48. ዬሱስ ጉሜርን እሜርሳቓብ ሳዓቢ ዪም ሳይሳቓብኔ

ሳዓቢ ፕዤናም ክ ፕዥዳኬንክ ሬይ ሙዳ ላቕሚ ሃዓቔ፤ ዳቔልሲ ዳክ ሃዓቔ ኣዳምኬ ሄዋንክ ኪክ ኪካም ናናሽዳቔኬ ሳዓባሜሬ ናናሽዳቔኬ፤ ሃዥም ዋይ ዴኢ ዳኪ ሃዓቔ፤ ሳዓቤሬ ፕዥቴኔክት ኮ ማዓትቴምሽ ክ ዝግዛቓክ ኮይኔ።

ሴጣን ሳዓብት ኮርሚ ሃዓምንግር ሄዋናም ቱንትምስካን ጉንጎክ ኬዔዜ፤ ኮዖት ቡዑር ኮዖኬ ኣዳምክ ሳዓብዜን ዳቔልሲ ዎዖንሴኬ፤ ዳቔልስንኬትጎካን ፔጬዜን ዶዖቕዴድ ኤዔድ ሃዣዤርዴ ዴዴእዴ።

ኣዳምኬ ሄዋንክ ዳቔልሲ ኬ ዎዖንሳቓኬትዛንክ ዻዓምስንዳ ኮዖዛንክ ጋዓጽድንዳ ዳቕልንዳ ሬዬሬ ማዓታን ኬታ ሳዓብት ይዥምዴድ ማዓሤኬ፤ ካንካን ኮዖ ሴጽንዛንክ ዬዞ ኤዔድ ሙዳ ዳቔልስት ጌቔክ ኣዼርሳቔ፤ ታዓሬ ሳዓባም ይዥዳብ ማዓቴ፤ ሳዓብቴኬ ኤዔድቴክ ሞልትግር ሃዓቓክ ማሽምና ዳቔልስጎካን ኔክቴ፤ ዳይንኬሬ ሳዓቢ ኮዖ ማሽምናም ኣልካ ማዓስንትካን ጶቕሽንክት ሃዓቔ።

ሄዋንት ካዓሥንግራንክ ዎላቓብና ሴጣንት ማታም ግእድምሽ ሴጣኔሬ ዱዑትንክቴት ጋዓሬናም ጋእድምሽክ ሳዓቢ ጉሜር ኡፕስንግር ኬዔስቴ፤ ኮዖኔሬ ሴጣን ሳዓቢ ዪም ሳይሳቓብናም ዴዴይስዴ ዳይንኬሬ ሳዓቢ ኣልክምሲ ኪም ዻዻዓስዴ ጋይንትዬ፤ ኮዖዛንኬሬ ሳዓቢ ዪም ሳይሳቓብን ሴጣንት ዛምናም ሌፒ ሴጽካን ግግእዴ፤ ቤድሚ ቦንንት ቡዑር ሳዓቢ ይንቲ ሳዓቢ ዪም ሳይሳቓብን ዬሱስ ማዓሥምሽ ኣይቴር ማዓስሴ።

ሳዓቢ ፔጬናም ሙዳ ካይስዳክ ኖቔንክ ክ ካይሳኬንክ ክዜን ቡዑድ እዛቔድ ኤዔድናም ዻቕሽንትካን ማርኬብ ጋዓርዳኬታም ኡስሴ፤ ኮዖም ካምድንዴትጎክ ኤዔድ ሙዳ ዳቔልስይንትጎክ ዴእንቲ ኪም ዝክስዳቔ፤ ዳይንኬሬ ሳዓቢ ክዜን ቡዑድ እዝዴድናም ሙዳ ዻቕሽንትካን ዬሱሳም እምሴ።

ቤድሚ ማቶ ቦንካን ኤዔድናም ሳዓቢ ኪክን ቔዔሽምሽዴድን ዳቔልስጎካን ዝክስዳኬታም ቓእስርናም ዻዉስንትካን ኤዔድንካን ጋርክዶቕዶ ዳቔልስጎካን ጪልሽት እማ እምዳቔኬ፤ ዳይንኬሬ ኬዔና እሜና ዳቔልስንኬታም ኔክሽካን ማዓትክዬ፤ ዬሱስ ዴዔጽምስን ኤዔድናም ሳዓቢ ቔዔሽምሽዴድንት ጌሥዳብስኔ፤ ኣቤድን ኤዔድናም ሳዓቢ ኪክን ቔዔሽምሽዴድንዛንክ ጋሌንዴትጎክ ይካሣም ፔጬዜን ዶዖቕዴድ ኤዔድን ሙዴካን ዳቔልስናም ኔክሽንትካን ዪን ማዓዳብ ኣብንዳ ጪልሽት እማ ማዓስሶ እምሳቔ፤ ዬሱስ ኤዔድ ሃይያሜሬ ክ ዎዖንሳቓክ ዳቔልስንት ቓእስርናም ቴያቓብ ጋዓጽ ኤዔድናም ሳዓቢ ኪክን ቔዔሽምሽዳቤ።

