32. ዬሱስ ዼብ ማንፔስክ ዬድምሳቓባምኬ ሃዤርቴንዳ ማዓምክ ክ ሃልሽሽምሽ

ሴጻ ዎላቕ ዬሱስኬ ክት ራቕክ ሙክዴድንክ ኖቔዛንክ ቓዓሌርዳክ ዚጌንክ ኖቔዜን ቓዓላሮ ጌርጌስኖን ኤዔድን ዶዖቕዳኬትግር ካዬኬ።

ኖቔንት ፓዓማ ኬ ዣእሻኬንክ ዼብ ማንፔስ ዪም ዬዛቓብ ኤዔድ ሃዝምክ ዬሱስዳ ሃዓዴ።

ኤዔሥን ኮዖና ሃይዬሬ ዪም ዬዳያብ ጋእሻ ዛምባብ ሃዓቔ፤ ኤዔድና ኣዓንክታምኬ ዱዑትክታምክ ካዉሤክ ዻክስዮ ሃዓቔኬ፤ ዳይንኬሬ ካዉሤናም

ኤዔሥን ኤዔድንት ዱዑክ ካርግር ዶዖቕዳብ ሃዓቔ፤ ኤዔሥን ኮዖና ሮዖርክ ሶይትክ ሙዳ ኡዑግምዳቔ፤ ኣብሌሬ ቖብራይባብ ሃዓቔ፤ ዜኔይንታም ካርክ ማዓሲ ማዓሶ ሴይንክ ቦዖጽዳቔ።

ኤዔሥን ዬሱስዳ ይ ሃዓኬንክ ብሬዜንክት ቦንቕንቴክ ጉምፔርሶ ኪም ጎዖፕሼ፤ ዬሱስ ዼብ ማንፔስኔን «ኤዔሥን ኮባብዛንክ ዉትካ!» ኪን ጋይሴ።

ዼብ ማንፔስን ዜይንት ዶዖቕዳብ ኤዔሥን ኡፕሲ ጫዓጭክ «ባዓቢ ሳዓብት ይንሥስን ዬሱሶ እራንክ ሃራ ዝግዴ? ዋዓዴ ሃይ ኢም ሴዔቕስካዮ» ጋይሶ ኡፕሲ ጫዓጭ ኡዑግምሴ፤ ኮዖዛን ዬሱስ ዼቢ ማንፔስንቴን «ናዓምሃንት ሃይዬ?» ጋይሶ ጎይሴ፤ ኖዖሬ «ቤድሚ ዎ ማዓሥንካን ናዓምእስት ሌጎኔ» ጋይሶ ማዓስሴ (ሌጎን ሮማ ፔጭንት ዳዓሚ ዶብዴድንት ቤድሚ ሺያም ዬድንዴ ጋይንትዬ።

ማንፔስን «ዋዓዴ ኩዑራንክ ዎዖም ሃይ ፔግምስካዮ» ጋይሶ ኪም ምክሴኬ፤ ሼዔጌርጎክ ዶዖቕዳክ ባሌንዜን ጉድም ግሽማ ግሼርዴዳም ኦይቴርታ ሃዓቔ፤ ካንካን ዼብ ማንፔስና ዬሱሴን «ዋዓዴ ኮዛንክ ዎዖም ጉድምንዳ ኦይትካዮ!» ጋይስዮ ኪም ምክሴኬ፤ ዬሱሴሬ «ካይኬቴ!» ኬዔን ጋይሴ።

ዼቢ ማንፔስና ኤዔሥንዛንክ ዉታቕሴኮ ጉድምንግር ኣርዜኬ፤ ጉድምኔሬ ባሌንዛንክ ጹላ ሃዝንትክ ኖቓ ጼዔርንግር ኣቕዝምሴኬ፤ ግሼርዴድ ጉድምና ቓስቴን ሺ ማዓዴድ ሃዓቔኬ።

ጉድምናም ግሽዳቔድ ኤዔድና ሬይን ማዓሣኬታም ይ ሼጃኬንክ ካትሜንግር ሃዝምክ ካዬኮ ዬሱስ ዎዖንሳቓኬታም ይ ሃዓፕታቔድ ኤዔድን ሙዴካን ኬዔዜኬ፤ ካትሜንግራሜድ ኤዔድና ሃዓዴኮ ዼብ ማንፔስን ዜይንት ዶዖቕዳብ ኤዔሥናም ሼጄኬ፤ ኣብሌይንታም ቖቤርቶ ሃልሽሜባብ ኤዔድምሽ ማዓሦ ጫሜ ጋይሶ ዶዖቕታ ሃዓቔ።

