45 ፕልጶስኬ ኢቶጳ ኤዔድንት ጋዓኔስንክ

ኤናማክ ምክስ ኤይንግር ዶዖቕዳቔድ ኤንሥዴድንግራንክ ዎላቓብን እስጥፓኖስ ዪም ጋዓርዳብ ኤዔድ ሃዓቔ፤ ኖዖ ላቕማይስንዳ ናዓምንት ዶዖቕዳብኬ ማንፔስ ጪልን ይንክ ጾዖጻቓብ ኤዔድ ሃዓቔ፤ እስጥፓኖስ ቤድሚ ክላ ሬይናም ዎዖንሳቓብኬ ኤዔድኔሬ ዬሱስክ ቡዑድ ኬ እስቴምሽ ዶዖፕስስድንዳ ኬዔዛም ኤስስዳብ ኤዔድ ሃዓቔ።

ሴጻ ዎላቕ እስጥፓኖስ ዬሱስጎካን ክ ኤስስዳኬንክ ዬሱስክ ቡዑድ እዝኬድ ኣይሁድ ኤዔድና እስጥፓኖስ ኪክን ሜርምዳቔኬ፤ ጋእሻ ጋዓምሴኮ ቡዑድ እዝንትናም ኤንሥዴድንቴን ታውንትክ ኬዔዜኬ፤ «ሙሳጎካንኬ ሳዓብጎካንክ ዳቕሊ ሬያም ክ ኬዔዝድክ ኤሴርቶቴ!» ጋይሴኬ፤ ካንካን ቡዑድ እዝንትናም ኤንሥዴድን እስጥፓኖሳም ዬቴኮ ኣልክምሲ ጉጄክ ታዉንትክ ናቓሽዴዳም እስጥፓኖስዜን ዝግንትክ ኤዔድናም ሳዓቢ ኪክን ቔዔሽምሽዴድንት ጌሥዳብንዴኬ ኣቤድን ኣይሁድ ኤዔድንት ኤንሥዴድንዴክ ኪም ታዓዴኬ።

ኤዔድናም ሳዓቢ ኪክን ቔዔሽምሽዴድንት ጌሥዳብና እስጥፓኖሳም «ኬዔና ሬይና ዶዖፔኖ?» ጋይሶ ኪም ጎይሴ፤ እስጥፓኖሴሬ ኣብራምት ቦንንዛንክ ዬዞ ዬሱስ ቦንንክ ዬካ ዶዖቕዳክ ሳዓቢ ዎዖንሳቓኬታም ቤድሚ ሪርሽድንዳ ሬይናም ኮዖኔሬ ሳዓቢ ኤዔድን ካርክ ካርክ ክካን ኤዔእክስ ጋርንትንኬታም ጶቕሽሽንትክ ማዓስናም ኬዔዜ፤ ኮዖዛንኬሬ ኮይን ኬዔን ጋይሴ፤ «ዬታ ቡዑዴንት ጫልሽታቔድ ኤዔኣዬድ ኤዔድኖ ኤና ኣዓኬዬንትምሽ ሳዓባም ይዥዴድንኬ ክት ማዓትካን ዬይዳኬታም ኬዔዝዴድናም ዴይሳቔድንምሽ ሙዳ ሴጽካን ማንፔስ ጪላም ይዥዴዴቴ፤ ዬታ ዳይንክ ኬዛንክ ጋዓጽንዳ ሬይ ዎዖንቴቴ፤ ሳዓቢ ዪም ሳይሳቓብናም ዴይስቴቴ።

ቡዑድ እዝንትናም ኤንሥዴድን ኮዖም ኬ ኤሴርታኬንክ ቓዓምይንታም ይ ቱዑንስቴንዴትክ ኡፕሲ ጫዓጭክ ይ ኡዑግምስቴንክ ዬካ ጋእሻ ጋዓምሴኬ፤ እስጥፓኖሳም ካትሜንት ማዓልጎክ ጎችቴኮ ኪም ዴይስንትካን ሴይንክ ጎዖዜኬ።

እስጥፓኖስ ዴእ ይራ ዣእሽክ «ባዓባ ዬሱሶ ኡክንእስታም ቴይካዮ» ጋይሶ ኡዑግምሴ፤ ኮዖዛንኬሬ ቦቕንቴክ ጉምፔርሶ «ባዓቦ ኮዖም ዳቔልሲ ዜንኬት ሃይ ፓይድካዮ» ጋይሶ ኣልክምሲ ኡዑግምሴ፤ ኮዖት ቡዑር ዴእሴ።

