39. ዬሱሳም ቤዔርካን ዎይሴርሴ

ታ ጭርና ሶይቲ ካዓስማ ማዓሥንካን ኤዔድናም ሳዓቢ ኪክን ቔዔሽምሽዴድንት ጌሥዳብን ኪም ክ ጎይስቴምሽ ፖዖልስና ዬሱሳም ክራ ዬትዮ ካዬኬ፤ ጴጥሮስ ፔግማ ማዓሦ ቡዑርክት ኬራ ሙክዳቔ፤ ዬሱሳም ኤዔርክት ኬ ኣርሥሳኬንክ ጴጥሮስ ማዓልጎክ ዶዖቕሶ ኖዖ ኦይዼርዳቔ።

ኤዬንት ግድር ኣይሁድንት ኤንሥዴድን ዬሱሳም ቤዔርካን ታዓዴኬ፤ ክጎዖክ ታዋሬኮ ናቔሽዴድ ቤድሚ ንቓዓሽ ታዓዴኬ፤ ዳዓኖንምሺ ኬዔዜኔኬት ኪክን ኤዔድምክዬ፤ ካንካን ኣይሁድንት ኤንሥዴድና ዬሱስ ሬይ ሃምንጎኬሬ ባሥቴባብ ማዓትንትንክታም ዶዖፕስንት ኬዔን ማዓትክዬ።

ማቕንቴዜኔሬ ኤዔድናም ሳዓቢ ኪክን ቔዔሽምሽዴድንት ጌሥዳብን ዬሱሳም ኡዝሜክ ሼጄትዳቦ «ዎዖን ኬዔስካ ሃዓና ሳዓቢ ሃዓም ሳይሳቓብን ሌፒ ሴጽ ዶዖቕዳብን ሳዓብት ይንሥስናዮ?» ኪን ጋይሴ።

ዬሱሴሬ «እትቴ ታ ኮይን ሳዓቢ ኪክን ዶዖቕስቶ ርክርግራንክ እ ሃዓድክ ሼዳዬ» ኪን ጋይሴ፤ ኤዔድናም ሳዓቢ ኪክን ቔዔሽምሽዴድንት ጌሥዳብን ጋዓምክ ኣብሌይንታም ሃእስንትክ ኣቤድን ቡዑድ እዝንትናም ኤንሥዴድንቴን «ኣቤድ ንቓዓሽ ዎዖም ዝክሳዬ! ሳዓብት ይንሥስንቴ ክ ጋዓድክ ዉርስቴቴ ዬ ቤዔርዳክ ሃሬ?» ጋይሶ ኡፕሲ ጫዓጭክ ኬዔዜ።

ኤንሥዴድን ሙዴና «ዴእንቲ ኪም ዝክስዴ!» ጋይሶ ኤዔድናም ሳዓቢ ኪክን ቔዔሽምሽዴድንት ጌሥዳብንካን ማዓሲ ኬዔዜኬ፤ ኮዖዛንኬሬ ዬሱስት ኣዓፓም ኦቼኬ፥ ዜንክት ትጽምሴኬ፥ ኪም ግእሴኬ፥ ዜንክት ላጼኬ።

ጴጥሮስ ኤዬንት ማዓልጎክ ጶይዜን ክ ዳይክ ኤዬንግር ፕክሽዳቕንዳ ማይንሥ ኪም ሼድንትክ «ሃዓና ዬሱስ ኪክን ሃዓቓዬ!» ኪን ጋይሴ፤ ጴጥሮስ ኮ ኬዔዝዳኬታም ዶዖፕስክዬ፤ ኮዖት ቡዑር ኣብኣክ ማይንሥ ኤዬንግር ፕክሽድንዳ እናማኬትምሽ ኬዔዜ፤ ጴጥሮሴሬ ኣልክምሲ ዶዖፕስክዬ፤ ማቕንቴዜን ኤዔድና «ዬታ ሙዴና ጋልላንክ ዬ ማዓሥንካን ሃዓና ዬሱስ ኪክን ማዓትንትሃንታም ኤሴስዶቴ» ኪን ጋይሴኬ።

