8. ሳዓቢ ዬሶፓምኬ ኤዔር ኤዔድንክታምክ ዻቕሼ

ባዓቤንኬት ያይቖብ ዬሶፓም እንዴፕስኬስ ሙዴግራንክ ጋዓጺ ኪም ክ ናሽዳቕንካን ጋዓኔኬት ይ ማዓድምሽ ሃዓሜትክ ክ ሼጃቕንካን ዬሶፕት እንዴፕስኬስ ኪም ይዤኬ ዬሶፔሬ እንዴፕስኬስዳ ክ ሃዓዳኬንክ ኪም ዬቴኮ ኤዔዳም ዛላካን ሼንዴድንቴን ኪ ሼንሼኬ።

ቤድሚ ቦንት ቡዑር ያይቖብ ይ ጋልቴርሳኬንክ ቖልሜንክታም ግሽዴድን እንዴፕስኬስ ሃስን ኬ ዳይንኬሬ ኬዔም ክ ሼድቴምሽ ይ ናሽዳብን ይንሥስይንት ዬሶፓም ኬራ ኦይሤ

ዬሶፕት እንዴፕስኬስ ኤዔር ኬ ሃዓድካኬት ብሬዜን ዬሶፕት ኣብሌናም ሃእሴኮ ዴርትት ዞምእክ ሳይሴኬ፤ ኮዖዛንኬሬ ዞምእክ ሙልክምሳቓክ ዬሶፕት ኣብሌናም ባዓቤኔን ዻዉሴኬ፤ ኖዖሬ ዴቢ ቖሤግራማ ኪም ዴይሳቔ ጋይሶ ጶቕሽንትክ ጋእሻ ኣቴርሴ።

ዛላ ዛልዴድና ዬሶፓም ግብጽግር ኪም ቴይ ካዬኬ፤ ኮዖ ሴጽንክ ግብጽ ፔጭና ኣባይ ኖቔንት ሼዔጌር ዳይንዳ ጋእሼንዳ ፔጫ ሃዓቔ፤ ኤዔዳም ዛላ ዛልዴድኔሬ ዬሶፓም ኤዔዴን ፕክሽዳብ ማዓስሶ ዎድምቴባብ ፔጬን ጌሥዳስንት ጋዓኔስኔን ኪም ሼንሼኬ፤ ዬሶፔሬ ባዓቤስይንቴን ላቕምስትዮ ፕክሽዳቔ፤ ሳዓቤሬ ዬሶፓም ኣንጄ፤፤

ባዓቤስንክቴት ማይን ዬሶፕ ይንክ ራዓቴምሽ ኪም ካሌርሴ፤ ዬሶፕ ዳይንክ ሳዓብት ቤሬዜን ዳቔልሲ ዎዖናይቴ ጋይንትክ ኮዖን ኤዔእክዬ፤ ናዓሬ ክዜን ይ ምዼርስንካን ታውክ ኪም ኮ ጻዓጽክ ዬድትዮ ኪም ዻኬርሴ፤ ዻክሪ ኤይንግር ዳይንኬሬ ሳዓብካን ይዜን ቡዑድ እዜርቴባብ ክ ማዓሥንካን ሳዓቢ ኪም ኣንጄ፤፤

ሃስን ዳይንኬሬ ዬሶፕ ጪልባብ ክ ማዓድንኬሴሬ ቦን ቓስቴን ማዓሥቴንክ ዬካ ዻክሪ ኤይንግር ሃዓቔ፤ ሴጻ ዎላቕ ግብጽ ኤዔድና <ባዓብስዎንቴ> ኬ ጋዓዳብን ፓርኦን ጋእሻ ዪም ሪርሽዴድ ሃዓሜት ቓስቴን ሼጄ፤ ባዓብስናም ኣዓችዴድንግራንክ ዎላቓቤሴሬ ሃዓሜትንት ቡልናም ኪን ኬዔስካን ኬዔን ማዓትክዬ

