42. ዬሱስ ርኬግር ክ ማዓትምሽ

ዬሱስ ዱዑክግራንክ ክ ዻዓምታቓክ ሴጽንክ ክት ራቕክ ሙክዴድንግራንክ ቓስቴኔድን ኡሣ ዶዖቕዳክ ካትሜንግር ካይዳቔኬ፤ ኬ ሙክድኬሬ ዬሱስዜን ዣእሻቓክ ሬይንጎክ ኬዔዝምዳቔ ኖዖ ሳዓቢ ዪም ሳይሳቓብን ክ ማዓሥምሽ ጉሜርዳቔኬ፤ ዳይንኬሬ ኮዖ ሴጼንክ ኪም ዴይሴርሴ ጋዓርዳኬትኬ ታ ማዓኔና ኣልካ ኣዓፔክ ማዓቴ ጋይሴኬ፤ ቓስቴንን ክት ራቕክ ሙክዴድና ይ ቡዑድ እዝዳብናም ኤሳቔኬ።

ዬሱስ ኬራ ኡሥቴትዳቦ ኬ ኪክን ሙክንት ዬዜ፤ ኬታ ዳይንክ ኪም ኤሳቔኬ፤ ሬይ ሃራካን ኬ ኬዔዝምዳቕንኬሬ ኬዔም ጎይሴ፤ ኬቴሬ ኣንቓእስ ቶክሚ ሴጽት ብሬዜን ማዓሣቓክ ሪርሽድንዳ ሬይን ሙዴካን ኪን ኬዔዜኬ ዬሩሳሌምግር ማዓሣቓክ ሬይናም ኤሳይባብ ሾዖቺ ኪክን ይ ኬዔዝምድምሽ ጶቕሼኬ።

ኮዖዛንኬሬ ዬሱስ ሳዓቢ ዪም ሳይሳቓብንጎክ ኬዔዝዳክ ሳዓብት ኡፕስናም ኬዔን ፕእስትዮ ኬዔዜ፤ ሳዓቢ ዪም ሳይሳቓብን ካልሪ ዜንክት ዣእድምሽኬ ኪም ዴይሴርድምሽክ ዳይንኬሬ ማክምሲ ሴጽንክ ክ ዻዓምድምሽ ሳዓብት ማዓትካን ዬይዳኬታም ኬዔዝዴድን ኬዔዛቓኬታም ኬዔን ጶቕሽሼ፤ ኤዔድን ቓስቴንኔሬ ጌሥካን ይ ዝግዛቓክ ኬትሜንግር ኬ ዣእሻኬንክ ፔጬና ሃክስካን ዬይዳቕንካን፥

ኤዔድን ቓስቴንና ኬ ኪክን ክ ጌሣን ዬሱሳም ጎይሴኬ ኖዖሬ ጎይስንኬታም ኤዔእሴ፤ ሶይቲ እሥምካን ኬ ኡስምዳኬንክ ዬሱስ ባልሽናም ቴዮ ሳዓባም ጎዖፕሼ፤ ዜናንኬሬ ባልሽናም ቱርሼ፥ ጶቕሻቕዶቕዶ ዬሱስ ማዓትንትንክታም ኤስቴኬ፤ ዳይንኬሬ ኮዖ ጭርንክ ኖዖ ኬራንክ ኣዓችምሼ።

ኤዔድን ቓስቴንና «ዬሱስ ይንትዬ! ሳዓብት ኡፕስናም ዎዖን ፕእስትዮ ክ ኬዔዝዳኬንክ ብዑዴዎንት ዎዖልምድክ ሃዓቓክ ካንካኔ!» ጋይሴኬ፤ ሳዓኔሬ ዬሩሳሌምግር ማዓቴኬ፤ ይ ዣእሻኬንኬሬ ክት ራቕክ ሙክዳቔድንቴን «ዬሱስ ኣዓፔክ ዳዬ! ኪም ሼድቶቴ ጋይሶ ኬዔን ኬዔዜኬ።

