30. ዬሱስ ዶንቕ ሺ ኤዔድናም ክ እሥስምሽ

ዬሱስ ጋላ ጋሌድ ቤድሚ ሞዖሬንግር ኬ ሳንቴምሽኬ ኤዔድናም ኬ ኤስስቴምሽክ ኦይቴርቴድይንታም ኦይሤ፤ ኬታ ዬሱስ ሃዓቓክ ካርንግር ይ ማዓታኬንክ ይ ዬእሳቓክ ሬይን ሙዳም ኪን ኬዔዜኬ፤ ኮዖት ቡዑር ዬሱስ ኖቓ ጼዔርናም ቓዓልቴኮ ሬይ ይኔ ጋዓይንዳ ካርግር ካዬኮ ቶክሚ ኬ ሃዉሽቴምሽ ኬዔን ኬዔዜ፤ ካንካን ቓዓሌርዳክ ጎንጌንግር ኣርዜኮ ኖቓ ጼዔርናም ቓዓልቴኬ።

ዳይንኬሬ ጎንጌንክ ኬ ቓዓልድክ ዬሱሳምኬ ክት ራቕንክ ሙክዴድናምክ ኬዔም ሼጃቔድ ቤድሚ ኤዔድ ሃዓቔኬ፤ ኬዔና ኤዔድና ኬዔን ብርካን ጼዔርንት ሼዔጌክ ዞዖዜኬ፤ ካንካን ዬሱስኬ ክት ራቕንክ ሙክዴድንክ ሴ ፓዓማ ኬ ዣእሻኬንክ ጋእሻ ቤድሚ ኤዔድ ብርትዮ ሴ ዋዓር ዣእሼኮ ኬዔም ጶይዳቔኬ።

ኤዔድና ማዓኔንኬ ይንሥንክ ፓይዴርክዳይክ ዶንቕ ሺ ኤዔድዛንክ ጋዓጺ ኣንግኔና ሃዓቔኬ፤ ዬሱስ ኤዔድንካን ጋእሻ ኣቴርሴ፤ ዬሱስካን ኬዔና ኤዔድን ግሽዳብንት ዳኬድ ቖልምሽ ሃዓቔኬ፤ ካንካን ኬዔም ኤስሴትዳቦ ሞልትግርኬት ሃዓቔድ ሃዤርቴድናም ሃልሽሼ።

ኮዖ ሶይትንክ ክት ራቕንክ ሙክዴድና ኮይን ኪን ጋይሴኬ፤ «ፔጬና ሃክስቴ ኡሣ ካትማ ዳክዬ፤ ይ እሥድንዳ ሬይ ኬ ሼንቴምሽ ኤዔድናም ኦይትካዮ።

ዬሱስ ዳይንክ ይንት ራቕክ ሙክዴድንቴን «ኬ እሥድንዴታም ዬታ ኬዔን እምኬቴ!» ኬዔን ጋይሴ፤ ኬቴሬ «ኮዖም ሃስኖ ዬይዴ? ዎራ ዶዖቕዳክ ባልሽ ኣክሻ ዶንቕኬ ቶይላ ኣሥታ ቓስቴን ዬሌኬ» ጋይሶ ማዓስሴኬ።

ዶንቕ ታም ዶንቕ ታም ማዓሦ ዲዒሬዜን ኬ ዶዖቕቴምሽ ኤዔድኔን ኬ ኬዔስቴምሽ ዬሱስ ይንት ራቕክ ሙክዴድንቴን ኬዔዜ።

ኮዖዛንኬሬ ዬሱስ ዶንቕ ባልሽናምኬ ቶይላ ቓስቴንናምክ ቴዮ ርኬግር ሼጄ፤ እሥምንካኔሬ ሳዓባም ጎዖፕሼ።

ኮዖዛንኬሬ ዬሱስ ባልሽናምኬ ቶይሌናምክ ቱርሼ፤ ኤዔድንካኔሬ ኬ እምቴምሽ ይንት ራቕክ ሙክዴድንቴን እምሴ፤ ኬቴሬ ኤዔድንቴን እሥምናም እምንቲ ዬዜኬ፤ ዎላቔሴሬ ማቕክዬ! ኤዔድኔሬ ሙዳ እሦ ምሼኬ።

ኮዖት ቡዑር ክት ራቕክ ሙክዴድና ድንግማ እሥምናም ሱጼኬ፤ ናዓሬ ታሜኬ ቓስቴን ላይጼት ጾዖጺ ሃዓቔ፤ እሥምን ሙዳ ሃዓፔርሳቓክ ዶንቕ ባልሽንኬ ቓስቴን ቶይሌንግራንክ ሃዓቔ።