ሳዓቢ ዬሶፕካን ሃዓሜት ክ ቡልቴምሽ ኪም ማዓስታ ሃዓቔ፤ ካንካን ፓርኦን ዬሶፓም ዻክሪ ኤይንግራንክ ይራ ኪም ታዓሥሴ፤ ኖዖሬ ሃዓሜትናም ኪን ቡልንትክ ኮይን ጋይሴ፤ «ሳዓቢ ታብዛ ምሺ ቦናም ታዓድዴ ኮዖዛንኬሬ ታብዛ ዳዓቒ ቦን ማዓዴ» ጋይሴ፤፤

ፓርኦኔሬ ዬሶፕጎክ ጋእሻ ሪርሴ፤ ግብጽ ፔጭን ሙዴዜን ይዛንክ ቓስትምሲ ጋዓንምይንት ዶዖቕዳብ ኪም ማዓስንትክ ኪም ዎጄ፤፤

ዬሶፔሬ ኤዔድና ታብዛ ምሺ ቦንንግር ቤድሚ እስን ኬ ሱዽቴምሽ ኬዔን ኬዔዜ፤ ታብዛ ዳዓቒ ቦንን ዣእሻኬንክ ዬሶፕ ሪቔንግራንክ ኤዔድኔን እስን ክ ሼንድንካን ጋእሻ እሤርድንዳ እሥሚ ሃዓፕዳቔኬ፤፤

ዳዓቕንት ቤድንትና ግብጽግር ዬሌክ ማዓትክዳይክ ያይቖብኬ ኤዔር ኤዔድንክት ዶዖቕዳክ ፔጬን ካናኣንግር ካንክ ሃዓቔ፤፤

ያይቖብ ይንሥይንት እስን ኬ ሼንቴምሽ ግብጽግር ኬዔም ኦይሤ፤ ዬሶፕ እንዴፕስኬስ እስን ሼንካን ሃዓዴኮ ብሬዜንክት ኬ ዎእሳክ ሴጽንክ ዬሶፕ ማዓትንትንክታም ጶቕሻቔኬ፤ ዬሶፕ ዳይንክ ኬዔም ኤስቴ፤፤

ዬሶፕ እንዴፕስኬሳም ይ ጴጻኬት ቡዑር ኬዔን ኤስምታ ዳይንክ ሼድንካን ኮይን ኬዔን ጋይሴ፤ «ሃይ ጳሽኬቴ እታ ዬንዴፕስ ዬሶፕቴ ኤዔዴን እ ፕክሽቴምሽ ኢም ዬ ሼንድንክ ዳቔልሚ እዜን ጶቕሽቴቴ ዳይንኬሬ ሳዓቢ ዳቕልናም ላቕምካን ማዓስሳቔ፤ ሃዓዴቶ ግብጽ ፔጭግር ዶዖቕኬቴ እቴሬ ዬዔኔንኬ ኤዔር ኤዔድዬንቴንክ ዬዔም ዝክስዳክ ሙዳም እምምድቴ።

ዬሶፕት እንዴፕስኬስ ፔጬግርንት ማዓቴኮ ዬሶፕ ኣዓፔክ ዶዖቕንትንክታም ባዓቤን ያይቖቤን ኬ ኬዔዛክ ሴጽንክ ኖዖ ጋእሻ ጉሜርሴ።

ሃስን ዳይንኬሬ ያይቖብ ይ ጋልቴርስንኬሴ ኤዔር ኤዔድይንት ሙዳ ኪክን ግብጽግር ካዮ ዋዓር ዶዖቕሴኬ፤ ያይቖብ ይ ዴእካኬት ብሬዜን ይንሥይንት ሙዳም ኣንጄ፤፤

ሳዓቢ ኣብራምካን ይ ጫዓቕሻቓክ ጉሜርናም ይሳቕዜን ዣእሼ፤ ኮዖዛንኬሬ ያይቖብዜን፥ ኣልክምሴሬ ታሜኬ ቓስቴንን ያይቖብት ይንሥንኬ ኤዔር ኤዔድንኬቴንክ ዣእሼ፤ ታሜኬ ቓስቴን ይንሥና ካዓሥንኬት ታሜኬ ቓስቴን እስራኤል ኤዔድንት ማታ ሱስ ማዓሤኬ።