43. ምክስ ኤይ ዎእስምሽ

ዬሱስ ርኬግር ክ ማዓታኬት ቡዑር፤ ክት ራቕክ ሙክዴድና ዬሱስ ኬዔን ኬዔዛቓኬትምሽ ዬሩሳሌግር ዶዖቕሴኬ፤ ኮዖግር ሃዓቔድ ቡዑድ እዝዴድና ሳዓባም ምክስንትካን ጋርክዶቕዶ ሱዽምዳቔኬ።

ኣይሁድ ኤዔድን ቦንክ ቦንክ ሳዓቢ ሴጽንት ቡዑር ዶዖቕዳክ ዶንቕ ታም ሴጽናም ኮዖኔሬ ጴንጤቖስጤ ጋዓርዳክ ሴጼናም ቦንችዳቔኬ፤ ጴንጤቖስጤ ኣይሁድንት እስን ሱዼርዳኬት ሴጼንክ ቦችዳቔኬ ኣይሁድና ሴጼናም ቦንችትካን ኪክዜን ፔጫ ጎይካንክ ዬሩሳሌግር ሃዓዳቔኬ፤ ኮዖ ቦንንክ ዬሱስ ርኬግር ክ ኤባኬት ማዓሪ ዎላቕ ማዓዳኬት ቡዑር ጴንቴቖስቴ ሴጽና ዣእሼ።

ቡዑድ እዝዴድን ሙዳ ኪክዜን ሱዽምስዮ ኬ ዳይክ ጶቕሼርክዳይክ ኬ ሃዓቓክ ኤዬና ሬይ ኡፕሲ ኤስምድምሽንዳ ጋእሼንዳ ዦጌክ ጾዖጼ፤ ኮዖዛንኬሬ ቡዑድ እዝዴድን ሙዴንት ማቴዜን ኖዖት ዞዖጳ ካምድንዳ ሬይ ሃዓፔርሴ፤ ሙዴኔሬ ማንፔስ ጪልንክ ጾዖጼኮ ጋላ ጋሌንዳ ኣፔክ ኬዔዛ ዬዜኬ።

ዬሩሳሌግር ሃዓቔድ ኤዔድና ኡፕስናም ይ ኤሴርታኬንክ ሬይን ማዓዳኬታም ሼድንትካን ቤድሚ ሃዓዴኬ፤ ቡዑድ እዝዴድና ሳዓብት ሪርሽድንዳ ዎዖንናም ኬ ኬዔዝድክ ኤዔድና ይ ኤሴርታኬንክ ኬዔና ሬይናም ኬ ይንትት ኣፔክ ኤስርንትይንቴክ ሪርቴኬ።

ኤዔድን ባግና ኤዔድን ኬዔና ጎዖሽቴኬ ጋይሶ ኬዔን ካንቼኬ፤ ዳይንኬሬ ጴጥሮስ ዻዓምቴትዳቦ ኮይን ኬዔን ጋይሴ፤ «እራ ኤሴርኬቴ! ኬዔና ኤዔድና ጎዖሽኬኬ! ሳዓቢ ማዓትካን ዬይዳኬታም ኬዔዝዳብን እዮኤል <ማቕንታ ሴጽንክ ማንፔስእስታም ኤዔድንዜን ላልድቴ!> ክ ጋይሳቓክ ማዓትካን ዬይዳኬት ኬዔዜና ኮዖክ ቦዖድምዴ።

«ዬ እስራኤል ኤዔድኖ ዬታ ዬ ሼጅምሽኬ ብሬዜኔሬ ዬ ኤስድምሽክ ዬሱስ ሳዓብት ዛምክ ቤድሚ ሪርሽድንዳ ሬይናም ዎዖንሳቓብ ኤዔዴ፤ ዳይንኬሬ ዬታ ኪም ዱዑክሴቴ።»

«ዬሱስ ዴእስንኬሴሬ ሳዓቢ ኪም ዱዑክግራንክ ዻዓስሴ፤ ኮዖኔሬ <ጪልስናም ክ ጫፕቴምሽ ዱዑክግር ኪም ጋራያዬ> ጋዓዳክ ማዓትካን ዬይዳኬት ኬዔዜንት ቦዖድምንትኔ፤ ሳዓቢ ዬሱሳም ኣዓፔካምባብ ኪም ማዓስሶ ክ ዻዓስስምሽ ዎታ ንቓሾቴ።

«ዬሱስ ታ ሳዓቢ ባዓቤንት ምዝዜን ጼካ ካርዜን ዳዬ፤ ኣልክምሲ ዬሱስ ብሬዜን ይ ኬዔዛቓክ ጉሜርንምሽ ማንፔስ ጪልናም ኦይቴ፤ ታ ኬዔና ዬ ሼዴድናምኬ ዬ ኤሴርዴድ ሬይናምክ ዎዖንሳቓብን ማንፔስ ጪልዬ።

«ዬሱስን ኮዖባባም ሮዖክሴቴ፤ ዳይንኬሬ ሳዓቢ ዬሱሳም ባዓቤኬ ሳዓቢ ዪም ሳይሳቓብን ኪም ክ ማዓስሳቕምሽ ዶዖፔን ኤስኬቴ።

ጴጥሮስዳ ኤስርዜን ሃዓቔድ ኤዔድና ክ ኬዔዝዳክ ኬዔዜንክ ቡዑዴኬት ጋእሻ ዎዖልምሴ፤ ካንካን ጴጥሮሳምኬ ዬሱስት ራቕክ ሙክዳቔድናም «ዎንድፕስኬሶ ዎታ ሃሮ ዬይቴ!» ጋይሶ ኬዔም ጎይሴኬ።

ጴጥሮሴሬ ኮይን ጋይሶ ኬዔን ማዓስሴ፤ «ሳዓቢ ዳቔልስዬንታም ኔጋኔ ዬዔን ክ ጋዓቴምሽ ዬታ ሙዴና ሳዓብዳ ማዓቴቶ ዬሱስ ክርስቶስዜን ቡዑድ እዝንትክ ሼርኬቴ፤ ኮዖት ቡዑር ኖዖ ዬዔን ማንፔስ ጪልንት እሜናም ታዓሬ ዬዔን እምምዴ።»

ማኬን ሺ ማዓዴድ ኤዔድና ጴጥሮስ ኬዔዛቓኬታም ዶዖፕሴኮ ቡዑድ እዝንትክ ዬሱስት ራቕክ ሙክዴድ ማዓሤኬ፤ ኬታ ሽኤርሼኮ ዬሩሳሌግር ዶዖቕዳክ ምክስ ኤይንት ዋዓር ፓይድምሴኬ።

ዬሱስት ራቕክ ሙክዴድን ጋርክዶቕዶ ኦይቴርቴድንት ኤስንትናም ኤሴርሴኬ፤ ኪክን ዎላቕ ማዓሦ ዶዖቕንትክ ኪክን እሥዳቔኬ ዎላቓብና ኣባብንካን ምክስዳቔኬ ኪክን ሳዓባም ጎዖፕሽዳቔኬ ይንት ዶዖቕድንዳ ሬያም ሙዳ ኪክ ኪክን ካሽምዳቔኬ፤ ኤዔድን ሙዴኔሬ ኬ ጎዖካን ላቕምንዳ ሬያም ጶቕሽዳቔ ሴጻ ሙዴክ ቤድሚ ኤዔድን ቡዑድ እዝዳቔኬ።