ኮዖዛንኬሬ ሳዓቢ ሴጻ ማኬንካን ዶዖቕድንዳ ዹማም ኦይሤ፤ ግብጽ ኤዔድና ኤዔርንታንክ ኬ ዉታክንዴትክ ዬካ ጋእሻ ዹምታ ሃዓቔ፤ እስራኤል ኤዔድን ዶዖቕዳክ ካርና ዳይንክ ሻዓክሚ ሃዓቔ።

ኬዔና ዎልቓንታሜርስ ሳዓብት ጋዓምንት ቡዑር ዳይንኬሴሬ ፓርኦን ታዓሬ እስራኤል ኤዔድናም ጋይራቴ ጋይሴ፤ ፓርኦን ኤሴራይንካን ሳዓቢ ሬይ ዎላቕ ማቕንቴንዳ ጋዓሚ ኦይትንትካን ጶቕሼ፤ ኮዖና ፓርኦንት ጶቕሽናም ኦዖኮክዴ።