50. ዬሱስ ማዓትዮ ሃዓዳዴ

ቓስቴን ሺ ቦንንካን ፔጬት ሼዔጋ ሼዔግክ ዶዖቕዴድ ኤዔድን ሙዳ ሳዓቢ ዪም ሳይሳቓብን ዬሱስጎክ ኬዔዝዳኬታም ዳቕሽ ኡፕስናም ኤስራሮ ዶዖቕቴኬ፤ ምክስ ኤይና ጋጳሮ ዶዖቕዳቔ፤ ዬሱስ ፔጬንት ማቕንቴዜን ይ ማዓድምሽ ጉሜርን ኬዔስቴ፤ ኖዖ ታ ኣኪ ክ ማዓትክንኬሴሬ ጉሜርይንታም ጶጶይዴ።

ዬሱስት ማዓትንትናም ጶያሮ ዎ ዶዖቕዳኬንክ ሳዓቢ ጪልምክ ማዓሣቕንዴትኬ ኪም ቦችሽድንዳ ጎዖግክ ዎ ዶዖቕቴምሽ ዝግዴ፤ ታዓሬ ክት ባዓምንጎካን ኣቤድንካን ዎ ኬዔስቴምሽዝግዴ፤ ዬሱስ ፔጬዜን ይ ዶዖቕዳኬንክ «እስት ራቕክ ሙክዴድና ሳዓብት ባዓምንጎካማኬታም ኬዔዝዳክ ዻቕሺ ኡፕስናም ፔጬት ሼዔጌክ ዶዖቕዳክ ካሪ ሙዴዜን ኤዔድንካን ሳንዴኬ፤ ኮዖ ሴጽንክ ማቕንቴና ሃዓዴ» ጋይሴ።

ቤድሚ ኤዔድና ታዓክ ሃይዬሬ ዬሱስጎካን ኤሴርኬኬ፤ ዬሱስ ርኬግር ይ ማዓትካኬት ብሬዜን ዻቕሺ ኡፕስናም ዎላቔሴ ኤሴርኬድ ኤዔድንካን ኬ ኬዔስቴምሽ ቡዑድ እዝዴድንካን ኬዔስቴ፤ «ካዬቶ ዻቕሺ ኡፕስናም ኬዔዝንትክ ኤዔድን ሙዴናም እስት ራቕክ ሙክዴድ ኬዔም ማዓስኬቴ!» ጋይንትክ «ሱዼርዳኬሬ ዣእቴ!» ጋይሳቔ።

ታዓሬ ዬሱስ ኮይን ጋይሴ፤ «ፕክሽዳብ ፕክሽሽዳብንዛንክ ጋዓጻዬ፤ ኮይን ፔጬን ኮዜን ዶዖቕዴድ ጋዓኔና ኢም ይ ይዥምሽ እ ጎዖካን ዬዔም ሴዔቕስዴኬ ዬዔም ዴዴይስዴኬ ሃስንዳይንኬሬ ፔጬን ኮዖት ካልርናም ዬ ቴይድንኬሴሬ ሃይ ጳሽኬቴ፤ ሃራካኔ ጋዓርስንክ እታ ፔጬን ኮዖም ጌሥዳብን ሴጣናም ሺችትቴ፤ ዬታ እዜን ቡዑድ እዜቶ ማቕንቴክ ዬካ ዬ ዛብድንክ ኮዖ ሴጽንክ ሳዓቢ ዬዔም ዻዻቕሽዴ!»

