31. ዬሱስ ኖቔዜን ሙክትዮ ክ ካይምሽ

ኮዖዛንኬሬ ዬሱስ ኤዔድናም ኤዔር ክ ኦይድክ ኖቓ ጼዔርዛንክ ቓዓሌርዳክ ጎንጌግር ኣርዜኮ ኖቔንት ፓዓማ ኬ ቓዓልቴምሽ ይንት ራቕክ ሙክዴድኔን ኬዔዜ፤ ዬሱሴሬ ኤዔድናም ይ ኦይሣኬት ቡዑር ምክስካን ባሌዜን ኤቤ፤ ኮዖግር ዬሱስ ይንቲ ሃኪ ሃዓቔ ሶይቲ ካዓስቴንክ ዬካ ምክሴ።

ኮዖ ጭርንክ ዬሱስት ራቕክ ሙክዴድና ኖቔንዜን ቓዓሌርዳክ ዚጌናም ሙክስካን ቤይዳቔኬ ሶይቲ ካዓስሜዜን ኬ ዣእሻቓክ ኖቔንት ዬኬን ማዓዳኬትዜን ዬሌክ ሃዓቔ፤ ዦጌሬ ዜንኬት ጋእሻ ዦግዳቕንካን ኬ ቤይዳክ ካልምክ ሃዓቔ።

ኮዖ ጭርንክ ዬሱስ ምክስይንት ማቕሾ ይንት ራቕክ ሙክዴድንዳ ሃዓዴ፤ ኖቔንት ዜን ሙካሮ ኖቔን ቓዓሌርዳክ ጎንጌንዳ ሃዓዴ።

ክት ራቕክ ሙክዴድና ዬሱሳም ይ ሼጃኬንክ ጋእሻ ጳሼኬ፤ ሃራካኔ ጋዓርስንክ ቡንካም ኬ ሼጅንዳ ኬዔን ካምስንካኔ፤ ዬሱስ ጳሽንትንኬታም ኤስቴ፤ ካንካን ዬሱስ ኬዔም ኤዔልሶ «ሃይ ጳሽኬቴ» እታ እስትዬ!» ኬዔን ጋይሴ።

ኮዖ ጭርንክ ጴጥሮስ ዬሱሴን «ዬ ኤስስዳብኖ፥ ሃ ማዓሥንክ ኖቔት ዜን ሙክስቶ ሃራ እ ሃዓዳን ኬዔስካዮ!» ኪን ጋይሴ፤ ዬሱሴሬ ጴጥሮሴን «ሃዓድካ» ኪን ጋይሴ።

ካንካን ጴጥሮስ ዚጌንግራንክ ዉታቕሴትዳቦ ኖቔንዜን ዬሱስዳ ሙክንቲ ዬዜ፤ ዳይንኬሬ ቶክሚ ይ ሙክሳኬት ቡዑር ኣዓፕይንታም ዬሱስዛንክ ማዓስቶ ጼዔርንት ሾይናም ሼጄ፤ ዛምንዳ ዦጌና ክራ ኤስምዳቔ።

ኮዖ ጭርንክ ጴጥሮስ ጳሽንትክ ኖቔንግር ኣቕዝሚ ዬዜ፤ «ዬ ኤስስዳብኖ፥ ኢም ዻቕሽካዮ!» ጋይሶ ኡፕሲ ጫዓጭክ ኡዑግምሴ፤ ዬሱሴሬ ሳዓና ኣዓንይንታም ኦይሦ ኪም ዬቴ፤ ኮዖዛንኬሬ ጴጥሮሴን «ሃዓና ቡዑድ እዝንትሃንት ዦዖጌርሻቓብኖ ሃራካና እቼርሼ?» ኪን ጋይሴ።

ጴጥሮስኬ ዬሱስክ ኖቔን ቓዓሌርዳክ ዚጌንግር ኬ ኣርዛኬንክ ዦጌና ዦግንትይንያም ሳዓና ጋርሽክ ሬይ ስያኤ ጋይሴ፤ ክት ራቕክ ሙክዴድኔሬ ሪርቴኬ፤ «ዶዖፔን ሃዓና ሳዓብት ይንሣዬ» ጋይትክ ዬሱሳም ጎዖፕሼኬ።