47. ጳዉሎስኬ ስላስክ ፕልጵሶስግር

ሳዉል ሮማ ፔጭንት ባዓብስንት ጌሥንግር ሙዳ ክ ኡንግዳኬንክ ሮማጎክ ኪም ኤዔሌርዳክ ናዓምንክ «ጳዉሎስ» ጋዓዳክ ናዓምንክ ኤዔልምንት ዬዜ፤ ሴጻ ዎላቕ ጳዉሎስኬ ቤዔልሥስ ስላስክ ዬሱስጎካን ኬዔዝዳክ ሳዓብት ኡፕስናም ኬ ኬዔዝንትካን ፕልጵሶስ ካሜንግር ካዬኬ፤ ኤዔድና ምክስካን ኬ ሱዽምሳቕንዳ ኬትሜንት ማዓልጎክ ኖቔት ሼዔጌር ዶዖቕዳክ ካርንግር ካዬኬ፤ ኮዖግር ዛላ ዛልድንዳ ሊዳ ዪም ጋዓርድንዳ ማይንሢ ዎላቔንዴታም ሃዓፕቴኬ፤ ናዓሬ ሳዓባም ናሽድንዴትኬ ኪም ምክስድንዳ ሃዓቔ።

ዬሱስጎካን ኬዔርዳክ ኬዔዜናም ኮ ዶዖፕስቴምሽ ሳዓቢ ልዳት ቡዑዴናም ፖዖቼ፤ ኮዖኬ ኤዔር ኤዔድንኮትክ ካርቴንክ ሽኤርሼኬ፤ ኤዔርንት ኬ ዶዖቕቴምሽ ጳዉሎሳምኬ ስላሳምክ ኤዔልሴ፤ ካንካን ኬታ ኮሬኬ ኤዔር ኤዔድንኮት ኪክን ዶዖቕሴኬ።

ጳዉሎስኬ ስላስክ ቤድሚ ሴጽ ምክስ ካርዜን ኤዔድን ኪክን ማሽምዳቔ ሴጻ ሙዴክ ኮዖግር ኬ ካይድንክ ዥኒ ዪም ዬዛቕንዳ ማይንሥ ኣንዛ ዎላቔንዳ ካርኬቴክ ሙክዳቔ ናዓሬ ኮዖ ዥንንጎክ ኣኪ ሃዓድንዴትካን ኤዔድንካን ማዓትካን ዬይዳኬታም ኬዔዝዳቔ፤ ካንካን ጾዖማ ቓንንትክ ቤድሚ ሶሊ ሃዓፕስስዳቔ።

ፕክሽዳክ ኣንዝቴኔሬ ኬ ኡንግድንክ ካርኬቴክ «ኬዔና ኤዔድና ባዓብስን ሳዓብት ፕክሽዴዴኬ፤ ዻቕንትት ጎዖግናም ዬዔን ኬዔዝዴኬ!» ጋይንትክ ኡዑግምትናም ጋራቕዬ፤ ጳዉሎስ ክ ጋዓምስቴንክ ዬካ ኮዖም ካርክ ማዓሲ ማዓሶ ጋዓዳቔ።

ማቕንቴዜኔሬ ሴጻ ዎላቕ ፕክሽዳክ ኣንዝቴን ኡዑግምን ኮ ዬዛኬንክ ጳዉሎስ ኮራ ማዓትዮ ሼጆ እዜግርኮት ዶዖቕዳክ ዥንስናም «ዬሱስት ናዓምክ ኮግራንክ ዉትካ» ጋይሴ፤ ሳዓኔሬ ዥንስን ዉታቕሴ።

ፕክሽዳክ ኣንዝቴንቴሬ ጌሥዴድ ኤዔድን ጋእሻ ጋዓምሴኬ! ዥንስን ካይሳ ሃዓዳኬታም ኤዔድንካን ኬዔዝንት ኮዖን ማዓታያኬም ኤስቴኬ፤ ኮዖኔሬ ኤዔድና ኬዜን ዣእዳክ ሬይናም ኮ ኬዔስቴምሽ ኮዖን ማዓታያክ ጌሥዴድንኮትካን ሶሊ ካሻዬኬ ጋይንትዬ።

ካንካን ፕክሽዳክ ኣንዝቴንት ጌሥዴድና ጳዉሎሳምኬ ስላሳምክ ሮማ ፕጭንት ጋዓኔንዳ ኬዔም ቴይ ካዬኬ፤ ኬቴሬ ኬዔም ግእሴኮ ዻክር ኤዔር ኬዔም ዻስሴኬ።