ዬሱስ ፔጬንት ማቕንታ ማዓዳኬንክ ኤዔድንዜን ዣእዳክ ሬይናም ፕእስትዮ ኬዔዝንትካን ይንት ራቕክ ሙክዴድንቴን ኣታ ዎላቓም ኬዔዜ፤ ኤዔድ ዎላቕባብ ሃዓምግርንት ላቕምቴንዳ ዜርግት ጴዔታም ማሼ፤ ራዓታ ክ ዳይክ ኪም ይዥዳብን ሃዓዶ ዜርግንግር ሌዔሻም ማሾ ካዬ።

«ማሼርሻቓክ ዜርግና ኮ ባቔልሳኬንክ ኤዔሥንት ዎዖኒ ዎዖንዴድን <ባዓቦ ሃዓምንግር ላቕምቴንዳ ጴዔታ ማሽታ ሃዓቓዬ፤ ታ ኮዖክ ዋዓርኮት ሌዔሼና ሃብራንኮክ ሃዓፔርሴ?> ጋይሶ ጎይሴኬ፤ ባዓቤስኔሬ ማሻቓብን ይዥዳብ ዳዓቴሬ» ጋይሶ ኬዔን ማዓስሴ።

«ክት ዎዖንዴድኔሬ ባዓቤስንካን <ሌዔሼናም ዎ ቡዑጫኖ?> ኪን ጋይሴኬ፤ ባዓቤስንኬቴሬ ኮይን ጋይሴ ሃዓይዬ፤ ኮዖም ዬ ዬይድክ ዜርግናሜሬ ቡቡዑጭዴቴ፤ ሽካ ሴጽንክ ዬካ ጋርኬቴ ሽኬርዳኬንክ ሌዔሼናም ሱዽትዮ ኖዖግር ኣሥኬቴ፤ ዜርግናም ዳይንክ ሪቔንግርእስት ካዓኬቴ።»

ክት ራቕክ ሙክዴድና ኣቴንት ቡልና ኬዔን ኣይቴር ኬዔን ማዓክንካን ኬዔን ፕእስትዮ ክ ኬዔስቴምሽ ዬሱሳም ጎይሴኬ፤ ዬሱሴሬ ኮይን ኬዔን ጋይሴ፤ «ላቕሚ ጴዔቴናም ማሻቓብ ኤዔሥን ሳዓቢ ዪም ሳይሳቓብን ዬሱሳም ጶቕሽሽዴ፤ ሃዓምና ፔጫ ኮዛሜድናም ጶቕሽሽዴ፤ ላቕምታ ጴዔቴና ሳዓብት ኤዔድናም ጶቕሽሽዴ።»

«ሌዔሼና ዳቕልስንዳንክ ማዓሣቔድ ኤዔድናም ጶቕሽሽዴ፤ ሌዔሼናም ማሻቓብን ይዥዳብ ሴጣናም ጶቕሽሽዴ፤ ሽኬና ፔጬን ኮዖት ማቕንቴናም ጶቕሽሽዴ፤ ሽክዴድኔሬ ሳዓቢ ርኬግራንክ ዎዖንይንትካን ክ ኦይዴድናም ጶቕሽሽዴ።

«ፔጬንት ማቕንቴንክ ሳዓብት ኦይቴርቴድና ሴጣንካን ማዓሣቔድድ ኤዔድናም ሙዳ ዎላቕዜን ሱዽምሴኮ ዞዖጴድንዳ ኖዖግር ኬዔም ዣቕዴኬ ኮዖግሬሬ ኡዑግምዴኬ ዳቕላይስንዳ ሴዔቕርኬሬ ኣሥንታም ቕርጭዴኬ፤ ኮዖ ሴጽንክ ሳዓብካን ኡዝሜክ ዎዖንዳቔድና ባዓቤንንቴት ባዓምንግር ሃይምሽ ሻዓክዴኬ።»

ታዓሬ ዬሱስ ፔጬንት ማቕንቴንት ብሬዜን ኮዖር ፔጬዜን ማዓትዮ ይ ሃዓድምሽ ኬዔስቴ፤ ይ ካያቓኬትምሽ ኮይን ማዓትዮ ሃዓዳዴ፤ ኮዖኔሬ ሃዓፕምድንዳ ዜኔክት ዶዖቕዴ፤ ርኬት ሊሌዜን ሃዓዳዴ፤ ዬሱስ ክ ማዓዳኬንክ ዎላቕ ዎላቔና ቤዴድ ዴእታ ኤዔድና ዱዑክግራንክ ዻዓምቴኮ ርኬግር ክራ ማሽምዴኬ።

