49. ክሌና ሳዓብት ጫዓቓ ኡፕስን

ዎላቕ ሳዓቢ ርኬግራንክ ዎዖንይንትካን ክ ኦይዳብስን ማራም ጋዓርድንዳ ሙናኣኬዳ ሳዓብት ይንሢ ኮ ኣዽምሽ ኮዖን ኬዔዜ፤ ካንካን ናዓ ኣኪ ሙናካማ ኮ ዳይክ ኣንግ ይንሥ ኣዽንትክ ናዓምክታም ዬሱሴ ጋይሶ ዎጄ፤ ካንካን ዬሱስ ሳዓቤሬ ኤዔዴሬ ማዓቴ።

ዬሱስ ሳዓቢ ማዓትንትንክታም ዶዖፕስስድንዳ ቤድሚ ክላ ሬያም ዎዖንቴ፤ ኖቔት ዜን ኡንግቴ ኖቔንት ዻዓምንትናም ጫምሲ ዬይቴ፤ ቤድሚ ሃዤርታ ኤዔድናም ሃልሽሽቴ ዥንናም ዉሥቴ ዴእታ ኤዔድናም ዱዑክግራንክ ዻዓስቴ፤ ኮይኔሬ ዶንቕ ባልሻምኬ ቓስቴን ቶይላምክ ዶንቕ ሺ ኤዔዛንክ ጋዓጽዴዳም ኬ ምሽቴምሽ ማዓስቴ።

ታዓሬ ዬሱስ ዴዔሥምባብ ኤስስዳቤ፤ ሳዓብት ይንሥ ይ ማዓሥንካኔሬ ጋዓንምክ ኬዔስቴ፤ ዬማታም ዬ ናሽድምሽ ኣቤድ ኤዔድናሜሬ ናሽኬቴ ጋይሶ ኤስስቴ።

ታዓሬ ኖዖ ቖልታዬንታም ዬ ናሽድምሽኬ ሬይ ሃሬናሜሬ ዬ ናሽድምሽክ ሳዓባም ናሽንት ዬዔም ዝክስዴ ጋትሶ ኤስስቴ።

ዬሱስ ሳዓብት ባዓምና ፔጬዜን ዶዖቕዳክ ሬይን ኔግክ ቦንችምታኣኬ ጋይሳቔ፤ ኤዔድ ሃይካኔሬ ጋእሻ ላቕሚ ማዓድንዳ ሬይና ሳዓብት ባዓንግራምባብ ማዓትንትዬ፤ ሳዓብት ባዓምንግር ኣርድንትካን ዳቔልስንግሬንታክ ዻቕንት ዬዔም ዝክስዴ።

ዬሱስ ዎላቕ ዎላቔድ ኤዔድናም ኪም ቴይዮ ኬ ዻቕድምሽ ኣቤድን ዳይንክ ኪም ኬ ቴይዳክምሽ ኤስሴ፤ ዎላቕ ዎላቔድና ላቕሚ ፔጬናም ካምዴኬ ጋይሴ፤ ዬሱስት ኬዔዜናም ዶዖፕስታቔድ ዻዻቕዴኬ፤ ኣቤድ ኤዔድና ሳዓብት ኡፕስና ጴዔታ ዋዓርንት ባቕላያክ ሃሬሬ __ኡዑሻያክ__ __ጎዖግት__ __ኣሥዜን__ ዋዓቻቓክ ላዓልዜናማክ ፔጬናምሼኬ፤ ኬዔና ኤዔድና ዬሱስጎካን ኬዔዜርዳክ ኬዔዜናም ቴያዬድኬ ሳዓብት ባዓምንግር ኣርዳዬዴኬ።

ዬሱስ ሳዓቢ ዳቔልሴድናም ጋእሻ ክ ናሽድምሽ ኤስሴ፤ ኔጋኔ ኬዔን ጋዓካንኬ ይንሥይንት ኬዔም ማዓስንትካን ዝዝግዴ።

ታዓሬ ዬሱስ ሳዓቢ ዳቔልሳም ክ ይዥድምሽ ዎዖን ኬዔስቴ፤ ኣዳምኬ ሄዋኔትክ ዳቔልሲ ኬ ዎዖንሳኬንክ ዳቔልሲ ካዓሥንኬት ሙዳም ካሌርሴ፤ ኮዖዛንክ ዻዓምሳቕንዳ ፔጬዜን ዶዖቕዳብ ኤዔድ ሙዳ ዳቔልሲ ዎዖንዴ፤ ሳዓብዳንኬሬ ፓዓሽምዴ፤ ካንካን ኤዔድ ሙዳ ሳዓባም ይዥዳብ ማዓቴ።

ዳይንኬሬ ክዜን ቡዑድ እዝዳብ ሙዳ ሌፒ ሴጽት ኡክኔክት ዶዖቕቴምሾኒ ክ ዴእታክምሽ ሳዓቢ ይንሥስይንት ዎላቓብናም ይ እምስቴንክ ዬካ ፔጫ ኮዛሜድናም ጉሪ ኮይን ናሻቔ።

ዳቔልስጎክ ባሥቴድ ዬ ማዓሥንካን ዴእንቲ ዬዔን ማዓዴ፤ ሳዓቢ ዬዜን ጋዓምንቲ ኪም ዝክስዳቔ፤ ዳይንኬሬ ዬዔም ጋዓምንትን ኦዖላይስ ዬሱሳም ጋዓምሴ፤ ዬሱስ ማስቔልዜን ክ ዴእሳክ ሴጽንክ ዬንት ቓእስርና ክዜን ዣእሼ።

