41. ሳዓቢ ዬሱሳም ዱዑክግራንክ ኪም ዻዓስስምሽ

ፖዖልስና ዬሱሳም ይ ሮዖክሳኬት ቡዑር ቡዑድ እዝዴድን ኣይሁድንት ኤንሥዴድን ጵላጦሳም «ታዉዳብስን ዬሱስን ካዓባብ ማክምሲ ሴጽንት ቡዑር ዱዑክግራንክ ዻዻዓምድቴ ጋይሳቔ፤ ክት ራቕክ ሙክዴድና ሌይስንክታም ኬ ዲባይምሽኬ ዱዑክግራንክ ዻዓምቴ ኬ ጋዓይምሽክ ኤስንትካን ኤዔድ ዎላቕባብ ዱዑክናም ጶይንቲ ዝክስዴ» ኪን ጋይሴኬ።

ጵላጦስ «ዎላቕ ዎላቕ ፖዖልስናም ቴዬቶ ዱዑክናም ዬዔን ማዓድምሽ ጶዬርቴምሽ ማዓስኬቴ» ኬዔን ጋይሴ፤ ካንካን ዱዑክንግር ኣርዴርዳኬትዳ ዶዖቕዳክ ሴይንንዜን ጴዔጲ ዬሥሴኮ ሌይስንዜክታንም ሃይዬሬ ዲባይምሽ ኤስንትካን ኮዖግር ፖዖልስናም ዎይሴኬ።

ዬሱሳም ሮዖኬርዳኬንክ ሳዓብት ሃዉሽ ሴጽን ሃዓቔ፤ ኣይሁድን ኮዖ ሴጽንክ ዱዑክግር ኬ ካይቴምሽ ዝክሳይ ሃዓቔ፤ ካንካን ሃዉሽ ሴጽንት ቡዑር ዣማ ጌልቲ ቤድሚ ማይንሥን ሌይስዜን ዎሽሚ ካይንትካን ዬሱስት ዱዑክንግር ካይካን ኡስምሴኬ።

ጶቕሼርክዳክ ጋእሼንዳ ፔጫ ሾይሼ፤ ጳልቕንትምሽ ሻዓክድንዳ ሳዓቢ ርኬግራንክ ዎዖንይንትካን ክ ኦይዳብን ርኬግራንክ ሃዓፔርሴ፤ ዱዑክንት ኣርድንት ካርናም ዚጼርሳቓብን ሴይንስናም ዛዓክሴትዳቦ ዜን ዶዖቕሴ፤ ዱዑክናም ጶይዜን ሃዓቔድ ፖዖልስና ጳሼኮ ዴእቴድ ኤዔድምሽ ማዓሤኮ ፔጬዜን ቡኬልሴኬ።

ማዓኔና ዱዑክንዳ ኬ ዣእሻኬንክ ሳዓቢ ርኬግራንክ ዎዖንይንትካን ክ ኦይዳብን «ሃይ ጳሽኬቴ ዬሱስ ኩዑር ዳክዬ፤ ዱዑክግራንክ ዻዻዓምድቴ ጋይስዮ ይ ኬዔዛቕምሽ ዱዑክንግራንክ ዻዓምቴ! ዱዑክናም ሼጄቶ ዶዖፕስኬቴ» ኬዔን ጋይሴ፤ ማዓኔኔሬ ዱዑክንግር ኣርዝዮ ሼድንትክ ዬሱስት ሌይስን ዎዴሻቓኬት ካርናም ሼጄኬ፤ ሌይስንክት ኮዖግር ዳክ ሃዓቔ።

ኮዖዛንኬሬ ሳዓቢ ርኬግራንክ ዎዖንይንትካን ክ ኦይዳብን ማዓኔንካን «ካይኬቴ ዬሱስ ዱዑክንግራንክ ዻዓምቴ ዬዔን ብርትዮ ጋሊላ ካይዴ ጋይሴቶ ክት ራቕክ ሙክዴድንቴን ኬዔስኬቴ፤» ኬዔን ጋይሴኬ።

ማዓኔና ጳሻሬኬ ጋእሻ ጉሜራሬኮ ማዓቴኬ፤ ክላ ኬዔዛም ክት ራቕክ ሙክዳቔድኔን ኬዔዝንትካን ሃዝምክ ካዬኬ።

ማዓኔና ክላ ኬዔዜናም ክት ራቕክ ሙክዴድንቴን ኬዔስካን ሙክንትዜን ኬ ዳይክ ዬሱስ ኬራ ሃዓፕምሴ፤ ኬቴሬ ኪን ጉምፔርሴኬ፥ ዬሱሴሬ «ሃይ ጳሽኬቴ ጋልሌግር ኬ ካይቴምሽ እስት ራቕክ ሙክዴድንቴን ኬዔስኬቴ፤ ኮዖግሬሬ ኢም ሼዴኬ» ኬዔን ጋይሴ።