37. ዬሱስ ኣልዛራም ዴእግራንክ ኪም ዻዓስሴ

ሴጻ ዎላቕ ዬሱስዳ ኣላዛር ጋእሻ ሴዔቔርቴ ጋዓርድንዳ ኬዔዛ ክራ ዣእሼ፤ ኣላዛርኬ ቓስቴን እናንኬስ ማራምኬ ማርታክ ዬሱስት ኡሣ ሱሴክት ሃዓቔኬ፤ ዬሱስ ኬዔዜን ኮዖም ይ ኤሴርታኬንክ «ኮና ሴዔቕምና ሳዓብት ቦንችምካኖንምሺ ዴእካን ዳክዬ» ጋይሴ፤ ዬሱስ ኤዔዴይንታም ናናሽዳቔ፤ ዳይንኬሬ ቓስቴን ሴጽካን ይ ዳያክ ካርንግር ኔጌ።

ቓስቴን ሴጽን ማቕሳኬት ቡዑር ዬሱስ ይንት ራቕክ ሙክዴድንቴን «ይሁዳ ፔጭግር ዎዖኔቴ» ኬዔን ጋይሴ፤ ኬታ ዳይንክ «ዬ ኤስስዳብስኖ! ቶክሚ ሴጽት ብሬዜን ኮዖግር ዶዖቕዴድን ሃዓም ዴይስካን ዝግዳቔኬ!» ጋይሶ ኪን ማዓስሴኬ፤ ዬሱስ «ዎንት እንዴፕስ ኣላዛር ራዓቴ ራዓቴንግርክታንክ ኪም ዻዓስካን ካይድቴ» ኬዔን ጋይሴ።

ዬሱስት ራቕክ ሙክዴድን «ባዓቦ! ኣላዛር ራዓታ ክ ማዓሥንክ ሃልሻልሽዴ» ኪን ጋይሴኬ ኮዖ ጭርንክ ዬሱስ ኣይቴር ኬዔን ኬዔዜ፤ «ኣላዛር ዴእቴ፤ እዜን ቡዑድ ዬ እዝቴምሽ ኮዖግር እ ማዓትካኬትካን ጉጉሜርድቴ።»

ዬሱስ ኣላዛር ኣዼርሳቓክ ካትሜንግር ክ ዣእሻኬንክ ኣላዛር ዴእስክ ሴጻ ኦይዲ ማዓታ ሃዓቔ፤ ማርታ ዬሱስዳ ማሽምካን ዉታቕሴትዳይንዶ ኮይን ኪን ጋይሴ፤ «ባዓቦ! ሃዓና ኩዑር ዶዖቓ ሃ ሃዓቕንክ እንዴፕስ ዴኣይ ሃዓቔ፤ ዳይንኬሬ ሳዓቢ ሃ ምክስዳክ ሙዴናም ክ እምድምሽ ቡዑድ እዝድቴ» ጋይሴ።

ዬሱስ ኮይን ጋይሶ ኮዖን ማዓስሴ፤ «ዻዓምንትኬ ኣዓፔክ ዶዖቕንትክ እትቴ፤ እዜን ቡዑድ እዝዳብ ሙዳ ይ ዴእስንኬሴሬ ኣዓፔክ ማዓዴ፤ እዜን ቡዑድ እዝዳብ ሙዳ ሃስን ዳይኬሬ ዴኣዬ፤ ኮዖም ዶዖፕስዳዮ? ማርታሬ «ዪይዬ ዬ ባዓቦ! ሃዓና ሳዓቢ ሃዓም ሳይሳቓብን ሳዓብት ይንሥስን ማዓትንትሃንታም ዶዶዖፕስድቴ» ግይሶ ኪን ማዓስሴ።

ኮዖዛንኬሬ ማራም ሃዓዴ፤ ዬሱስት ዱዑትር ቡክልንትክ «ባዓቦ! ሃዓና ኩዑር ዶዖቓ ሃ ሃዓቕንክ እንዴፕስ ዴኣይ ሃዓቔ» ኪን ጋይሴ፤ ዬሱስ «ኣላዛራም ሃብሬ ኪም ዎጃቔ?» ጋይሶ ኬዔም ጎይሴ፤ «ዱዑክግሬ ሃዓዳዮ ሼትካዮ» ጋይሶ ኪን ኬዔዜኬ፤ ዜናንኬሬ ዬሱስ ኤዔፕሴ።

ዱዑክና ሴይንት ቖዖፔግር ሃዓቔ፤ ሴይኔሬ ዜን ዬሥቴንዳ ሃዓቔ፤ ዬሱስ ዱዑክንዳ ይ ዣእሻኬንክ ሴይንናም ዜናንክ ዛዓክስኬቴ» ጋይሶ ኬዔን ኬዔዜ፤ ዳይንኬሬ ማርታ «ክ ዴእስክ ኮና ሴጻ ኦይዲ ማዓቴ፤ ታ ሾሾቕዴ» ኪን ጋይሴ።

ዬሱስ እዜን ቡዑድ ሃ እዝድንክ ሳዓብት ቦንችምናም ሃ ሼድምሽ ሃዓን ኬዔስክቶ?» ኮዖን ጋይሴ፤ ካንካን ሴይንናም ዛዓክሴኬ።

ኮዖት ቡዑር ዬሱስ ፔስ ርኬግር ሼጆ «እባዓቦ ኢም ሃ ኤሴርድንካን ሃዓም ጎጎዖፕሽድቴ፤ ሃዓና ሙዳ ሴጽካን ኢም ሃ ኤሴርድምሽ ኤሴስድቴ፤ ዳይንኬሬ ሃ ኢም ኦይሣቕምሽኬ ኬ ቡዑድ እዝቴምሽ ኩዑር ዎእሳቔድ ኬዔና ኤዔድን ሙዴካን ኮዖም ኬዔዝድቴ» ጋይሴ። ኮዖዛንኬሬ ዬሱስ «ኣላዛሮ ኦንክ ማዓል ሃዓድካ!» ጋይሶ ኡፕሲ ጫዓጭክ ኡዑግምሴ።

ካንካን ኣላዛር ዉታቕሴ! ኣብሌንክ ሱዑድትዮ ኦቼርሻቕምሽ ሃዓቔ፤ ዬሱሴሬ «ኪም ቡልሴቶ ጋርኬቴ ክ ሙካኔ!» ኬዔን ጋይሴ፤ ኣይሁድ ኤዔድን ቤድሜድ ኮዖ ክላ ዎዖንንጎክ ዬሱስዜን ቡዑድ እዜኬ።

ዳይንኬሬ ኣይሁድ ኤዔድንት ቡዑድ እዝንትናም ኤንሥዴድን ክዜን ኒቕምሴኬ፤ ካንካን ዬሱሳምኬ ኣላዛራምክ ሃስን ይ ዴይስድምሽ ዪን ማዓዳኬታም ጶቕሽንትካን ኪክዜን ሱዽምሴኬ።