33. ፔጫ ዎዖንዳብስንት ኣቴና
ሴጻ ዎላቕ ዬሱስ ኖቓ ጼዔርንት ሼዔጌር ቤድሚ ኤዔድናም ኤስሳሮ ሃዓቔ፤ ዬሱስ ኬዔን ኬዔዝንትካን ግድምንዳ ካሪ ሃዓፕንትካን ኖቔንት ሼዔጌዜን ጎንጌግር ኣርዝዮ ክ ዶዖቕስቴንክ ዬካ ጋእሻ ቤድሚ ኤዔድና ኪም ኤስርካን ሃዓዴኬ፤ ጎንጌንግር ዶዖቕስዮ ኤዔድናም ኤስሴ።
ዬሱስ ኣቴን ኮዖም ኬዔዜ፤ «ኤዔድ ፔጫ ዎዖንዳብ ዎላቕባብ ጴዔታ ማሼካን ዉታቕሴ፤ ኣዓንንቴክ ጴዔቴናም ክ ማሽድክ ባግና ጎዖግዜን ዋዓቼ፤ ኣፕትኔሬ ሃዓዴኮ ሙዳ ኮዖም እሤኬ።
«ኣብን ጴዔቴኔሬ ቤድሚ ፔጫ ዳንክ ሴይንዜን ዋዓቼ፤ ዳይንኬሬ ጫዓጪ ፔጬግር ኮ ኦይትክንካን ሃይ ዉትሣኬንኬ ኮ ኦይጻኬንክ ባቔሌና ዎቕስዮ ዎቼ።»
«ታዓሬ ኣብን ፔዔቴና ኡክሜት ሞልትግር ዋዓቼ፤ ኮዖና ጴዔቴኔሬ ባቕልሴ፤ ዳይንኬሬ ኡክሜና ኮዖም ጩዑልሼ፤ ካንካን ኡክሜግር ባቔልሳቓክ ባቕሌና ኣዓፒ ዎላቔሴ ኡዑሽክዬ።
«ኣብን ጴዔቴኔሬ ላቕምቴንዳ ፔጬዜን ዋዓቼ፤ ኮዖና ጴዔቴና ባቔልሶ ዎላቔና ቦንዴኬ ታማ ዎላቔኔሬ ላዓ ታም ዎላቔኔሬ ዎላቕ ማቶ ኣዓፒ ኡዑሼ» ኤስር ቓዓምንት ዶዖቕዳብ ክ ኤስራኔ!»
ኮዖና ኣቴና ዬሱስት ራቕክ ሙክዴድንቴን ኣርትክዬ፤ ካንካን ዬሱስ ኮይን ጋይሶ ፕእስትዮ ኬዔን ኬዔዜ፤ «ጴዔቴና ሳዓብት ኡፕስኔ፤ ጎዖግት ኣሥዜን ዋዓቻቓክ ኤዔድ ሳዓብት ኡፕስን ኤሴርዳቤ፤ ዳይንኬሬ ሜይስትዮ ጶቕሻዬ፤ ይዥዳቤሬ ኡፕስናም ክራንክ ቴይዴ።»
«ሴይንዜን ዋዓቻቓክ ጴዔቴና ሳዓብት ኡፕስናም ኤሴርትዮ ጉሜርክ ቴይዳብ ኤዔዴ፤ ዳይንኬሬ ካልሚ ዋይ ዳዓሪ ይዜን ሃዓዳክ ሴጽንክ ቡዑድ እዝንትይንታም ጋጋርዴ።»
«ኡክማ ዶዖቕዳኬትግር ዋዓችቓክ ሳዓብት ኡፕስናም ኤሴርዳብ ኤዔዴ፤ ዳይንኬሬ ሴጼት ቡዑር ፔጬን ኮዖት ጶቕሺ፥ ዎድምንትኬ ጉሜርክ ሳዓብካን ክት ዶዖቕዳክ ሶዖልሜናም ጩዑልዴ፤ ኮዖዛንክ ዻዓምሳቕንዳ ክ ኤሴርታቓክ ኡፕስና ኣዓፒ ኡዑሻዬ።
«ላቕምኣክ ፔጬና ዳይንክ ሳዓብት ኡፕስናም ኤሴርዳብ ኤዔዴ፥ ኖዖሬ ኡፕስናም ኤሴርዳብ፥ ቡዑድ እዝዳብኬ ኣዓፒ ኡዑሽዳብክ ማዓዴ።»
ማጻዓፕ ጪልንት ኣቴና ማቶስ 13፥1-8፤18-23፤ ማር 4፥1-8፤13-20፤ ሉቓስ 8፥4-15
Free to use, adapt, and share under an open license (CC BY-SA 4.0).