35. ዋዬባብ ባዓቤንት ኣቴና

ሴጻ ዎላቕ ዬሱስ ቤድሚ ኤዔድን ጊዒራ ካሽሽዴድንኬ ክራ ኤስርካን ሱዽምሳቔድ ኣቤድን ዳቔልሲ ኤዔድናምክ ኤስ ኤስስዳቔ።

ታዓሬ ኮዖግር ሃዓቔድ ቡዑድ እዝንትናም ኤንሥዴድና ዬሱስ ዳቔልሲ ኤዔድናም ሱስንት ማዓስሶ ክ ኬዔም ናሽድክ ኪም ሼጄኬ፤ ኪክ ኪክዴሬ ኪም ይዝንንት ዬዜኬ፤ ካንካን ዬሱስ ኣቴን ኮዖም ኬዔዜ።

ይንሥንት ቓስቴን ዶዖቕዳብ ኤዔድ ዎላቕ ሃዓቔ፤ ይንሥስን ሜራብን ባዓቤኔን <እባዓቦ! ሶልንግርሃንታንክ ኢን ዣእዳክ ካሽንግራክ ታ ኢን እምካ!> ኪን ጋይሴ፤ ካንካን ባዓቤን ሶልናም ቓስቴንንካን ካሽትዮ ኬዔን እምሴ።

«ሜራብ ይንሥስን ሳዓና ይንት ዶዖቕዳክ ሙዳም ሱዽቶ ፔጫ ፔጌግር ካዮ ዳቔልስክ ዶዖቓሮ ሶልናም ካይሴ።

ኮዖት ቡዑር ሜራብን ይንሥስን ዶዖቕዳክ ፔጬንግር ሉማ ማዓሤ፤ እሥሚ ሼኔርድንዳ ሶሌሬ ክራ ዳክ ሃዓቔ፤ ካንካን ኣብንዳ ዎዖኒ ዳክንካን ጉድማም ግሽማ ግሽንቲ ዬዜ፤ ጋእሻ ካሌርሶ ዳዓቔርታ ይ ሃዓቕንካን ጉድምንት እሥምናም እሥንትካን ኡቕምዳቔ።»

ማቕንቴዜኔሬ ይንሥስን ሜራብና ይማትካን ኮይን ጶቕሼ፤ <ሃራ ዬእንትስቴ? እባብት ፕክሽዴድን ሙዳ ኬ እሥድንዳ ቤድሚ እሥሚ ኬራ ዶዖቔ፤ እታ ዳይንክ ዳዓቔርትቴ፤ እባብዳ ኤዔር ማዓትዮ ካይቶ ሃንት ፕክሽዴድንግራንክ ዎላቓብንምሽ ኢም ክ ማዓስቴምሽ ኪም ምክስድቴ» ጋይሴ።

ካንካን ሜራብ ይንሥስን ባዓቤንዳ ኤዔር ማዓቴ፤ ኣኪ ፔጋ ክ ዳይክ ባዓቤን ኪም ይ ሼጃኬንክ ክካን ኣቴርሴ ክራ ሃዝንትክ እምጭትዮ ኪም ሶንቕቴ።»

ይንሥስኔሬ ኮይን ጋይሴ፤ <እባዓቦ! ሳዓባምኬ ሃዓማምክ ዳቔልስትቴ፤ ይንሥስሃንቴ ኢም ጋዓራን ኢን ማዓታዬ» ኪን ጋይሴ።

ዳይንኬሬ ባዓቤን ይንት ፕክሽዴድንግራንክ ዎላቕባቤን ኮይን ጋይሴ፤ <ሳዓና ካያዮ ላቕምቴንዳ ኣብላ ታዓዳዮ ይንሥስእስቴን ቖፕስካ! ኣዓንንክቴት ግልኤንግር ዎርቒ ዱዑትግርክት ኮጳ ዎድካ፤ ኮዖዛንኬሬ ዎ እሥቴምሽኬ ዎ ጉሜርቴምሽክ ዱርፕቴባብ ቖልማ ታዓዶ ቴችኬቴ ሃራካኔ ጋዓርስንክ ኮና ይንሥስእት ዴእታ ሃዓቔ፤ ታ ኣዓፔክ ማዓቴ! ካይታ ሃዓቔ ታ ዳይንክ ሃዓፔርቴ!» ጋይሴ።

«ካንካን ኤዔድና ጉሜርንቲ ዬዜኬ፤ ቤድሚ ሃጵክዳይክ ዎዖንግራንክ ቶይድስን እንዴፕስክት ኤዔር ሃዓዴ፤ ሌዔቔቴኬ ባይድቴክ ኡፕሲ ኤሴርሴ፤ ሃራ ዳይኬ ጋይሶ ሪርቴ።»

ቶይዲ ይንሥስን እንዴፕስን ሃዓዳቕንካን ኬ ጉሜርዳኬታም ይ ኤስታኬንክ ጋእሻ ይ ጋዓምስንካን ኤዔር ኣርድንትካን ናሽክዬ፤ ባዓቤንክት ዉታቕሶ ኤዔር ኣርዝዮ ኬ ኪክን ክ ጉሜርቴምሽ ኪም ምክሴ፤ ኖዖ ዳይንክ ሃኦ ጋይሴ።

ቶይዲ ይንሥስን ባዓቤኔን ኮይን ጋይሴ፤ <ኬዔና ቦንን ሙዴክ ሃዓን ኤዔኤክ ፕክሽትቴ ዎላቔሴ ሃዓን ኤዔእክስ እ ጋርሻቕንዳ ሴጻ ዳክዬ፤ ታዓክ ዬኬሬ እቤዔልሥኬስ ኪክን እ ጉሜርቴምሽ ዴርቲ ቕንጺ ዎላቔሴ ኢን እማቓዬ፤ ዳቔልሲ ዎዖንንትክ ሶልሃንታም ካይሳቓብን ይንሥስን ዳይንክ ኤዔር ክ ሃዓድንካን ዱርፕቴባብ ኣብዝስናም ቴቻዬ! ጋይሴ።

«ባዓቤን ዳይንክ ኮይን ጋይሴ <ዬ ይንሥስእስቶ ሃዓና ሙዳ ሴጽ እ ኪክናዬ እስት ዶዖቕዳክ ሬይ ሙዴና ሃሬዬ፤ ጉሜርዎንት ዳይንክ ኡዝሜንዴ፤ ሃራካኔ ጋዓርስንክ ሃንዴፕስን ኮና ዴእታ ሃዓቔ ታ ዳይንክ ኣዓፔክ ማዓቴ፤ ካይታ ሃዓቔ ታ ዳይንክ ሃዓፔርቴ!» ኪን ጋይሴ።