40. ዬሱሳም ሮዖኬርስምሽ

ፖዖልስና ዬሱስዜን ኬ ላጻኬት ቡዑር ኪም ሮዖክካን ቴዮ ካዬኬ፤ ኪም ዜን ሮዖኬርዳኬታም ክ ባልቴምሽ ማዓስሴኬ።

ፖዖልስና ዬሱሳም «ማቴት ጉስዬ» ጋዓርዳክ ካርንዜን ኪም ታዓዴኮ ኣዓንንክታምኬ ዱዑትንክታምክ ማስቔልንት ዜን ቶሼኬ፤ ዬሱስ ዳይንክ «እባዓቦ ይ ዬይዳኬታም ኬ ኤሳይንካን ኔጋኔ ኬዔን ጋዓካዮ» ጋይሴ፤ ጵላጦስ ጴዔጵንዜን «ኣይሁድንት ባዓብስን» ጋይሴኮ ኬ ክልክቴምሽኬ ዬሱስት ማቴርጎክ ማስቔልንዜን ኬ ዎድቴምሽ ኬዔዜ።

ፖዖልስና ዬሱስት ኣብሌንዜን እጣ ዣቕሼኬ፤ ኮዖም ኬ ዬእዳኬንክ «ኣብሌእስታም ካሽምቴኬ፥ ኣብሌእስትዜኔሬ እጣ ዣቕሼኬ» ጋዓዳክ ማዓትካን ዬይዳክ ኬዔዝትናም ኬዔዜናም ቦዖሥሴኬ።

ዬሱስ ቓስቴን ቡራ ቡሮ እሥዴድንት ሞልትግር ኪም ሮዖክሴኬ፤ ዎላቓብን ዬሱስዜን ላጼ፤ ኣብባብና ዳይንክ «ሃዓና ሳዓብካን ጳሻያዮ? ዎታ ባሢ ኤዔዶቴ ኤዔሥን ኮና ዳይንክ ባሢ ክዜን ዳክዬ» ጋይሴ፤ ኮዖዛንኬሬ ዬሱሴን «ዋዓዴ ባዓምሃንትግር ኢም ጶቕሽካዮ» ኪን ጋይሴ፤ ዬሱስ ኪን «ክና ሳዓብት ኮርሚ ሃዓምንግር እ ኪክን ማዓዳዬ» ጋይሶ ኪን ማዓስሴ።

ኣይሁድንት ኤንሥዴድንቴኬ ኤዔድንቴክ ሞልትግር ሃዓቔድ ኣቤድ ኤዔድን ዬሱስት ዜን ላጼኬ፤ «ሳዓብት ይንሢ ሃ ዳይንክ ማስቔልንዛንክ ሃቻዮ ሃማታም ዻቕሽካ! ኮዖት ቡዑር ሃዜን ቡዑድ እዝዶቴ» ኪን ጋይሴኬ።

ጭሪና ሮዖርታ ኮ ማዓድንኬሴሬ ፔጫ ሙዴዜን ርኬና ጋእሻ ዹሚ ማዓሤ፤ ላዓ ጭሪዛንክ ዎልቓንታሜርስ ጭሪክ ኬካ ይ ዹምስምሽ ካፕሴ።

ኮዖት ቡዑር ዬሱስ «ቦዖድምሴ! እባዓቦ ኡክናእስታም ኣዓንዛሃንት እምድቴ» ጋይሶ ኡፕሲ ጫዓጭክ ኡዑግምሴ፤ ኮዖዛንኬሬ ማቴይንታም ይርክስ ዬእሴትዳቦ ኡክናይንታም እምሴ፤ ክ ዴእሳኬንክ ፔጫ ሾይሼ፤ ጪሊ ኤዬንግር ሃዓቓክ ኤዔድናም ሳዓብዳ ማሽምናም ፓዓሻቓክ ጋእሻኣክ እቤርሽታ ኣብሌና ፔያንክ ዬዞ ሾኬካ ቓስቴን ካርዜን ሃእሴ።

ዬሱስ ይንት ዴእንጎክ ሳዓብዳ ኬ ሃዓድቴምሽ ኤዔድንካን ጎዖጊ ኬዔን ፖዖቻቔ፤ ዬሱሳም ጶይዜን ሃዓቓብን ፖዖልስን ማዓሣቓክ ሬይን ሙዳም ይ ሼጃኬንክ «ዶዖፔን ኮባብ ኤዔሥን ባሥክት ዳክዬ፥ ሳሽብቴሬ ይንሥዬ» ጋይሴ።

ኮዖ ጭርንክ ዬሱስ ሳዓቢ ዪም ሳይሳቓብን ማዓትንትንክታም ዶዖፕሳቔድ ቓስቴን ኣይሁድንት ኤንሥዴድን ዬሶፕኬ ኒቔድሞስክ ዬሱስት ሌይስናም ኬዔን እሜርቴምሽ ጵላጦሳም ምክሴኬ፤ ሌይስንክታም ኣብሌክ ኦቼኮ ሴይኒ ላዓላም ጫቕቶ ኡሴርሳቕንዳ ዱዑክግር ኪም ዱዑክሴኬ፤ ኮዖዛንኬሬ ካሪ ሼግናም ዚጽንትካን ዱዑክንት ኡዝሜክ ኣፔናም ሴይኒ ዜን ዛዓክስቶ ዎይሴኬ።