46. ጳውሎስ ቡዑድ እዝምሽ

ሳዉል እስጥፓኖሳም ዴይሳቔድ ኤዔድንት ኣብላም ጶይዳቓብ ሼኬን ሃዓቔ፤ ዬሱስዜን ቡዑድ እዛቕዬ፤ ካንካን ቡዑድ እዝዴድናም ዳዓዳቔ ኣንግኔናምኬ ማዓኔናምክ ዬትዮ ዻክር ኤዔር ታዓድንትካን ዬሩሳሌምግር ኤዬግራንክ ኤዬግር ካይዳቔ፤ ኤዔድናም ሳዓቢ ኪክን ቔዔሽምሽዴድንት ኤንሥዳብን ኮዖግር ዶዖቕዴድ ቡዑድ እዝዴድናም ክ ዬድቴምሽኬ ዬሩሳሌምግሬሬ ኬዔም ክ ታዓድቴምሽ ዴማስቓ ካትሜንግር ክ ካይቴምሽ ኪም ኦይቴርሴ።

ሳዉል ዴማስቔግር ሙክንትዜን ክ ዳይድክ ርኬግራንክ ጋእሻ ጻልጵድንዳ ሻዓክሚ ሼዔጌክቴክ ሙዳ ሻዓክሼ፤ ኖዖሬ ፔጬዜን ቡኬልሴ ኤዔድ ዎላቕባብ «ሳዉል! ሳዉል! ሃራካና ኢም ዳዓዴ?» ክ ጋዓድክ ኤሴርሴ፤ ሳዉሌሬ «ባዓቦ ሃዓና ሃይዬ?» ጋይሶ ጎይሴ፤ ዬሱሴሬ ኮይን ጋይሶ ማዓስሴ፤ «እታ ዬሱስቴ ሃዓና ኢም ዳዓዳዬ!» ጋይሶ ኪን ማዓስሴ።

ሳዉል ክ ዻዓምዳኬንክ ኣዓፕክት ሼዳይቴ ጋይሴ፤ ቤዔልሥስኬሴሬ ዴማስቔግር ኤንሥትዮ ኪም ዣእሼኬ፤ ሳዉል ሴጻ ማኬንካን ሃሬሬ እሥክዬ ዎጭክዬ።

ዴማቔግር ሃናን ዪም ጋዓርዳብ ዬሱስት ራቕክ ሙክዳብ ሃዓቔ፤ ሳዓቢ ሃናንካን «ሳዉል ዶዖቕዳክ ኤዬንግር ካይካ ኣልክምሲ ክ ሼድቴሽ ኣዓንሃንታም ዜንክት ዎትካ» ኪን ጋይሴ፤ ሃናንያ ዳይንክ «ባዓቦ ኤዔሥን ኮዖና ቡዑድ እዝዴድናም ሃስን ክ ዳዓዳቕንኬሬ ኤሴርትቴ» ጋይሴ፤ ሳዓቢ ዳይንክ «ካይካ! ኣይሁድ ኤዔድንካንኬ ኣቤድ ኤዔድንግራንክ ማዓሣቔድ ኤዔዴንካን ናዓምእስትካን ክ ኬዔስቴምሽ ኪም እድትቴ፤ ናዓምእስትካን ቤድሚ ካልራም ቴይዴ» ኪን ጋይሴ።

ካንካን ሃናንያ ሳዉልዳ ካዬ፤ ኣዓንንታም ዎጄ ኮይኔሬ ኪን ጋይሴ፤ «ኩዑር ሃ ሃዓድክ ሃራ ሃዓፔርሳቓብን ዬሱስ ኣልካ ሃ ሼድቴምሽኬ ማንፔስ ጪልክ ሃ ጾዖጽቴምሽ ሃራ ኢም ኦይሣቔ» ሳዉሌሬ ሳዓና ሼጄ ሃናኔሬ ኪም ካርቴንክ ሽእሼ፤ ኮዖት ቡዑር ሳዉል እሥሚ እሥዮ ዛብዜ።