ሳዉል ዪም ጋዓርዳብ ኣግልባብስን እስጥፓኖሳም ዴይሳቔድ ኤዔድን ኪክን ኤዔድምቴባብኬ ዜንክት ሴይንን ዣቔርዳኬንክ ኤዔድንት ኣብሌናም ጶይዳቓብ ሃዓቔ፤ ኮዖ ሴጽንክ ዬሩሳሌግር ሃዓቔድ ቤድሚ ኤዔድና ዬሱስት ራቕክ ሙክዴድናም ዳዓና ዬዜኬ፤ ካንካን ቡዑድ እዝዴድና ፔጫ ኣብንዳ ካርግር ሃዝዮ ካዬኬ፤ ዳይንኬሬ ዳዓርን ዶዖቕድንኬሴሬ ይ ካያክ ካሪ ሙዴዜን ዬሱስጎካን ሳንሴኬ።

ፕልጶስ ጋዓርዳብ ኤዔድ ዬሱስት ራቕክ ሙክዳብ ዳዓርን ሴጽንክ ዬሩሳሌማንክ ሃዛቔድ ቡዑድ እዝዴድንግራንክ ዎላቓብን ሃዓቔ፤ ሴማራ ፔጭግር ካይንትክ ዬሱስጎካን ክ ሳንዳኬንክ ቤድሚ ኤዔድን ቡዑድ እዝንትክ ዻቔኬ፤ ኮዖት ቡዑር ሴጻ ዎላቕ ሳዓቢ ርኬግራንክ ዎዖንይትካን ክ ኦይዳብን ፔጫ ጉርንግር ዶዖቕዳክ ካሪ ዎላቕግር ክ ካይቴምሽ ፕልጶሴን ኬዔዜ፤ ፕልጶሴሬ ጎዖግናም ክ ካይድክ ዎላቕ ኤስምቴባብ ኢቶጳ ኤዔድ ጋዓንምንት ዶዖቕዳብ ኡክሊ ፓሬስ ጎችዳክ ዚጌዜን ዶዖቕሶ ክ ካይድክ ኪም ሼጄ፤ ኤዔሥን ኮዖባብዳ ካዮ ኪም ክ ኬዔስስቴምሽ ማንፔስ ጪልና ፕልጶሴን ጶቕሽሼ።

ፕልጶስ ኡክሊ ፓሬስን ጎችዳክ ዚጌንዳ ክ ኡሥምዳኬንክ ኢቶጳ ኤዔሥና ማዓትካን ዬይዳኬታም ኬዔዝዳብን እሳስት ክልክኔናም ክ ጎስትክ ኤሴርሴ፤ ኤዔሥኔሬ ኮይን ጎስትሴ «ዪም ቴቼርዳብ ቖልምሽ ኪም ቤይሴኬ ቖልኔሬ ጫሜ ጋዓድምሽ ዎላቔሬ ሬይ ኬዔስክዬ፤ ቤዔሪ ሴጽንካን ኪም ቴዬሬ ኪም ቦንችኬኬ ኣዓፔክ ዶዖቕዴድንት ፔጬንግራንክ ኪም ካይሴኬ።»

ፕልጶስ ኢቶጳ ኤዔሥናም «ሃ ጎስትዳኬታም ሜይስዳዮ?» ጋይሶ ኪም ጎይሴ፤ ኤዔሥኔሬ «ኣዓይዬ ኢን ኣይቴር ማዓስዳብ ኤዔድ ዳክዳይክ ሜይስንትካን ኢን ማዓሥቴሮ ዋዓዴ ሃዓዳዮ እራ ኤቴር ዶዖቕካ እሳስ ክልክሳቓክ ይማትካኖ ዋይ ኣብባብ ኤዔድካኖ?»

እሳስ ክልክሳቓክ ዬሱስጎካን ማዓትንትናም ፕልጶስ ኢቶጳ ኤዔሥንካን ፔናክስትዮ ኬዔዜ፤ ታዓሬ ፕልጶስ ዬሱስጎካን ይ ኬዔዝዳክ ክላ ኬዔዜናም ኬዔዝንትካን ኣቤድን ሳዓብት ኡፕስንግራንክ ጎስትሴ።

ፕልጶስኬ ኢቶጳ ኤዔሥንክ ኬ ሙክድክ ኖቓ ዶዖቕድንዳ ካርግር ዣእሼኬ፤ ኢቶጳ ኤዔሥኔሬ «ኩዑር ኖቓ ዶዖቔ! ካርቴንክ እ ሽእራኖ?» ጋይሴ፤ ዚጌናም ቤይዳብስንቴን ክ ዎይስቴምሽ ኬዔዜ።

ካንካን ኖቔንግር ሃቼኬ፤ ፕልጶሴሬ ኢትጳ ኤዔሥናም ካርቴንክ ሽእሼ፤ ኖቔንግራንክ ኬ ዉታቕስንዴት ቡዑር ማንፔስ ጪልና ጶቕሼርክዳይክ ፕልጶሳም ካሪ ኣብግር ዻዓስትዮ ካዬዬ፤ ዬሱስጎካን ኤዔድኔን ኬዔዝንትናም ዬዜ።

ኢቶጳ ኤዔሥን ዬሱሳም ኤስንትይንቴክ ጉምራሮ ፔጬግርንት ሙክንትይንታም ዬዜ።