38. ዬሱሳም ዬሥትዮ እሜርሴ

ኣይሁድና ቦንክ ቦንክ ሳዓቢ ሴጽናም ቦንችዳቔኬ፤ ኮዖኔሬ ሳዓቢ ሴጽና ቤድሚ ቦን ፓይዴርክንዴት ብሬዜን ሳዓቢ ብራ ኣዓኬኔኬት ግብጽግር ኬ ሻዓሻዓክ ኤዔዴን ፕክሽንትንግራንክ ሃስን ኬዔም ክ ዻቕሻቕንኬሬ ኬ ቦንችድንዳ ሃዓቔ፤ ዬሱስ ብሬዜን ኣይቴር ክ ሳንናምኬ ኤስስናምክ ክ ዬዛኬት ማኬን ቦንት ቡዑር ኮዖ ሳዓቢ ሴጽናም ዬሩሳሌምግር ኬ ኪክን ቦንችንትካን ክ ዝግዝምሽኬ ግሬሬ ኪም ዴይሴርድምሽክ ይንት ራቕክ ሙክዴድንቴን ኬዔዜ።

ዬሱስት ራቕክ ሙክዴድንግራንክ ዎላቕባብ ይሁዳ ዪም ጋዓርዳብ ኤዔድ ሃዓቔ፤ ይሁዳ ክት ራቕክ ሙክዴድንት ሶሊ ዬዳብ ሃዓቔ፤ ዳይንኬሬ ሶሊ ናሽዳብ ይ ሃዓቕንካን ቤድሚ ሴጽ ሶልን ዬዴርዳክ ሱልጵንግራንክ ሶልናም ዲብዳቔ፤ ዬሱስኬ ክት ራቕክ ሙክዴድንክ ዬሩሳሌምግር ኬ ዣእሻኬት ቡዑር ይሁዳ ኣይሁድናም ጌሥዴድንዳ ካዬትዳቦ ዬሱሳም ሶልካን ዬሥትዮ ኬዔን እምንትካን ኤዔድምሴ፤ ዬሱስ ሳዓቢ ዪም ሳይሳቓብን ማዓትንትንክታም ኣይሁድንት ኤንሥዴድን ኬ ዶዖፕስክምሽኬ ኪም ዴይስካኔሬ ኣልቕምንትንኬታም ኤሴስዳቔ።

ኣይሁድንት ኤንሥዴድን ኤዔድናም ሳዓቢ ኪክን ቔዔሽምሽዴድንት ጌሥዳብንት ኤንሤክ ዬሱሳም ዬሥትዮ ኬዔን ክ እምቴምሽ ይሁዴካን ቦንዴኬ ታማ ሶሊ ኪን ካሼኬ፤ ማዓትካን ዬይዳኬታም ኬዔዝዴድን ኬዔዝሻሽምሽ ኮዖና ማዓሤ፤ ይሁዳ ኤዔድምንትክ ሶልናም ቴይዮ ካዬ፤ ዬሱሳም ኬ ዬድቴምሽ ኬዔም ኬልሽካን ማዓድንዳ ሴጻ ዝግርዳቔ።

ዬሩሳሌምግር ዬሱስ ይንት ራቕክ ሙክዴድን ኪክን ሳዓቢ ሴጽናም ቦንችሼ፤ ሳዓቢ ሴጽንት እሥምንዜን ዬሱስ ባልሽናም ዻዓስቶ ቱርሼ፤ ኮይኔሬ ጋይሴ «ኮኔቴ ኮዖም እሥኬቴ፤ ኮና ዬካን እሜርሳቕንዳ እስት ዋዓዬ ኮዖም ኢም ዬ ጶሽሽድንዳ ኮዖም ማዓስኬቴ፤» ኮይናሜትጎክ ዬሱስ ይንት ዋዓም ኬ ጎዖካን ይ ዴእድምሽ ኬዔን ኬዔዜ።

ኮዖዛንኬሬ ዬሱስ ዎጭምናም ዻዓስንትክ «ኮዖም ዎጭኬቴ ዳቔልሳም ኔጋኔ ጋዓርቴምሽ ላልምዳክ ክላ ጫዓቔንት ዞምእእስቴ፤ ኮዖም ዬ ዎጫዓኬንክ ሙዳ ኢም ዬ ጶሽሽድንዳ ኮዖም ማዓስኬቴ።»

ኮዖዛንኬሬ ዬሱስ ይንት ራቕክ ሙክዴድንቴን «ዬግራንክ ዎላቓብና ኢም ዬሥትዮ እምምዴ» ኬዔን ጋይሴ፤ ክት ራቕክ ሙክዴድኔሬ ሪርቴኬ፥ ኮይናማክ ሬይናም ሃይ ዬይዴ?» ጋይሶ ጎይሴኬ፤ ዬሱስ «ኮዖ ቱርሽምን ባልሽናም ኪን እ እምዳብን ኤዔሥን ኢም ዬሥትዮ እምዴ» ጋይሴ፤ ኮዖት ቡዑር ባልሽናም ይሁዴካን እምሴ።

ይሁዳ ባልሽናም ይ ቴያኬት ቡዑር ዥንስን ቡዑዴግርክት ኣርዜ፤ ይሁዳ ዬሱሳም ኬ ዬድቴምሽ ኣይሁድንት ኤንሥዴድናም ኬልሽካን ካዬ ሮዖርና ሶይታ ሃዓቔ።