ኮዖ ሴጽንክ ኣኪ ኣዓፔክ ዶዖቕዴድ ቡዑድ እዝዴድና ርኬግር ኤቤኮ ዱዑክግራንክ ዻዓምታቔድ ኣቤድን ቡዑድ እዝዴድን ኪክን ቡቕምዴኬ፤ ኮዖግር ሙዴኔሬ ዬሱስ ኪክን ማዓዴኬ፤ ኮዖት ቡዑር ዬሱስ ኤዔድን ኪክን ማቕንቴኮት ማዓሣቕንዳ ላቕምኬ ኪክን ማዓትንትክ ሌፒ ሴጽካን ዶዖቕዴ።

ዬሱስ ይዜን ቡዑድ እዝዴድን ሙዴካን ሼክሽት ቖዖጵ ይ እምድምሽ ጉሜርንክ ኬዔስቴ፤ ኬቴሬ ማቕንትንት ዳክንዳ ላቕምንክ ሳዓቢ ኪክን ሌፒ ሴጽካን ዶዖቕዴኬ

ዳይንኬሬ ሳዓቢ ዬሱስክ ቡዑድ እዛዬድ ሙዴንዜን ቤቤዔርዴ፤ ሌፒ ሴጽካን ኬ ኤዔፕድንዴትኬ ሴዔቕርክ ኣሥይንታም ኬ ቕርጭድንዳ ሌፒ ሴጽት ቤዔሪ ኖዖንግር ኬዔም ዣቕዴ፤ ዎላቔሴ ድካይንዳ ኖዖና ድክዶቕዶ ኬዔም ኣሥዴ፤ ዱምእሬኔሬ ኬዔም እሥንትናም ጋራዬኬ።

ዬሱስ ማዓዳኬንክ ሴጣናምኬ ባዓምንክታም ሙዳ ካካይስዴ፤ ሴጣናም ሳዓቤን ኤዔእንዛንክ ጋዓጽዮ ክት ራቕክ ሙክንትካን ኪም እዛቔድ ሙዳ ኪክን ሌፒ ሴጽካን ኪም ኣሥድንዳ ቤዔርት ኖዖንግር ኪም ዣቕዴ።

ኣዳምኬ ሄዋኔትክ ሳዓቤን ኬ ኤዔእክንካንኬ ፔጬዜኔሬ ዳቔልሳም ኬ ታዓዳቓኬትጎክ ሳዓቢ ፔጬዜናሜታም ኣሼ፤ ኮዖም ካይስካኔሬ ጶቕሼ፤ ዳይንኬሬ ሴጻ ዎላቕ ሳዓቢ ካያይንዳ ክላ ርካምኬ ክላ ፔጫምክ ፕፕዥዴ።

ዬሱስኬ ኤዔድንክቴክ ክላኣክ ፔጬንዜን ዶዖቕዴኬ፤ ዶዖቕዳክ ሬይ ሙዴዜን ሌፒ ሴጽካን ባዓምዴኬ ኖዖሬ ኤርሜናም ሙዳ ኣዓፕዜናንክ ሃዓጽዴ ኮዛንክ ኦስ ሴዔቕሪ፥ ኣትሪ፥ ኤዔፒ፥ ዳቕልንዳ ሃዥም፥ ዋይ ዴኢ ዶዖቓዬ፤ ዬሱስ ባዓምይንታም ላቕምኬ ኡዝማ ቤዔርክ ጌሥዴ፤ ሌፒ ሴጽካን ይንት ኤዔድን ኪክን ዶዖቕዴ።