ክት ራቕክ ሙክዳቔድኔሬ ኬዔዝማሮ ኬ ዳይክ ዬሱስ ኬ ጶቕሽክዳይክ ኬ ሃዓቓክ ኤዬንግር ሞልትግርኬት ሃዓፕርንትክ «ላቕምን ዬዔን ማዓታኔ!» ኬዔን ጋይሴ፤ ክት ራቕክ ሙክዴድኔሬ ማንፔስ ኬ ሼድንዳ ኬዔን ካምሳቔ፤ ዬሱስ ዳይንክ «ሃራካኔ ጳሽዴ፥ ሃራካኔ እቼርዴ? ኣዓንእስታምኬ ዱዑትእስታምክ ሼድኬቴ፤ ማንፔስና እይምሽ ዜኔኬት ዳክዬ» ኬዔን ጋይሴ፤ ማንፔስ ይ ማዓትካኬታም ኬ ዶዖፕስቴምሽ እሥሚ ኪን ኬ እምቴምሽ ኬዔም ጎይሴ፤ ኬቴሬ እሥምኬ ኣሤርቴንዳ ቶይሌክ ኪን ኬ እምስክ እሤ።

ዬሱሴሬ «ሳዓብት ኡፕስና እጎክ ክልኬርሳቓክ ሙዳ ቦዖሥምንት ኮዖም ዝክስዴ ጋይስቶ ዬዔን ኬዔስትቴ» ጋይሴ፤ ኮዖ ጭርንክ ሳዓብት ኡፕስናም ኬ ዶዖፕስቴምሽ ማክሣኬታም ኬዔን ፖዖቼ፤ «ሳዓቢ ዪም ሳይሳቓብንዜን ካልሪ ዣእድምሽ፥ ክ ዴእድምሽ፥ ማክምሲ ሴጽንክ ዱዑክግራንክ ክ ዻዓምድምሽ ቤድሚ ቦንት ብሬዜን ክልኬርቴ» ኬዔን ጋይሴ።

ኣልክምሲ ክልክሜንግር ዳቔልሲ ኤዔድንቴን ኔጋኔ ጋይንትናም ሃዓፕንትካን ኤዔድ ሙዳ ሳዓብዳ ኬ ማዓቴምሽ እስት ራቕክ ሙክዴድና ኬ ኬዔስቴምሽ ክልኬርቴ፤ ኬታ ዬሩሳሌምዛንክ ዬዞ ኮዖም ዎዖንዴኬ፤ ኮዖዛንኬሬ ካሪ ሙዴዜን ዶዖቕዴድ ኤዔድንዴኬ ሱሴን ሙዴዳ ካይዴኬ፤ ዬቴሬ ሬይን ኬዔኔት ንቓሽእስቴቴ።

ኮዛንክ ኦስ ኦይዲ ታም ሴጽንግር ዬሱስ ቤድሚ ካርክ ይንት ራቕክ ሙክዴድንዳ ሃዓፔርሴ! ዶንቕ ማቶ ማዓዴድካን ካሪ ዎላቔክ ሃዓፕምቴ! ኣዓፔክ ክ ማዓሥምሽ ቤድሚ ጎዖግክ ይንት ራቕክ ሙክዴድንቴን ኣይቴር ማዓስሳቔ፤ ሳዓብት ባዓምንጎካኔሬ ኬዔም ኤስስቴ።

ዬሱስ ይንት ራቕክ ሙክዴድንቴን ኮይን ኬዔን ጋይሴ፤ «ጋዓንሚ ሙዳ ርኬግርኬ ፔጬዜንክ ኢን እሜርቴ፤ ካንካን ካይኬቴ፥ ኤዔድንቴን ሙዳ ሳዓቢ ባዓቤን፥ ሳዓቢ ይንሥስን፥ ሳዓቢ ማንፔስ ጪልንቴሬ ናዓምክ ኬዔም ሽእሻሬቶ እ ኬዔዛቓኬታም ሙዳ ኬ ቦዖሥቴምሽ ኬዔም ኤስሳሬቶ እስት ራቕክ ሙክዴድ ኬዔም ማዓስኬቴ፤ እታ ፔጬንት ማቕንቴክ ዬካ ሙዳ ሴጽ ዬ ኪክን እ ማዓድምሽ ጶቕሽኬቴ።

ዬሱስ ዱዑክግራንክ ክ ዻዓምታኬት ኦይዲ ታም ሴጽንት ቡዑር ይንት ራቕክ ሙክዴድንቴን «ማንፔስ ጪልን ዬዜን ሃዓዳኬንክ እባዓብ ዛምን ዬዔን ክ እምስቴንክ ዬካ ዬሩሳሌምግር ዶዖቕኬቴ» ኬዔን ጋይሴ፤ ኮዖት ቡዑር ዬሱስ ፔስ ርኬግር ኤቤ፤ ሊሌኔሬ ኣዓፕዜንኬታንክ ኪም ኣዓቼ ዬሱስ ፕዥር ሙዴናም ጌሥንትካን ሳዓብት ምዝዜን ዶዖቕሴ።