ሳዓቢ ኣብራሜን «ፔጬት ኤዔዴና ሙዳ ሃንክ ኣንጅምዴኬ» ጋይሶ ኪን ኬዔዜ፤ ዬሱስ ኣብራምት ካዓሥግራንኬ፤ ክጎክ ኤዔድን ሙዳ ኣንጅምቴኬ፤ ሃራካኔ ጋዓርስንክ ዬሱስዜን ቡዑድ እዝዳብ ኤዔድ ሙዳ ዳቔልስግርንታንክ ዻቕቴ፤ ኮይኔሬ ኣብራምት ማንፔስጎክ ኣዽርንክት ማዓቴ።

ይንሥስን ይሳቓም ጪልሽት እማ ማዓስሶ ክ እምቴምሽ ሳዓቢ ኣብራሜን ክ ኬዔዛኬንክ ሳዓቢ ይንሥስን ይሳቕ ኦዖላይስ ጪልሽት እሜንካን ማዓዳብ ቖልስናም ዻዉሴ፤ ዎታ ሙዴኔሬ ዳቔልስክ ዴእንቲ ዎዖን ማዓዳቔ! ዳይንኬሬ ሳዓቢ ጪልሽት እማ ማዓሦ ዎ ካርግር ክ ዴእቴምሽ ሳዓብት ቖልስን ማዓሣቓብን ዬሱሳም እምሴ።

ሳዓቢ ግብጽዜን ማቕንቴን ጋዓምናም ክ ኦይሣኬንክ ሃሬሬ ይዜን ዳክባብ ቕንጽ ኬ ቴችቴምሽኬ ዞምእናም ፑልቴንዜንኬ ፑልቴንት ጌድንዜንክ ኬ ዪጽቴምሽ እስራኤል ኤዔድንካን ኬዔዜ፤ ሳዓቢ ዞምእናም ይ ሼጃኬንክ ኤዬንት ማቴክ ካዬ፤ ቶይዲ ይንሥንኬታሜሬ ዴይስክዬ ኮዖና ኣታካማ ዎዖንምቴናም ፓዓስጋ ኮዖም ጋዓርሳቔ።

ዬሱስ ዎንት ፓዓስጋ ቖልስኔ፤ ኖዖ ዎላቔሴ ዳቔልሳቕባቤ ፓዓስጋ ሳዓቢ ሴጽንክ ዪም ዴይሴርሳቓቤ፤ ኤዔድ ሃይዬሬ ዬሱስዜን ቡዑድ ክ እዝዳኬንክ ዬሱስት ዞምእና ኤዔሥን ኮዖባብት ዳቔልስት ካሺ ማዓቴ፤ ሳዓብት ቓእስኔሬ ኤዔሥን ኮዖባባም ዴይሳዬ።

ሳዓቢ እዴርቴድ ኤዔድንክት ሃዓቔድን እስራኤል ኤዔድን ኪክን ጫዓቓ ኣርዜ፤ ዳይንኬሬ ታ ሳዓቢ ኤዔድን ሙዴንካን ማዓድንዳ ክላ ጫዓቓ ኣርቴ፤ ኮዖ ክላ ጫዓቔንጎክ ኤዔድን ሃሜድንት ኤዔዳ ማዓሣቓብ ኤዔድ ሃይዬሬ ዬሱስክ ቡዑድ ክ እዝንትክ ሳዓብት ኤዔዳ ማማዓዴ።

ሙሳ ሳዓብት ኡፕስናም ኬዔዝዳቓብ ዴዔጽምባብ ማዓትካን ዬይዳኬታም ኬዔዝዳብ ሃዓቔ፤ ዬሱስ ዳይንክ ሙዴዛንክ ጋዓጽዳብ ማዓትካን ዬይዳኬታም ኬዔዝዳብኔ፤ ኖዖ ሳዓብዬ ካንካን ክ ዎዖንሳቓክ ሬይ ሙዳ ሳዓብት ዎዖንኬ ኡፕስኬ ካንካን ዬሱስ ሳዓብት ኡፕስዬ ጋይሶ ኤዔሌርዳኬ።

ካዓሥንግርክታንክ ዎዖላቓብን ባዓቢ ማዓሦ ሳዓብት ኤዔድንዜን ሌፒ ሴጽካን ባዓምድምሽ ሳዓቢ ባዓብስን ዳዊትካን ጉሜርናም ኬዔዛቔ፤ ዬሱስ ሳዓብት ይንሥስንኬ ሳዓቢ ዪም ሳይሳቓብንክ ክ ማዓሥንካን ሌፒ ሴጽካን ባዓምንት ዪን ማዓዳብ ጋሌባብ ዳዊት ካዓሥስኔ።

ዳዊት እስራኤል ኤዔድንት ባዓቢ ሃዓቔ፤ ዬሱስ ዳይንክ ፕዥር ፔጬዜናሜድ ሙዴት ባዓብዬ፤ ማዓትዮ ሃዓዶ ኡዝማ ቤዔርኬ ላቕምክ ባዓምናም ሌፒ ሴጽካን ጌሥዴ።