ኬቴሬ ጳዉሎስኬ ስላስክ ዻክር ኤይንት ኦ ዋዓርጎክ ዶዖቕዳትኬግር ኬዔም ዻክንትክ ዱዑትንኬታም ሃዓቓ ዛምቤክ ዻክሴኬ፤ ማዓሤሬ ሶይቲ ካዓስሜዜን ሳዓብካን ጎዖፕሽት ዬሢ ዬሥሴኬ።

ጶቕሼርክዳይክ ጋእሼንዳ ፔጬት ሾዖ ማዓሤ፤ ዻክሪ ኤይንት ፑልቴና ሙዳ ዋንጋኤ ጋይ ፖዖችምሼኬ፤ ዻኬርታ ኤዔድን ሙዴት ካዉሤና ፔጬዜን ድንግዜኬ።

ዻክሪ ኤይንት ጶይዳብስን ራዓቴዜይንታንክ ዻዓምቴ፤ ዻክሪ ኤይንት ፑልቴን ሙዳ ፖዖችምቴንኬታም ይ ሼጃኬንክ ጳሼ! ዻኬርታ ኤዔድን ሙዳ ካይቴንዳ ኪን ካምሳቔ፤ ካንካን ይካሣም ዴይስካን ጶቕሼ፤ ዻኬርቴድን ዻቖ ካይቴድ ኬ ማዓሥንክ ሮማ ፔጭንት ባዓብስንት ጋዓኔና ኪም ዴይስዳኬታም ኤስቴ፤ ዳይንኬሬ ጳዉሎስ ኪም ይ ሼጃኬንክ «ጋርካ! ሃካሣም ሃይ ዴይስካ፤ ዎታ ሙዴና ኩዑር ዶዖቖቴ» ጋይሶ ኡፕሲ ጫዓጭክ ኡዑግምሴ።

ዻክሪ ኤይንት ጶይዳስን ጳዉሎስዴኬ ስላስዴክ ሃዓዶ ብልቓሮ «ዻቕንትካን ሃሪ ዬይቴ?» ጋይሶ ጎይሴ፤ ጳዉሎሴሬ «ባዓባ ዬሱስዜን ቡዑድ እዝካ ሃንኬ ኤዔር ኤዔዳንቴክ ዻዻቕዳዬ» ጋይሶ ኪን ማዓስሴ፤ ኮዖዛንኬሬ ዻክሪ ኤይንት ጶይዳብስን ጳዉሎሳምኬ ስላሳምክ ኤዔርንት ኬዔም ኤንሥትዮ ኬዮ ዲድንኬታም ኬዔን ሽእሼ፤ ጳዉሎስ ኤዔርክት ዶዖቕዳቔድ ሙዴካን ዬሱስጎካማኬታም ሙዳ ኬዔን ሳንሴ።

ዻክሪ ኤይንት ጶይዳብስንኬ ኤዔር ኤዔድንክት ሙዳ ዬሱስክ ቡዑድ እዜኮ ካርቴንክ ሽኤርሼኬ፤ ኮዖዛንኬሬ ዻክሪ ኤይንት ጶይዳብስን ጳዉሎስካንኬ ስላስካንክ እሥሚ ኬዔን እምሴትዳቦ ኪክን ዎላቕዜን ጉሜርሴኬ።

ሼናኬንኮቴክ ፕልጵሶስ ፔጭንት ኤንሥዴድና ጳዉሎስኬ ስላስክ ዻክሪ ኤይንግራንክ ኬዔም ቡልሴኮ ፕልጵሶስግራንክ ኬ ካይቴምሽ ኬዔም ጎይሴኬ፤ ጳዉሎስኬ ስላስክ ልዳምኬ ኣቤድናሜሬ ኬዔም ጎይሴኮ ካትሜንግራንክ ዉታቕሶ ካዬኬ፤ ዬሱስጎካን ኬዔዛሬኮ ኬ ካይንካን ዻቕሽ ኡፕስና ግድማሮ ምክስ ኤዬሬ ግድማሮ ካዬ።

ጳዉሎስኬ ኣቤድን ቡዑድ እዝዴድንት ኤንሥዴድንክ ዬሱስጎክ ኬዔዝዳክ ክላ ኬዔዜናም ሳናሬኬ ኤሳሬክ ቤድሚ ካትሜንዜን ኡንጋ ዬዜኬ፤ ታዓሬ ምክስ ኤይንግር ዶዖቕዴድ ኤዔድን ሙዴካን ኬዔም ዛፕስካንኬ ኬዔም ኤስስንትካንክ ቤድሚ ኦይቴናም ኬዔን ክልክሳቔኬ ኬዔና ኦይቴንግራንክ ባግና ማጻዓፕ ጪልንግር ክልኬርቴድ ማዓሤኬ።