ኮዖዛንኬሬ ጴጥሮስ «ኤዔሥን ኮባባም እ ኤስድንዳ ማዓሥንክ ሳዓብት ኣሼትና እዜን ኮ ማዓታኔ!» ጋይሶ ጫዓቕሼ፤ ሳዓኔሬ ባዓቻ ቒቕሴ፤ ዬሱሴሬ ዋሌ ጋዓቶ ጴጥሮሳም ሼጄ።

ጴጥሮስ ካዬትዳቦ ጋእሻ ኤዔፕሴ፤ ኮዖና ኮይን ማዓድክ ዬሱሳም ዬሥትዮ እምሳቓብን ይሁዳ ኣይሁድንት ኤንሥዴድን ክ ዴእቴምሽ ዬሱስዜን ኬ ቤዔርስምሽ ሼጄ፤ ይሁዳ ኣትርክ ካሌርቶ ካዮ ይካሣም ሮዖክትዮ ዴእሴ።

ሼናክንኮቴክ ዣማ ጌልትዜን ኣይሁድንት ኤንሥዴድን ዬሱሳም ሮማ ኤዔድንት ፔጬናም ጌሥዳብን ጵላጦስዳ ኪም ታዓዴኬ፤ ጴላጦስ ዬሱሳም ዳቔልስታባባዬ ኪን ጋዓካንኬ ክዜን ቤዔርካንክ ክ ዴእቴምሽ ማማዓስዴ ጋይሶ ጉሜርዳቔኬ፤ ጵላጦስ ዬሱሴን «ሃዓና ኣይሁድንት ባዓብስናዮ?» ጋይሶ ኪም ጎይሴ።

ዬሱስ ኮይን ጋይሶ ኪን ማዓስሴ፤ «ሃዓና ጋይሳዬ ዳይንኬሬ ባዓምእስት ፔጬዜናማ ባዓሚ ዳክዬ፤ ኮይን ማዓዳቕንክ እስት ፕክሽዴድን እካን ዳዓሚ ዶዶብዳቔኬ ሳዓብጎካን ዶዖፔንናም ኬዔዝንትካን ፔጬዜን ሃዓድትቴ፤ ዶዖፔናም ናሽዴድን ሙዳ እራ ኤሴሴርዴኬ፤» ጵላጦሴሬ «ዶዖፔንን ሃሬ?» ጋይሴ።

ጵላጦስ ዬሱስ ኪክን ይ ኬዔዝምሳኬት ቡዑር ኤዔድንዳ ዉታቕሴትዳቦ «ኤዔሥን ኮዖት ሃሬሴሬ ባሥክት ሃዓፕክቴ» ጋይሴ፤ ኣይሁድንት ኤንሥዴድንኬ ኤዔድንክ ዳይንክ «ኪም ሮዖኬ!» ጋይሶ ኡፕሲ ጫዓጭክ ኦዖዤኬ፤ ጵላጦስ «ኖዖ ባሥባብ ዳክዬ» ጋይሶ ኬዔን ማዓስሴ፤ ኬታ ዳይንክ ጋዓጺ ኦዖዤኬ ኮዖዛንኬሬ ጵላጦስ ማክምሲ ካርክ «ባሢ ክዜን ዳክዬ!» ጋይሴ።

ጵላጦስ ኤዔድና ኦዖዥ ቤሥዴኬ ጋይሶ ጳሼ፤ ካንካን ዬሱሳም ኬ ሮዖክቴምሽ ፖዖልስኔን ኬዔዜ፤ ሮማ ፔጬንት ፖዖልስና ዬሱሳም ቶእሴኬ ዜይምንዳ ኣብሌሬ ኪም ቖፕሴኬ ኣልካ ኡክሜሬ ጋይብቴኮ ማቴዜክት ዎጄኬ፤ ኮዖዛንኬሬ «ኣይሁድ ኤዔንት ባዓብስኔ!» ጋይንትክ ዜንክት ላጼኬ።