ሳዉል ሳዓና «ዬሱስ ሳዓብት ይንሥዬ!» ጋይንትክ ዴማስቔግር ሃዓቔድ ኣይሁድንካን ሳን ዬዜ፤ ኣይሁድ ኤዔድና ቡዑድ እዝዴድናም ካይስካን ዝግዳቓብ ኤዔሥን ታ ዬሱስክ ቡዑድ እዝንትንክቴክ ሪርቴኬ! ሳዉል ዬሱስ ሳዓቢ ዪም ሳይሳቓብን ማዓትንትንክታም ዶዖፕስንትክ ኣይሁድ ኤዔድናም ቡዑድ ኬ እስቴምሽ ማዓስሴ።

ቤድሚ ሴጽት ቡዑር ኣይሁድ ኤዔድና ሳዉላም ዴይስካን ጶቕሼኬ፤ ኪም ይ ዴይስቴምሽ ካትሜንት ፑልቴንዜን ጶይዴድ ኤዔድናም ኦይሤኬ፤ ዳይንኬሬ ሳዉል ጶቕሽንኬታም ኤሴርሴ፤ ቤዔልሥኬሴሬ ክ ዬድምታክምሽ ኪም ኬልሼኬ ሶይቲ ዎላቔክ ዳቼግር ኪም ዎድቶ ካትሜንት ጉርዳ ማትክ ሃችሼኬ፤ ሳዉል ዴማስቔግራንክ ይ ዻቓኬት ቡዑር ዬሱስጎካን ሳንንትናም ጋርክዬ።

ሳዉል ዬሱስት ራቕክ ሙክዴድን ኪክን ማሽምንትካን ዬሩሳሌምግር ካዬ፤ ኬታ ዳይንክ ክካን ጳሼኬ ኮዖ ሴጽንክ ባርናባስ ጋዓርዳብ ቡዑድ እዝዳብ ሳዉላም ቡዑድ እዝዴድንዳ ኪም ታዓድንትክ ሳዉል ዴማስቔግር ሃስን ዛምክ ክ ሳንድምሽ ኬዔን ኬዔዜ፤ ኮዖት ቡዑር ዬሱስት ራቕንክ ሙክዴድና ኪም ይራ ማዓስቴኬ።

ዬሩሳሌምግር ሃዓቓክ ዳዓርንዛንክ ሃዛቔድ ኤዔድን ቡዑድ እዝዴድና ኣንጾካግር ፔግምስዮ ካዬኮ ዬሱስጎካን ሳንሴኬ፤ ኣንጾካግር ሃዓቔድ ቤድሚ ኤዔድና ኣይሁድ ዳካቔኬ ዳይንኬሬ ብሬዜን ጋእሻ ቡዑድ እዝዴድ ማዓሤኬ፤ ባርናባስኬ ሳዉልክ ኬዔና ክላ ቡዑድ እዝዴድናም ጉጅሽዮ ዬሱስጎካን ኬዔም ኤስንትካንኬ ምክስ ኤይናም ዛፕስንትካን ኮዖግር ካዬኬ፤ ዬሱስዜን ቡዑድ እዝዴድን ብሬዜን ኣንጾካግር «ቡዑድ እዝዴድ» ኬዔም ጋዓርሴ።

ሴጻ ዎላቕ ኣንጾካግር ዶዖቕዳቔድ ቡዑድ እዝዴድን እሥክስኬ ዎጭክስክ ዶዖቕንትክ ምክሳሮ ኬ ዳይክ ማንፔስ ጪሊ «እ ኬዔም ኤዔልሳቓክ ዎዖንናም ኬ ዎዖንቴምሽ ባርናባሳምኬ ሳዉላምክ ኢን ኬዔም ፓዓሽኬቴ» ኬዔን ጋይሴ፤ ካንካን ኣንጾካ ምክስ ኤይንግር ፕክሽዳቔድ ባርናባሳምኬ ሳዉላምክ ኬካን ምክሴኮ ኣዓንንታም ዜንኬት ዎጄኬ፤ ኮዖዛንኬሬ ኣቤድ ካርንግር ዬሱስጎካን ኬዔዝዳክ ሳዓብት ኡፕስናም ኬ ሳንቴምሽ ኬዔም ኦይሤኬ፤ ባርናባስኬ ሳዉልክ ጋላ ጋሌድ ኤዔድንኬ ኣቤድንካን ኤስሴኬ፤ ቤድሚ ኤዔድኔሬ ዬሱስዜን ቡዑድ እዜኬ።