ዬሱስኬ ክት ራቕክ ሙክዴድንክ ሶይቲ እሥምን ኬ እሣኬት ቡዑር ዴብራዛይት ካዬኬ፤ ዬሱስ ክና ሶይትንክ ዬታ ሙዴና ኢም ጋጋርዴቴ፤ <ግሽዳብናም ግግእድቴ ቖልንክቴሬ ሙዳ ኮኮፕምዴኬ> ጋይሶ ክልኬርቴ» ጋይሴ።

ጴጥሮስ «ኣቤድን ሃዓም ኬ ጋርድንኬሴሬ እታ ዳይንክ ኮይን ዬኣይቴ!» ጋይሶ ማዓስሴ፤ ጭርን ኮዖክ ዬሱስ ጴጥሮስካን ኮይን ጋይሴ፤ «(ሴጣን) ዥንስና ዬ ሙዴናም ቴይካን ዝግዴ ዳይንኬሬ ጴጥሮሶ ቡዑድ እዝንትሃንት ላንቓይምሽ ሃካን ምምክስድቴ፤ ኮይን ማዓድንኬሴሬ ክና ሶይትን ኮዖክ ባዓቻ ቒቕክንዴት ብሬዜን ማኬን ካርክ እታ ኪም ኤሳይቴ ጋይንትክ ኢም ጋርዳዬ።»

ጭርን ኮዖክ ጴጥሮስ ዬሱሶ ዴኢ ኢም ዝክስድንኬሴሬ ዎላቕሴ ሃዓም ጋራይቴ» ኪን ጋይሴ፤ ኣቤድን ዬሱስት ራቕክ ሙክዴድን ሙዳ ኮዖም ጋይሴኬ።

ኮዖት ቡዑር ዬሱስ ይንት ራቕክ ሙክዴድን ኪክን ጌቴሴማን ጋዓርዳክ ካርዜን ካዬኬ፤ ዬሱስ ጴጽምግር ዬ ኣርታክምሽ ዛብዝዮ ምክስኬቴ ጋይንትክ ኬዔን ኬዔዜ፤ ኮዖዛንኬሬ ዬሱስ ይንቲ ዬሌክ ምክስካን ካዬ።

ዬሱስ ማኬን ካርክ ምክሴ፤ «እባዓቦ! ሃዓን ማዓድንክ ኮዖ ካልምንት ዎጭምናም እ ዎጭታክምሽ ማዓስካዮ፤ ዳይንኬሬ ኤዔድንት ድቔልስናም ኔጋኔ ጋዓርድንዳ ኣብንዳ ጎዖግ ዳክንክ ጶቕሽሃንት ማዓታኔ፤» ዬሱሴሬ ጋእሻ ሪርሴ ኤርሜንክቴሬ ዞምእምሽ ጾዽዳቔ፤ ሳዓቤሬ ኪም ዛፕስንትካን ርኬግራንክ ዎዖንይንትካን ይ ኦይዴድናም ኦይሤ።

ካሪ ማኬንክ ይ ምክስዳቓኬት ቡዑር ዬሱስ ይንት ራቕክ ሙክዴድንዳ ማዓቲ ማዓቶ ሃዓዳቔ፤ ኬታ ዳይንክ ራዓታ ሃዓቔኬ፤ ማክምሲ ይ ማዓዳኬንክ ዳይንክ «ዻዓምኬቴ! ዬሥትዮ ኢም እምዳብን ኩዑር ዳዬ» ጋይሴ።

ይሁዳ ኣይሁድ ኤዔድንት ኤንሥዴድንኬ ፖዖልስንክ ቤድሚ ኤዔድ ኪክን ሃዓዴ፤ ካሥምኬ ጉፔክ ቴይታ ሃዓቔኬ፤ ይሁዳ ዬሱስዳ ሃዓዴትዳቦ «ዬ ኤስስዳብኖ ላቕሚ ሃዓን ማዓታኔ» ኪን ጋይሴ፤ ሶንቔሬ ኪም ሶንቕቴ፤ ኮዖም ዬይንትክ ኣይሁድንት ኤንሥዴድና ሃያም ኬ ዬድንኬሬ ኬዔን ጴዔጲ ሃዓቔ፤ ኮዖዛንኬሬ ዬሱስ «ዬ ይሁዶ ሶንቕንትክ ዬሥትዮ ኢም ሃ እምዶ?» ጋይሴ።

ፖዖልስና ዬሱሳም ኬ ዬትምሽ ጴጥሮስ ሃልፓ ቴዬትዳቦ ኤዔድናም ሳዓቢ ኪክን ቔዔሽምሽዳብንት ፕክሽዳብት ቓዓሚ ፓክሴ፤ ዬሱስ ሃልፓሃንታም ሾንድንግርኮት ማዓስካ! ኢን ኬ ዳርምቴምሽ ርኬግራንክ ዎዖንይንትካን ይ ኦይዴድናም ክ ኦይቴምሽ እባዓባም ጎይስንቲ ኢን ማማዓዳቔ» ኪን ጋይሴ፤ ኮዖዛንኬሬ ዬሱስ ኤዔሥንት ቓዓምናም ካርንዜን ማዓስንትክ ሃልሽሼ፤ ዬሱሳም ዬዴርታኬት ቡዑር ክት ራቕክ ሙክዳቔድን ሙዳ ሃስትዮ ካዬኬ።