44. ጴጥሮሳምኬ ዋንሳምክ ምክስዳቓብን ኤዔሥንት ማንፔስና

ሴጻ ዎላቕ ጴጥሮስኬ ዋንስክ ምክስ ኤይግር ካይዳቔኬ፤ ምክስ ኤይንት ማዓልንግር ኬ ዣእድንክ ሶሊ ምክስዳብ ኤዔድ ዎፕቴባብ ዎላቓባም ሼጄኬ።

ጴጥሮሴሬ ዎፕቴባብናም ሼጄትዳቦ «ዎ ሃዓን እምድንዳ ሶሊ እራ ዳክዬ እራ ዶዖቕዳኬታም ሃዓን እምምድቴ ዬሱስት ናዓምክ ዻዓምታዮ ኡንግካ!» ኪን ጋይሴ።

ሳዓኔሬ ሳዓቢ ዎብንባባ ኤዔሥናም ሃልሽሼ፤ ኖዖሬ ኡንግንትኬ ጎቤክ ሳዓባም ጎዖፕሺ ዬዜ፤ ምክስ ኤይንት ጉርዴን ዋዓር ሃዓቔድ ኤዔድና ሪርቴኬ።

ኤዔድኔሬ ሃልሻቓብ ኤዔሥናም ሼድንትካን ሳዓና ሱዽምሴኬ፤ ጴጥሮሴሬ ኮይን ኬዔን ጋይሴ፤ «ኤዔሥን ኮና ክ ሃልሽንካን ሃራካኔ ሪርዴ? ዎንት ዛምክ ዋይ ዎንት ላቕምክ ኪም ሃልሽሽኮቴ፤ ጋዓጼሬ ኤዔሥን ኮባባም ሃልሽሻቓብን ዬሱስት ዛምኬ ዬሱስ ኪን እምሳቓክ ቡዑድ እዝንትንኬ።»

«ዬሱሳም ክ ዴይስቴምሽ ሮማ ፔጭንት ባዓብስኔን እምሳቔድን ዬቴ፤ ኡክኔት ዬድኔስናም ዴይሴቴ፤ ሳዓቢ ዳይንክ ኪም ዱዑክግራንክ ዻዓስሴ፤ ዬ ዬይዳቓክ ሬይን ኣይቴር ዬዔን ማዓትክንኬሴሬ ሳዓቢ ዪም ሳይሳቓብን ካልሪ ክዜን ዣእቴምሽኬ ክ ዴእድምሼሬ ማዓትካን ዬይዳኬታም ኬዔዝዴድንት ኬዔዜን ቦዖድቴምሽክ ሳዓቢ ዎዖንዬንቴክ ካንክ ቦዖሥሴ፤ ካንካን ዳቔልስዬንታም ዬዔን ኔክሼርቴምሽ ታ ሳዓብዳ ማዓቴቶ ኔጋኔ ጋይንትናም ቴይኬቴ።

ጪሊ ኤዬንት ጌሥዴድና ጴጥሮስኬ ዋንስክ ኬ ኬዔዝዳቓኬትክ ጋእሻ ምዼርሴኬ፤ ካንካን ኬዔም ዬቴኮ ዻክሪ ኤዔር ኬዔም ዻክስሴኬ፤ ዳይንኬሬ ቤድሚ ኤዔድና ጴጥሮስት ኬዔዜናም ዶዖፕስንትክ ቡዑድ እዜኬ ዬሱስክ ቡዑድ እዜድንት ፓይዴና ዶንቕ ሺ ማዓሤኬ።

ሼናክንኮቴክ ኣይሁድንት ኤንሥዴድን ጴጥሮሳምኬ ዋንሳምክ ኤዔድናም ሳዓቢ ኪክን ቔዔሽምሽዴድንት ጌሥዳብንዴኬ ኣቤድን ቡዑድ እዝንትናም ኤንሥዴድንዴክ ኬዔም ታዓዴሬ፤ ጴጥሮሴንኬ ዋንሴንክ «ኤዔሥን ዎብባብን ኮዖም ሃራ ዛሜንቴኬ ኪም ሃልሽሼ?» ጋይሶ ኬዔም ጎይሴኬ።

ጴጥሮሴሬ ኮይን ጋይሶ ኬዔን ማዓስሴ፤ «ኤዔሥን ኮና ሳዓቢ ዪም ሳይሳቓብን ዬሱስት ዛምክ ሃልሾ ብሬዜዬንት ዎእቴ፤ ዬታ ዬሱሳም ሮዖክሴቴ ሳዓቢ ዳይንክ ኣልክምሲ ኪም ዱዑክግራንክ ዻዓስሳቔ! ዬታ ኪም ቴይኬቴ፤ ዳይንኬሬ ዬሱስት ዛምክ ማዓትክንክ ካይሳ ኣብ ዻቕንትት ጎዖጊ ዳክዬ!»

ጴጥሮስኬ ዋንስክ ጋእሻ ዛምክ ኬዔዝንትንኬቴክ ኬዔና ኤንሥዴድና ሪርቴኬ፤ ሃራካኔ ጋዓርስንክ ኬዔና ኤዔድና ኤስንትንት ዳኬድ ኬ ማዓሥምሽ ሼድታ ሃዓቔኬ፤ ዳይንኬሬ ኮዖ ጭርንክ ኬዔና ኤዔድና ዬሱስ ኪክን ኬ ሃዓቕምሽ ጶቕሽቴኬ፤ ጴጥሮሳምኬ ዋንሳምክ ይ ጳሽሻኬት ቡዑር ኬ ካይቴምሽ ጋርሼኬ።