34. ዬሱስ ኣብ ኣቴናም ክ ኤስስምሽ
ዬሱስ ሳዓብት ባዓምንጎካንኬ ኣቤሬ ኣቴናም ኤስሴ፤ ካምስካን ኮይን ጋይሴ፤ «ሳዓብት ባዓምና ኤዔድ ሃዓምይንትግር ክ ማሻቓክ ኤክኔምሻኬት ኣዓፕናም ካምዴ ናዓሬ ጴዔታ ሙዴግራንክ ቶክድንዴ።»
«ዳይንኬሬ ኤክኔምሻኬት ጴዔቴና ባቔልሶ ኮ ጋጵሳኬንክ ኣፕትኔሬ ሃዓዴኮ ዋዓር ኬ ዶዖቕስቴንክ ዬካ ኮርሚ ሃዓምንግር ዶዖቕዴድ ኮርምን ሙዴግራንክ ናዓ ጋጋጽዴ።
ዬሱስ ኣብ ኣታም ኬዔዜ «ሳዓብት ባዓምና ማይንሢ ቴዮ ሙዴና ቡዑርቕስቴንክ ዬካ እሌን ኪክን ኮ ዽቕዳክ ጫዓርሚ ሚዼናም ካምዴ።
«ታዓሬ ሳዓብት ባዓምና ኤዔድ ዎዖኒ ሃዓምግርንት ክ ኣዓቻቕንዳ ዚጋም ካምዴ፤ ኤዔድ ኣብባብ ዚጌናም ሃዓፕቴትዳቦ ኣልካ ኮዖም ዱዑክሴ፤ ጋእሻ ጉሜርታ ይ ሃዓቕንካን ካዮ ይንት ዶዖቕዳክ ሬይ ሙዳም ሼንሾ ሶልንክ ሃዓምናም ሼንቴ።»
«ታዓሬ ሳዓብት ባዓምና ባዜንኮት ጋእሻ ጋጵሚ ማዓሣቓክ እንቑ ጋዓርዳክ ሼክምናም ካምዴ፤ ዛላ ዛልዳብ ኮዖም ይ ሃዓፕትንክ ይንት ዶዖቕዳክ ሬይን ሙዳም ሼንሾ ኮዖም ሼንቴ።»
ኮዖት ቡዑር ዬሱስ ይንት ማቴክ ላቕሚ ዎዖንይንቴክ ዳቕዴድንኬ ኣቤድናም ዳይንክ ቶክስዴድንካን ኣታ ዎላቕ ኬዔን ኬዔዜ፤ «ቓስቴን ኤዔድ ምክስካን ጪሊ ኤዬንግር ካዬኬ፤ ዎላቓብን ጊራ ካሽሽዳብ ክ ማዓሥክ ኣብባብና ቡዑድ እዝዴድናም ኤንሥዳብ ሃዓቔ» ጋይሴ።
«ቡዑድ እዝዴድናም ኤንሥዳብስን ኮይን ጋይሶ ምክሴ፤ <ሳዓብዮ ኣቤድ ኤዔድንምሽ ሙዳ ቡራ ቡሮ እሥዴድኬ ኤዔኣዬድክ ቤዔልምዴድምሼሬ ኮባብ ጊራ ካሽዳብምሼሬ እ ማዓትክንካን ሃዓም ጎዖፕሽድቴ።»
«እታ ማዓሪ ዎላቕግር ካሪ ቓስቴንክ እሥክስኬ ዎጭክስክ ዶዖቕድቴ፤ እ ሃዓፕታቓክ ሶልግራንክ ሬይ ሙዴግራንኬሬ ታምስናም ዉሥድቴ።»
«ጊራ ካሽሽዳብስን ዳይንክ ቡዑድ እዝዴድናም ኤንሥዳብስንዳንክ ፔጋ ዎእሴ፤ ፔስ ርኬግሬሬ ሼድንትካን ዝክዬ፤ ኮዖ ኦዖላይስ ሳዝንታም ጎዖዳሮ፥ <ሳዓብዮ! እታ ዳቔልስባብ እ ማዓሥንካን ዋዓዴ ኢን ኔጋኔ ጋዓካዮ።»
ኮዖት ቡዑር ዬሱስ ኮይን ጋይሴ፤ «ዶዖፔን ዬዔን ጋዓድቴ፤ ሳዓቢ ጊራ ካሽሽዳብንት ምክስናም ኤሴርሶ ሃዓና ኡዝማ ዎዖንዳባዬ ኪን ጋይሴ፤ ቡዑድ እዝዴድናም ኤንሥዳብንት ምክስናም ዳይንክ ናሽክዬ፤ ሳዓቢ ይንት ማቴናም ጼክስ ዬይዳብናም ሙዳ ቶቶክስዴ፤ ማቴይንታም ቶክስዳብናም ዳይንክ ጼክስ ዬይዴ» ጋይሴ።
ማጻዓፕ ጪልንት ኣቴና ማቶስ 13፥31-33፤44-46፤ ማር 4፥30-32፤ ሉቓስ 13፥18-21፤18፥9-14
Free to use, adapt, and share under an open license (CC BY-SA 4.0).