4 ሳዓብት ጫዓቓ ኡፕስን ኣብራም ኪክን

ካይስዳክ ኖቔንት ቤድሚ ቦንት ቡዑር ኤዔድና ኣልካ ፔጬት ዜን ቤዜኬ፤ ሙዴና ዎላቔንዳ ኣፓ ኣልቕዳቔ ሳዓቢ ዪን ኬዔዛቕምሽ ፔጬንክ ጾዖጽንት ኔግክ ኪክዜን ዎላቕ ማዓሦ ሱዽምንትክ ካትማ ኣክሼኬ።

ኬቴሬ ጋእሻ ጺልዴድኬ ሳዓቢ ዪን ኬዔዛቓኬትካን ይካሣም ጶያቔድ ሃዓቔኬ፤ ኮዖዛንኬሬ ርኬግር ዣእንትካን ሮዖትምንዳ ኤያ እክንቲ ዬዜኬ፤ ሳዓቤሬ ኬዔና ኤዔድን ዳቕልንዳ ሬያም ዎዖንንትንኬታምኬ ጋርክሶ ፕክሽንትኬታምክ ሼጄ፤

ካንካን ሳዓቢ ኣልቕንኬታም ቤድሚ ኣፓ ኣልቕድንዴትክ ኦዖክንትክ ኤዔድናም ፔጬት ዜን ሙዳም ኮፕትዮ ኦይሤ፤ ኣክሽካን ኬ ዬዛቓክ ካትሜንት ናዓሚ ባብሎን ጋዓርዴ ናዓምንት ቡልኔሬ ቡቕምቴንዴ ዋይ ኬ ጶቕሽድንዳ ይራንክ ካያቔድ ጋይንትዬ።

ዎላቕ ማቶ ቦንት ቡዑር ኣብራም ጋዓርዳብ ኤዔሥኔን ሳዓቢ ኮይን ጋይሴ፤ ፔጫሃንታምኬ ኤዔር ኤዔድሃንታምክ ጋርሻዮ እ ሃዓን ዻዉዳክ ፔጭንግር ካይካ፤ ኮዖግሬሬ ሃዓም ኣንጅድቴ ናዓምሃንታሜሬ ዴዔጽሚ ማዓስድቴ ሃዓም ኣንጅዳባም ኣንጃንጅድቴ ሃዓም ኣሽዳብናሜሬ ኣሻሽድቴ ሃዛንክ ዻዓምሳቕንዳ ፔጫዜናሜድ ኤዔድ ሙዳ ኣንጃንጅምዴኬ።

ኣብራሜሬ ሳዓብካን ኤዔእሴ ማይንት ሶራምኬ ይንት ፕክሽዴድ ሙዳምክ ቖልቴይንት ሙዳሜሬ ቴዮ ሳዓቢ ዪን ዻዉሳቓክ ካናኣን ፔጭግር ካዬ።

ኣብራም ካናኣን ፔጭግር ክ ዣእሻክ ሴጽንክ ኣዓቢ «ሼዔጋሃንቴክ ዶዖቕዳክ ሙዳም ሼትካ፤ ሃ ሼዳክ ፔጫ ሙዳም ሃዓኔንኬ ካዓሥሃንቴንክ ዻዓልማ ሃዓሜንት ማዓስስቶ ዬዔን እምድድቴ» ኪን ጋይሴ፤ ኣብራሜሬ ፔጬንዜን ዶዖቕሴ።

ሴጼግራንክ ዎላቕማት ኣብራም ማልክ ጻዴቕ ጋዓርዳብ ጋእሼባብ ሳዓብት ኤዔድናም ሳዓቢ ኪክን ቔዔሽምሽዳብስንዳ ማሽምሼ፤ ማልክ ጻዼቔሬ ኣብራማም ኣንጄ ኮይኔሬ ኪን ጋይሴ፤ «ርኬቴኬ ፔጬቴክ ባዓባ ዴዔጽምባብስን ሳዓቢ ኣብራማም ክ ኣንጃኔ» ኣብራሜሬ ማልክ ጻድቔን ይንት ዶዖቕዳክ ሙዴግራንክ ታሜንግራንክ ዎላቕ ኪን እምሴ።

ቤድሚ ቦን ማቕድንኬሴ ኣብራምኬ ማይንክት ሶራክ ታዓሬ ይንሥኬት ዳክዳይክ ዶዖቕዳቔኬ ሳዓቢ ኣብራሜን ኣልክምሲ ጉሜርናም ኪን ኬዔዜ ይንሢ ክ ኣእስድምሽኬ ካዓሥንክት ርኬዜናማክ ማንኬምሽ ኬ ቤድምሽ ኪን ኬዔዜ፤ ኣብራሜሬ ሳዓብት ጉሜር ኬዔስትንዜን ቡዑድ እዝንትንክትጎክ ጪልባብ ኪም ማዓሴርሴ።

ሳዓቢ ኣብራም ኪክን ጫዓቓ ኣርዜ፤ ጫዓቓ ቓስቴኔድ ኤዔድንት ሞልትግር ዎዖኔርድንዳ ኤዔድምት ጶቕሽዬ፤ ሳዓቤሬ ኣብራሜን «ሃንት ኮዖርግራንክ ይንሢ ሃዓን እምድቴ» ኪን ጋይሴ፤ «ሃንት ካዓሥንካኔሬ ካናኣን ፔጭናም ሃዓን እምድቴ።» ኣብራም ዳይንክ ኮዖ ሴጽንክ ይንሥክት ዳክዳይክ ዶዖቕዳቔ።