36. ዬሱስት ብሽን ኦዖክምስምሽ

ሴጻ ዎላቕ ዬሱስ ይንት ራቕክ ሙክዴድን ማኬንናም ኬዔኔሬ ጴጥሮስ፥ ያይቖባምኬ ዋንሳምክ ኤንሥቶ ምክስካን ሮዖትምባብ ባሌዜን ኤቤኬ፤ (ዋንስ ጋዓርሳቓብን ዬሱሳም ሽእሻቓብ ኤዔሥን ዳክዬ።)

ዬሱስ ምክስዜን ክ ዳይክ ኣዓፕርክታንክ ሃይምሽ ሻዓክሼ፤ ኣብሌንክቴሬ ሻዓክምምሽ ጻዓሚ ማዓሤ፤ ፔጬዜን ኤዔድ ሃይዬሴሬ ሽእትዮ ጻዓምሳይንዳ ኣብሌምሽ ጋእሻ ጻዓ ማዓሤ።

ኮዖ ጭርንክ ሙሴኬ ማዓትካን ዬይዳኬታም ኬዔዝዳብን ኤላስክ ሃዓፕምሴኬ፤ ኬዔና ኤዔድና ቤድሚ ማቶክ ፓይዴርዴድ ቦንንት ብሬዜን ፔጬዜን ዶዖቕዳሻሼድ ሃዓቔኬ፤ ኡሣ ሴጽግር ዬሩሳምግር ማዓዳክ ዴእንጎክትካን ዬሱስ ኪክን ኬዔዝምሴኬ።

ሙሴኬ ኤላስክ ዬሱስ ኪክን ኬዔዝምዜን ኬ ዳይክ ጴጥሮስ ዬሱሴን «ኩዑር ማዓትንትን ዎዖን ዋዓኔ፤ ዎላቕ ሃካን፥ ዎላቕ ሙሴካን፥ ታዓሬ ዎላቕ ኤላስካን ማኬን ዴልሣ ዎ ኣክሻኔ» ኪን ጋይሴ፤ ጴጥሮስ ኮዖም ይ ኬዔዝዳኬታም ኤሳይ ሃዓቔ።

ጴጥሮስ ኬዔዜዜን ክ ዳይክ፤ ሻዓክምንዳ ሊላ ሃዓዶ ኬዔም ሽፕሽድክ ሊሌንግራንክ ኡፕሲ «ኪክ እ ጉሜርዳብን እ ዪም ናሽዳብ ይንሥስእስት ኮዖናዬ፤ ክራንክ ኤሴርኬቴ» ጋይሴ፤ ማኬንን ዬሱስት ራቕክ ሙክዴድና ጳሼኮ ፔጬዜን ቡኬልሴኬ።

ኮዖክ ዬሱስ ኬዔም ዎዖልሶ «ሃይ ጳሽኬቴ ዻዓምኬቴ» ኬዔን ጋይሴ፤ ሼዔግንቴክ ኬ ሼድንክ ዬሱስ ካይሳ ሃይዬሬ ዳክ ሃዓቔ።ዳክ ሃዓቔ።

ዬሱስኬ ክት ራቕክ ሙክዴድንክ ባሌንዛንክ ሃቼኬ፤ ኮዖ ጭርንክ ዬሱስ ኮይን ኬዔን ጋይሴ፤ «ኩዑር ማዓሣቓክ ሬይንጎክ ሃይካኔሬ ሃይ ኬዔስኬቴ፤ እታ ሳዓና ዴእድቴ ኣዓፔካምባቤሬ ማማዓድቴ፤ ኮዖት ቡዑር ኤዔድንካን ኬዔዝንት ዬዔን ማማዓዴ።»