7. ሳዓቢ ያይቖባም ኣንጅምሽ

ይንሥስኔሬ ጋጵስምሽ ያይቖብ እንዴን ኪክን ኤዔር ዶዖቕንታም ናሽዳቔ፤ ኤዔሳ ዳይንክ ዴቢ ማንጋ ናሽዳቔ፤ ርብቓ ያይቖባም ኮ ናሽድክ ይሳቕ ዳይንክ ኤዔሳም ናሽዳቔ።

ሴጼግራንክ ዎላቕማት ኤዔሳ ዴቢ ማንጋግራንክ ማዓትዮ ክ ሃዓድንክ ጋእሻ ዳቔርታ ሃዓቔ፤ ኤዔሳሬ ያይቖቤን «ዋዓዴ ሃ ኡሻቓክ እሥምንግራንክ ቶክሚ ኢን እምካ» ኪን ጋይሴ፤ ያይቖቤሬ ብሬዜን ሃንት ቶይድምናም ኢን እምካ ኪን ጋይሴ፤ ካንካን ኤዔሳ ቶይድምይንቴት ጋዓንምናም ያይቖቤን እምሴ፤ ኮዖዛንኬሬ ያይቖብ ይ ኡሻቓክ እሥምንግራንክ ኪን እምሴ።

ይሳቕ ኣንጄትናም ያይቖብካን እምካን ዝግዜ፤ ዳይንኬሬ ኮዖም ይ ዎዖንካኬት ብሬዜን ርብቓኬ ያይቖብክ ይሳቓም ጌሽሼኬ፤ ያይቖብ ኤዔሳም ካምሶ ይሳቕዳ ኡሥምቴ፤ ይሳቕ ጋልቴርታ ክ ሃዓቕንካን ኣዓፕክት ሼዳይ ሃዓቔ፤ ካንካን ያይቖብ ኤዔሳት ኣብላም ቖቤርቶ ዴርትቴሬ ጉፕታም ባዓርግርንትኬ ኣዓንዜይንቴክ ዻክቶ ይሳቕዳ ኡሥምንትክ ኪም ጌሽሼ።

ያይቖብ ኤዔሳዳ ሃዓዶ ኮይን ኪን ጋይሴ፤ «እታ ኤዔሳ ሃዓድትቴ ኢም ኣንጅካን ሃዓን ማማዓዴ» ጋይሴ፤ ይሳቕ ዴርትንት ጉፕቴናም ሃዓጾ ሼጆ ኣብሌንክታሜሬ ዎሽሾ ኤዔሳ ማዓሥምሽ ጶቕሽንትክ ኪም ኣንጄ።

ያይቖብ ቶይድምንት ጋዓንምናምኬ ኣንጄትናምክ ጌሽሽዮ ክራንክ ክ ቴይንካን ኤዔሳ ያይቖባም ይዤ፤ ባዓቤንኬት ክ ዴእሳኬት ቡዑር ኪም ዴይስካኔሬ ጶቕሼ።

ዳይንኬሬ ርብቓ ኤዔሳት ጶቕሽናም ኤሴርቴ፤ ካንካን ኮዖኬ ይሳቕክ ሱሴይንቴዳ ክ ዶዖቓን ፔጋ ፔጭግር ያይቖባም ኦይሤኬ።

ያይቖቤሬ ቤድሚ ቦንካን ርብቓት ሱሴን ኪክን ዶዖቕሴ፤ ኮዖ ሴጽንግር ማዓ ቴይሶ ታሜኬ ቓስቴን ኣንግ ይንሥኬ ዎላቕ ማይንሥክ ኣእሴ፤ ሳዓቤሬ ኪም ጋእሻ ዎድምስሴ።

ካናኣን ፔጭግር ክ ዶዖቕሳቓክ ቦንዳ ቦንት ቡዑር ያይቖብ ይንት ኤዔር ኤዔድንኬ ክት ፕክሽዴድንክ ቖልሜይንት ሙዴን ኪክን ካናኣን ፔጭግር ማዓትንትካን ጶቕሼ።

ኤዔሳ ታዓሬ ኢም ዴይስካን ጶጶቕሽዳ ዳዓቴሬ ጋይሶ ቡዑዴግርንት ይ ጶቕሽንካን ጳሼ፤ ኮዖካኔሬ ቤድሚ ቖልማም እማ ኪን ማዓቴምሽ ኤዔሳካን ኦይሤ፤ ቖልሜናም ክራ ቤይዴድ ያይቖብት ፕክሽዴድን ኤዔሳሬን «ሃንት ፕክሽዳብን ያይቖብ ኬዔና ቖልሜናም ሃዓን ኦይሣቔ ኖዖሬ ኡሣ ሃዓዳዴ» ኪን ጋይሴኬ።

ኤዔሳ ዳይንክ ብሬዜኔሬ ያይቖቤን ኔጋኔ ጋዓታ ክ ማዓሥንካን ክራ ማሽምካን ጉሜርዳቔ፤ ያይቖብ ካናኣን ፔጭግር ላቕምክ ዶዖቕሳቔ፤ ኮዖዛንኬሬ ይሳቕ ዴእሴ፤ ያይቖብኬ ኤዔሳክ ኪም ዱዑክሴኬ፤ ሳዓቢ ኣብራምካን ክ ጫዓቕሻቓክ ጉሜር ኡፕስና ታ ይሳቕዳንክ ያይቖቤን ዣእሼ።