ኤዔድና ጋእሻ ጳሽታ ይ ሃዓቕንካን ዬሱስ ፔጬንግርኬታንክ ክ ካይቴምሽ ኪም ጎይሴኬ፤ ካንካን ዬሱስ ኖቔዛንክ ቓዓሌርዳክ ጎንጌንግር ኣርዝዮ ካይካን ኡስምሴ፤ ዼብ ማንፔስን ዜይንት ሃዓቓብ ኤዔሥን ዬሱስ ኪክን ካይንትካን ኪም ምክሴ።

ዳይንኬሬ ዬሱስ «ማዓታዬ ኤዔራንት ካያዮ ሳዓቢ ሃዓን ክ ዎዖንሳቓክ ሬይን ሙዳም ኬዔስካ ሃካን ክ ኣቴርሳቕንኬሬ ሱሳሃንትካንኬ ኤዔር ኤዔድሃንትካን ሃ ኬዔስቴምሽ ዝግርድቴ» ኪን ጋይሴ።

ካንካን ኤዔሥን ካዬትዳቦ ዬሱስ ዪን ዎዖንሳቓክ ሬይንጎክ ኤዔድን ሙዴንካን ኬዔዜ፤ አቴንክታም ኤሴርሳቔድን ኤዔድ ሙዳ ሪርንትክ ኣፕንት ዬዜኬ።

ዬሱስ ኖቔን ጼዔርንት ፓዓማ ማዓቴ፤ ኮዖግሬሬ ክ ዣእሻኬንክ ቤድሚ ኤዔድን ሼዔጌክቴክ ሱዽምሴኮ ኪም ዽምትዮ ካሌርሴኬ፤ ኤዔድንት ሞልትግር ታሜኬ ቓስቴን ቦን ዞምእ ዜይንታንክ ሃችድክ ዶዖቕዳቕንዳ ማይን ሃዓቔ፤ ኮዖም ኬ ሃልሽሽቴምሽ ሶልይንታም ሙዳ ዼዔሻ እምዴድንካን ካሽትዮ ኮ ማቕሽክ ዜንኮት ቤዛቖንምሺ ሃልሽካን ኮዖን ማዓትክዬ።

ዬሱስ ቤድሚ ሃዤርታ ኤዔድናም ክ ሃልሽሽምሽ ናዓ ኤሴርታ ሃዓቔ፤ «ዬሱስት ኣብሌናም ዬሌክ እ ዎዖልስንክ እቴሬ ሃልሽሃልሽድቴ!» ጋይንትክ ጶቕሼ፤ ካንካን ዬሱስት ቡዑርጎክ ሃዓድንትክ ኣብሌንክታም ዎዖልሴ፤ ኣብሌንክታም ኮ ዎዖልስምሽ ሳዓና ዞምእንኮት ሃችን ጋርሼ።

ሳዓና «ዬሱስ ዛምይንት ይራንክ ዉታቕስምሽ ኤስቴ፤ ካንካን ዋልዋሌ ጋዓቶ ቡዑርጎክ ማዓቶ «ሃይ ኢም ዎዖልሴ?» ጋይሶ ጎይሴ፤ ክት ራቕክ ሙክዴድኔሬ «ሼዔጋንቴክ ሱዽምሳቔድኬ ሃንቕምዴድ ቤድሚ ኤዔድ ዳዬኬ፤ <ሃይ ኢም ዎዖልሴ> ሃስና ጋዓዴ?» ጋይሶ ኪን ማዓስሴኬ።

ኤዔቴና ብልቓሮኬ ጋእሻ ጳሽንትክ ዬሱስት ብሬዜን ቡኬልሴ፤ ኮዖዛንኬሬ ይ ዬእሳቓኬታምኬ ኮይኔሬ ሃልሽንትይንታምክ ኪን ኬዔዜ፤ ዬሱሴሬ «ቡዑድ እዝንትሃንት ሃዓም ሃልሽሻቔ፤ ላቕምክ ካይካ» ኮዖን ጋይሴ።