29. ኔጋኔ ዪን ጋዓራቓብ ፕክሽዳብንት ኣቴና

ሴጻ ዎላቕ ጴጥሮስ ዬሱሴን «ዬ ኤስስዳብስኖ እንዴፕስ ኢም ክ ባሥስንክ ሜዔም ካርኪ ኔጋኔ ኪን ጋይስቴ? ታብዛ ካርኮ?» ጋይሶ ጎይሴ፤ ዬሱስ «ታብዛ ካርክ ዳክዬ ታብዜናም ካሪ ታብዜክ ሃ ቤሥስንኮንምሺ» ኪን ጋይሴ፤ ዬሱስ ኮዖም ክ ጋዓድንክ ሙዳ ሴጽካን ኔጋኔ ጋይንቲ ዎዖም ዝክስዴ ጋይንትክቴ፤ ኮዖዛንኬሬ ዬሱስ ኣቴን ኮዖም ኬዔዜ።

ዬሱስ ኮይን ጋይሴ፤ «ሳዓብት ባዓምና ይንት ፕክሽዴድናም ጎይስካን ዝግዛቓብ ባዓብስናም ካምዴ፤ ክት ፕክሽዴድንግራንክ ዎላቕባብን ታማ ሺ ሜክልት ጋዓርዳኬይንቴት ባዛ ዜንክት ሃዓቔ።

ፕክሽዳብስን ባዜናም ካሽንቲ ኪን ማዓትክንካን ባዓብስን «ባዜናም ክ ካሽቴምሽ ኤዔሥን ኮባባምኬ ኤዔር ኤዔድንክታምክ ኬዔም ሼንኬቴ» ኪን ጋይሴ።

ክት ፕክሽዳብስን ባዓብስንት ብሬዜን ጉምፔርሴትዳቦ «ዋዓዴ ኢን እዝካዮ፤ እዜን ዶዖቕዳክ ባዜን ሙዳ ሃዓን ካካሼድቴ» ኪን ጋይሴ፤ ባዓብስን ይንት ፕክሽዳብንካን ኣቴርሴ ባዜናሜሬ ሙዳ ኔጋኔ ጋይንትክ ክ ካይቴምሽ ኪም ጋርሼ።

ዳይንኬሬ ፕክሽዳብስን ባዓብስንዳንክ ይ ዉታቕስምሽ ኣርፒ ኦይድት ባዜክት ካሻቕባብ ቤዔልሥስኬስ ፕክዴድንግራንክ ዎላቕባባም ሃዓፕቴ፤ ፕክሽዳብን ክት ቤዔልሥስ ማዓሣቓብናም ዬቶ <ባዜናም ኢን ካሽካ!»> ኪን ጋይሴ።

«ቤዔልሥስ ፕክሽዳብን ቦቕንቴክ ጉምፔርሶ <ዋዓዴ ኢን እዝካዮ እዜን ዶዖቕዳክ ባዜን ሃዓን ካካሽድቴ> ኪን ጋይሴ፤ ዳይንኬሬ ኖዖ ኮዖ ኦዖላይስ ፕክሽዳብስን ቤዔልሥስን ባዜይንት ዪን ክ ካሽቴንክ ዬካ ዻክሪ ኤይግር ኪም ዻክስሴ።»

«ኣቤድ ፕክሽዴድን ማዓሣቓክ ሬይናም ሼጄኮ ጋእሻ ኣቴርሴኬ፤ ባዓብስንዴሬ ካዬኮ ማዓሣቓክ ሬይናም ሙዳ ኪን ኬዔዜኬ።

«ባዓብስን ፕክሽዳብናም ኤዔልሶ <ሃዓና ዳቕልባብ ፕክሽዳብኖ! ሃ ኢም ምክስንካን ባዛሃንታም ሃዓን ጋርሽቴ፤ ሃዓኔሬ ኮይን ዬይንቲ ሃዓም ዝክስዳቔ> ኪን ጋይሴ፤ ባዓብስን ጋእሻ ጋዓምሴትዳቦ ባዜናም ሙዳ ካሽትዮ ክ ማቕሽቴንክ ዬካ ዳቕላይሳብ ፕክሽዳብስናም ዻክሪ ኤይግር ኪም ዻክስሴ።

ኮዖዛንክ ዬሱስ ኮይን ጋይሴ፤ «ዬግራንክ ኤዔድ ሙዳ እንዴፕሴን ኔጋኔ ክ ጋዓክንክ

ኮይኔሬ ርኬግራንባብ እባብ ኮይን ዬዜን ዬይዴ።»