5. ጉሜር ይንሥስና

ታማ ቦንት ቡዑር ኣብራምኬ ሶራክ ካናኣንግር ዣእሼኬ፤ ኮዖኬካ ይንሥኬት ዳክ ሃዓቔ፤ ካንካን ኣብራምት ማይን ሶራ ኮይን ኪን ግይሴ፤ «ሳዓቢ ይንሢ ኢን ክ ሜርስንካንኬ እቴሬ ጋልቴርቴንዳ እ ማዓሥንካን እስት ፕክሽዳክ ኣጋር ሃራ ኮናዬ ኮዖም ቴይካ ኢኔሬ ይንሢ ኮ ኣዻኔ» ኪን ጋይሴ።

ኮዖጎክ ኣብራም ኣጋራም ቴዬ፤ ኣጋሬሬ ኣንግ ይንሢ ኪን ኣጼ፤ ኣብራሜሬ «እስማኤል» ጋይሶ ናዓምክት ዎጄ፤ ዳዓኖንምሺ ሶራ ኣጋርዜን ኒቕምሴ፤ እስማኤል ታሜኬ ማኬን ቦንክት ማዓሥክ ሳዓቢ ኣብራሜን ኮይን ጋይሴ።

ሳዓቤሬ ኣብራሜን «እታ ሃሬሬ ኢም ባሻይባብ ሳዓብቴ፤ ሃ ኪክን ጫዓቓ ኣርድቴ» ኪን ጋይሴ ኣብራሜሬ ዎትንቴክ ፔጬዜን ቡኬልሴ፤ ሳዓቤሬ ኣብራሜን ኮይን ጋይሴ፤ «ሃዓና ቤድሚ ኤዔድንት ባዓቢ ማዓዳዬ፤ ካናኣን ፔጭን ሃካንኬ ካዓሥሃንትካንክ ዻዓልማ ሃዓሜንት ማዓስስቶ ዬዔን እምድቴ እቴሬ ሌፒ ሴጽካን ሳዓቤንት ማዓድቴ ሃዓኔሬ ኤዔር ኤዔድሃንትግር ዳዬድ ኣንግ ሙዴት ሾላም ቴችካ» ኪን ጋይሴ።

ሳዓቤሬ «ማይሃንት ሶራ ኣንግ ይንሢ ሃዓን ኣዽዴ ኖዖሬ ጉሜርን ይንክ ዶዖቕዳብን ማዓዴ ናዓምንክታም ይሳቔ ጋይሶ ዎጅታዬ፤ ጫዓቓእስታሜሬ ክ ኪክን ማዓስድቴ ኖዖሬ ዴዔጽምባብ ኤዔድ ማዓዴ፤ እስማኤላሜሬ ዴዔጽምባብ ኤዔድ ማዓስድቴ፤ ዳዓኖንምሺ ጫዓቓእስት ይሳቕ ኪክን ማዓዴ» ኪን ጋይሴ፤ ሳዓቤሬ ኣብራምት ናዓሚ «ኣብርሃም» ጋይሶ ኦዖክሴ ቡልንኮቴሬ «ቤድሜድንት ባዓቢ» ጋይንትዬ። ሳዓቢ ሶራቴሬ ናዓሚ ሳራ ጋይሶ ኦዖክሴ ቡልንኮቴሬ «ቤድሜድንት እንዲ» ጋይንትዬ።

ኮዖ ሴጼን ካንክ ኣብራም ኤዔርንት ዶዖቕዴድ ኣንግ ሙዴት ሾሌናም ቴቼ፤ ቦንት ቡዑር ኣብራምት ዎላቕ ማቶ ቦን ጾዖጽክ ሳራ ዎልቓንታሜርስ ታምኬ ዎልቓንታሜርስክ ቦንኮት ማዓሥክ ኣብራሜን ኣንግ ይንሢ ኪን ኣጼ ሳዓቤሬ ኬዔን ጋይስምሽ «ይሳቔ» ጋይሶ ናዓምክት ዎጄኬ።

ይሳቕ ማርድ ክ ማዓሣኬንክ ሳዓቢ ኣብራምት ቡዑድ እዝንትናም ኮይን ጋይንትክ ጴጼ፤ «ሃ ዪም ናሽዳብን ይንሥስሃንታም ጪልሽት እማ ማዓስሳዮ ኢን ኪም ቴችካ» ኪን ጋይሴ፤ ኣልክምሴሬ ኣብራም ሳዓብካን ኤዔእሶ ይንሥስናም እምካን ኡስሴ።

ኣብራምኬ ይሳቕክ ጪልሽት እማ ካርንዜን ሙክንቲ ኬ ዬዛኬንክ ይሳቕ ባዓቤኔን «ዬ እባቦ ጪልሽት እሜንካን ኦዖሴርድንዳ ሃዓቔና ኮናዬ ቖልስን ዳይንክ ሃብርክ ዳዬ?» ጋይሶ ኪም ጎይሴ፤ ባዓቤኔሬ ዬ ይንሥስእስቶ ጪልሽት እሜንት ቖልስናም ዳይንክ ሳዓቢ ኡሱስዴ» ጋይሶ ኪን ማዓስሴ።

ጪልሽት እሜን ካርንዜን ኬ ዣእሽምሽ ኣብራም ይንሥስን ይሳቓም ዻክቶ ጪልሽት እሜን ካርዜን ኪም ራዓሥሴ፤ ኣብራም ይንሥስናም ቴችካን ኣዓንይንታም ኦይሦ ሃልፔናም ቴዬ፤ ሳዓቢ ዳይንክ «ጋርካ ይንሥስንዜን ሬይ ዎላቕሴ ካልሚ ሃይ ዣእሽካ እካን ሃ ጳሽድምሽኬ ዎላቓብን ይንሥስሃንታም ክካን ኡቕምሳዮ ኪም ኢን ሃ ሜራቓኬታም ታ ኤስትቴ» ጋይሴ።

ሼዔጌርኬት ኡሣ ትርሼግር ዻኬርሳቓብ ቖሊ ሼጄ፤ ሳዓቢ ይሳቕ ካርግር ጪልሽት እሜንካን ማዓዳብ ቖሊ ኡስታ ሃዓቔ፤ ኣብራሜሬ ጉሜርክ ቖልስናም ጪልሽት እማ ካርንዜን ቴዮ ቴቼ።

ሳዓቢ ኣብራሜን ኮይን ጋይሴ፤ «ዎላቕባብ ይንሥስሃንታም ካንክ ኔክዳይክ ሃንት ዶዖቕዳክ ሙዳም ኢን እምንትካን ኤዔእቴባብ ሃ ማዓሥንካን ሃዓም ኣንጅካን ጫዓቓ ኣርድቴ፤ ካዓሥሃንት ርኬት ማንኬዛንክ ጋዓጽዮ ቤድሚ ማዓዴኬ; እካን ሃ ኤዔእሳቕንካን ፔጬዜናሜድ ኤዔድን ሙዳ ሃንክ ኣንጅምዴኬ።»