3 ካይሳዳክ ኖቔና

ሮዖትሚ ቦንት ቡዑር ቤድሚ ኤዔድ ፔጬዜን ዶዖቕዳቔ፤ ኬቴሬ ጋእሻ ዳቕሊ ኤዔድኬ ዛሜድ ማዓሤኬ፤ ዳቔልስኔሬ ጋእሻ ቤድንትንኮቴክ ሳዓቢ ፔጬናም ሙዳ ኣቕዝንትክ ካይስድንዳ ኖቓ ዜንኬት ታዓድቴ ጋይሶ ጶቕሼ።

ኖህ ዳይንክ ሳዓብዳንክ ስልሜት ሃዓፕሴ፤ ኖህ ይንት ቦንንግር ዶዖቕዴድ ኤዔድን ሙዴዛንክ ጋዓጺ ጪልባብኬ ባሥግራንክ ፔግምቴባብ ኤዔድ ሃዓቔ፤ ሳዓቤሬ ታዓድካን ይ ጶቕሻቓክ ካይስዳክ ኖቔንጎክ ኖህካን ኬዔዜ፥ ካንካን ኖህ ጋእሼባብ ማርኬብ ጋዓርዳክ ኖቔዜን ካይዳኬታም ክ ኣክሻን ሳዓቢ ኬዔዜ።

ሳዓቤሬ ኖሄን ማርኬብ ክ ኣክሻን ኬዔዜ፤ ማርኬብንቴሬ ሮዖትምና ቓስቴን ማቶኬ ቓስታንታሜስ ኣዓኒ (140) ሾሽንኮት ኦይዲ ታምኬ ላዓ ኣዓኒ (23) ፔስንኮት ቦንዴኬ ላዓ ኣዓንኬ ባግክ (13.5) ኣዓኒ ዳዓኔ ጋይሴ፤ ኖህ ኮዖም ኣክሽዳክ ማርኬብና ሃዓቔግራንክ ኣክሼርሻቕንዳ ማዓሦ ፔስ ማኬን ካርክ ኤዬት ዜን ኤያ ማዓስሶ ቤድሚ ጎፓካማ ዱዑርኬ ፑላኮት ዶዖድንዳ ሃዓቔ፤ ናዓሬ ኖሃምኬ ኤዔር ኤዔድንክታምክ ሬይ ሙዳሜሬ ፔጬዜናማ ቖልማም ካይስዳክ ኖቔንግራንክ ክ ጶይቴምሽ ኪን ኬዔዜ።

ኖሄሬ ሳዓብካን ኤዔእንትክ ሳዓቢ ኬዔን ኬዔዝምሽ ኪኬ ማኬን ይንሥንክትክ ማርኬብናም ኣክሼኬ፤ ናዓሬ ጋእሼንዳ ኮ ሃዓቕንካን ኣክሼርድክ ቤድሚ ቦን ማቕሴ፤ ኖህ ዣእዳክ ካይስዳክ ኖቔንጎካን ኤዔድንካን ጶቕሽሻሮ ሳዓብዳ ኬ ማዓቴምሽ ኬዔን ኬዔዝዳቔ ዳዓኖንምሺ ክራ ዶዖፕስኬኬ።

ሳዓቢ ኖህካንኬ ኤዔር ኤዔድንክቴንክ ዝክስድንዳ እሥማም ይማትካንኬ ቖልሜንካንክ ኬ ሱዽቴምሽ ኬዔዜ ሬይ ሙዳም ኡሴርሳኬት ማርኬብንግር ኣርድንትካን ኖህካንኬ ማይንክቴንክ፥ ማኬንን ኣንግ ይንሥንኬ ማዓኔንኬቴክ ሴጼና ዣእንትንኮታም ኪን ኬዔዜ፤ ቓስታንታሜርስ ኤዔድኔሬ ማርኬብንግር ኣርዜኬ።

ሳዓቢ ካይስዳክ ኖቔንግራንክ ኬዔም ጶዬርቴምሽ ቖልሜን ሙዴንት ኣንጋምኬ ማዓምክ ኣፕታሜሬ ጉጅትዮ ኖህይዳ ኬዔም ኦይቴርሴ፤ ጪልሽት እሜካን ማዓዴድን ታብዛ ኣንግኬ ማዓ ቖልምክ ሙዴንግራንክ ኖሄዳ ማርኬብንግር ኦይቴርሴ፤ ሙዴኔሬ ማርኬብንግር ኬ ኣርዝምሽ ሳዓቢ ይንቲ ማርኬብንት ፑልቴናም ዚጼ።

ኮዖዛንኬሬ ዶዖብና ቓኒ ዬዜ ቓኖ ቓኖ ቓኖ ጋርክሲ ኦይዲ ታም ሴጽካን (40) ሶይትክ ሮዖርክ ቓንሴ፤ ፔጬንግራንኬሬ ቱዑቲ ፑእዳቔ ፔጫጎይክ ዶዖቕዳክ ሬይ ሙዳ ኖቔክ ቕጭምሼ፤ ሮዖትሚ ባሌኔሬ ካንክ ኔክዳይክ ኖቔክ ኣዓችምሼኬ።