ዬሱስ ዎላቔሴ ዳቔልሲ ዎዖንክዬ፤ ዳይንኬሬ ዬንት ዳቔልስናምኬ ፔጬዜን ዶዖቕዴድ ኤዔድን ሙዴት ዳቔልስናም ኔክሽንትካን ቓእስርናምኬ ጪልሽት እማ ማዓሦ ዴእንትናም እድዜ፤ ዬሱስ ይማታም ጪልሽት እማ ክ ማዓስስንካን ሳዓቢ ዳቔልሲ ሃምንኬኬሬ ኮ ዳቔልድንክ ኔጋኔ ጋይንቲ ኪን ማማዓዴ።

ላቕሚ ዎዖንዬንት ዬዔም ዻቕሽንት ኮዖን ማዓታዬ፤ ሳዓቢ ኪክን ዬ ማሽምቴምሽ ዎዖንንት ዬዔን ማዓድንዳ ሬይ ሃሬሬ ዳክዬ፤ ዬሱስ ዬሌክ ዳቔልስዬንታም ሽእንትካን ኪን ማዓዴ፤ ዬሱስ ሳዓብት ይንሢ ማዓትንትንክታም ዬንት ኦዖላይሲ ማስቔልዜን ዴእንትንክታም ሳዓቤሬ ዱዑክግራንክ ኪም ዻዓስስምሽ ዬሌክ ቡዑድ እዝንት ዬዔም ዝክስዴ።

ሳዓቢ ዬሱስዜን ቡዑድ እዝዳባምኬ ይንት ባዓባ ኪም ማዓስዳብን ኤዔድ ሃምንባባሜሬ ዻዻቕሽዴ፤ ዎድምቴድን ዋይ ቓምእን ኣንግ ዋይ ማዓ ጋልታ ዋይ ኣግልባብ ዋይ ሃብሪ ዬ ዶዖቕድንኬሬ ካልማዬ ሳዓቢ ዬ ኪክን ይ ማሽምቴምሽ ዬዔም ናናሽዴ፤ ዬሱስዜኔሬ ቡዑድ ዬ እዝቴምሼሬ ዝዝግዴ።

ዬሱስ ክዜን ቡዑድ ዬ እዝቴምሽኬ ካርቴንክ ዬ ሽኤርቴምሽክ ዬዔም ኤዔሌልዴ፤ ዬሱስ ሳዓቢ ዪም ሳይሳቓብን ኖዖ ዬሌክ ሳዓብት ይንሥስን ማዓትንትንክታም ቡዑድ እዝዴቶ? ዳቔልሴድ ማዓይንትዬንታምኬ ሳዓቢ ዬዔም ክ ቓእስድንክ ኡዝሜንዳ ማዓትንትናም ዶዖፕስዴቶ? ዬሱስ ዳቔልስዬንታም ኔክሽካን ማስቔልዜን ዴእንትንክታም ዶዖፕስዴቶ?

ዬሱስዜንኬ ኖዖ ዬካን ክ ዎዖንሳቓክትዜን ቡዑድ ዬእዝድንክ ዬታ ክት ራቕክ ሙክዴዴቴ! ሳዓቢ ሴጣንዳንኬ ዹምኣክ ፔጬንት ጌሥንግራንክ ዬዔም ዉሥትዮ ሳዓብት ሻዓክምንት ባዓምንግር ዬዔም ማዓስቴ፤ ሳዓቢ ሬይናም ሙዳ ዬ ዬይዳቓክ ጌዔሼናምኬ ዳቔልስዜን ዬ ሙክዳቓክ ጎዖግዬንታም ኔክሾ ክሌንዴትኬ ኡዝሜንዳ ዎዖንንትት ጎዖጋም ዬዔን እምቴ።

ዬታ ቡዑድ እዝዴድኔቴ ዬሱስ ዎዖንሳቓክ ዎዖንንጎክ ዳቔልስዬንታም ኔጋኔ ዬዔን ጋዓቴ፤ ታ ሳዓቢ ይዥምዴድ ማዓትንትዛንክ ጋዓጺ ይንት ኤዔዳ ማዓስሶ ዬዔም ጶቕሽዴ።

ሳዓብት ኤዔዴኬ ባዓባ ዬሱስት ፕክሽዴድክ ዬ ማዓሥንክ ዬሱስ ዬዔም ክ ኤስስዳኬትካን ኤዔእዴቴ፤ ቡዑድ እዝዴድ ዬ ማዓድንኬሴሬ ታ ዳይንኬሬ ዳቔልሲ ዎዖንንትካን ጴጽምዴቴ፤ ዳይንኬሬ ሳዓቢ ኖዖ ይዜን ቡዑድ እዜርቴባብ ክ ማዓሥንካን ዳቔልስዬንታም ዬ ቡዑጽድንክ ኔጋኔ ዬዔን ጋዓዴ፤ ዳቔልሳም ዬ ይዝንድንዳ ዛማም ዬዔን እምምዴ።

ሳዓባም ዬ ምክስቴምሽኬ ኡፕስንክታም ሜይስትዮ ዬ ጎስቴምሽክ ኣቤድን ቡዑድ እዝዴድን ኪክን ዬ ጉምፔርቴምሽ ዬዔን ክ ዎዖንሳቓኬታሜሬ ኣቤድንካን ዬ ኬዔስቴምሽ ዬዔም ጎይስዴ፤ ኬዔና ሬይን ሙዳ ክ ኪክን ኡዝሜንዳ ማሽሜንት ዶዖቕቴምሽ ዬዔም ማዓስድንዴ።