ማርኬብንግር ሃዓቔድን ኤዔድንግራንክ ካይሳ ፔጬዜን ዶዖቕዳቔድ ሬይ ሙዳ ዴእሴ፤ ማርኬብቴኔሬ ኖቔት ዜን ኮ ሽርድክ ዋዓርኮት ዶዖቕዴድ ሙዴናም ዴእግራንክ ኬዔም ዻቕሼ።

ዶዖብን ቓንን ጋርሻኬት ቡዑር ማርኬብቴንን ኣርፒ `ዶንቕካን ኖቔት ዜን ሽራሮ ዶዖቕሴ፤ ኮዖ ሴጽንክ ኖቔና ዦዖጊ ዬዜ፥ ሴጻ ዎላቕማት ማርኬብቴና ባሌት ማቴዜን ሃዉሼ፤ ዳዓኖንምሺ ፔጫ ሙዴናም ታዓሬ ኖቓ ኣቕዝምስዮ ዳዬ፥ ኣርፒ ማኬንት ቡዑር ባሌንት ማቴና ሃዓፕሪ ዬዜ።

ኦይዲ ታም ሴጽት ቡዑር ኖህ ኖቔና ፔጬዛንክ ዎችታ ዳይንክ ኮ ሼቴምሽ ኣፕቲ ቑዑራካም ኦይሤ፤ ቑዑራኬኔሬ ሴሴሬ ሴንኬሬ ፔዔታሮ ፔጫ ዎቻም ሃዓፕካን ኮዖን ማዓትክዬ።

ቡዑሬሬ ኖህ ዎሎላም ኦይሤ፥ ዳዓኖንምሺ ኮ ሃዓዉሽድንዳ ፔጫ ሃዓፕንትንካን ኮዖን ማዓትክንካን ኖህዳ ማዓቲ ሃዓዴ፤ ማዓሪ ዎላቕት ቡዑር ኖህ ኣልካ ዎሎልቴናም ኦይሤ ናዓሬ ሃዓቓ ዣንጌርት ቓልኣም ኣፔግርንት ቴዮ ሃዓዴ፤ ኖቔና ዦዖጋሮ ሃዓቕንካን ሬዬሬ ኣልካ ፔጬዜን ባቕላ ዬዜ።

ኖህ ታዓሬ ማዓሪ ዎላቕ ጶይሶ ዎሎላም ማክምሲ ካርክ ኦይሤ ኮዖ ሴጽንክ ይ ሃዉሽድንዳ ካሪ ሃዓፕንትክ ማዓትዮ ክራ ሃዓትክዬ፥ ኖቔኔሬ ዎቻሮ ሃዓቔ።

ኣርፒ ቓስቴንት ቡዑር ሳዓቢ ኖሄን ሃዓና ሃንት ኤዔር ኤዔድንኬ ቖልሜንክ ሙዳ ማርኬብንግራንክ ዉትኬቴ ኪን ጋይሴ፤ ኤዔር ኤዔድንክቴሬ ማርኬብንግራንክ ዉታቕሴኬ፤ ቤድሚ ይንሣምኬ ይንሥት ይንሣምክ ኣእሴኬ ፔጬንኬሬ ጾዖጼኬ።

ኖሄሬ ማርኬብንግራንክ ክ ዉታቕሳኬት ቡዑር ጪልሽት እማ ካር ኣክሼትዳቦ ጪልሽት እሜካን ማዓዴድ ቖልማ ሙዴግራንክ ሳዓብካን እማ እምሴ፤ ሳዓቤሬ ጪልሽት እሜንክ ጉሜርሴ ኖሃምኬ ኤዔር ኤዔድንክታምክ ኣንጄ።

ሳዓቤሬ ኮይን ጋይሴ፤ «ኤዔድን ኬ ዎዖንዳኬ ዳቕሊ ሬይንጎክ ኣልክምሲ ፔጫም ዎላቔሴ እ ኣሻያኬታም ጫዓቓ ኣርድቴ፤ ሃስን ዳይኬሴሬ ኤዔድና ይንሥርምዜይንታንክ ዬዞ ዳቕልሲ ኤዔድ ኬ ዳይንኬሬ ፔጬናም ኣልክምሲ ካይስድንዳ ኖቔክ ካይሳይቴ» ጋይሴ።

ሳዓቢ ይንት ጫዓቓ ኣርትንት ጴዔጵ ማዓቴምሽ ኤናንክ ዳክንዳ ዙላም ኣክሼ፤ ሙዳ ሴጽክ ዙላም ርኬዜን ሃዓፔርዴ ሳዓቢ ኮዖ ዙልንጎክ ኤዔድንካን ይ ኣርዛቓክ ጫዓቔናም ኤስምስዴ።