28. ዎድምቴባብ ሼኬንስን

ሴጻ ዎላቕ ዎድምቴባብ ሼኬን ዎላቕባብ ዬሱስዳ ሃዓዶ «ላቕማይሳብ ኤስስብኖ ሌፒ ሴጽት ኡክናም እ ሃዓፕቴምሽ ሃሪ ዬእቴ፤ ጋይሶ ኪም ጎይሴ፤ ዬሱሴሬ «ሃራካና ላቕማይሳብ ኢም ሃ ጋዓዴ? ላቕማይሳብን ዎላቕ ዬሌክ ዶዖቕዴ፤ ዳይንኬሬ ሃዓና ሌፒ ሴጽት ኡክና ሃንት ዶዖቕቴምሽ ሃ ዝግዝንክ ሳዓብት ካርቴንካን ኤዔእካ» ኪን ጋይሴ።

«ካርታ ሃምንካኒ ኤዔእቴ» ጋይሶ ኪም ጎይሴ፤ ዬሱሴሬ ኮይን ጋይሶ ኪን ማዓስሴ፤ «ሃይ ዴይስካ፥ ሃይ ቤዔልምካ፥ ሃይ ዲብካ፥ ሃይ ታውካ፥ ሃባባምኬ ሃንዴታምክ ቦንችካ፥ ሃ ቤዔልሥስናሜሬ ሃንት ማቴምሽ ናሽካ።»

ዳይንኬሬ ሼኬንስን «ይንሥርምዜእስታንክ ዬዝቶ ኬዔና ካርቴናም ሙዳ ቦዖሥትቴ፤ ሌፒ ሴጽ ዶዖቕንትካን ኣቤስ ሃራ ዬእንቶክ ኢም ዝክስዴ?» ጋይሴ፤ ዬሱሴሬ ኪም ሼጄትዳቦ ኪም ናሼ።

ዬሱስ «ዶዖፔናምባብ ማዓትንትካን ሃ ዝግዝንክ ሃንት ዶዖቕዳክ ሬይ ሙዳም ሼንሻዮ ሶሊናም ቓምእንካን እምካ፤ ርኬግሬሬ ባዛሃንታም ሃዓፕዳዬ፤ ኮዖት ቡዑር እራ ሃዓዳዮ ራቕእስቴክ ሙካ» ኪን ጋይሶ ማዓስሴ።

ሼኬንስን ዬሱስ ዪን ኬዔዛኬታም ይ ኤሴርታኬንክ ጋእሻ ዎድምቴባብ ይ ሃዓቕንካን ይንት ዶዖቕዳክ ሙዳም እምንቲ ይ ዝክንካን ጋእሻ ኣቴርሴ፤ ኣዓፕይንታም ዬሱስዛንክ ማዓስትዮ ሽርቶ ካዬ።

ኮዖ ሴጽንክ ዬሱስ ይንት ራቕክ ሙክዴድኔን ኮይን ጋይሴ፤ «ዎድምቴድን ሳዓብት ባዓምንግር ኣርድንቲ ጋእሻ ካሌርስድንዴ! ዶዖፔኔ ዎድምቴድን ሳዓብት ባዓምንግር ኬ ኣርዳክ ኔግክ ግሜል እኬት ጹዑቕክ ዉትንቲ ኮዖን ሻሻዓዥዴ

ክት ራቕክ ሙክዴድና ዬሱስ ኬዔዛኬታም ይ ኤሴርታኬንክ ሪርቴኮ «ታ ኮዖክ ሃይዬ ዻቕዳብን?» ኪን ጋይሴኬ።

ዬሱስ ይንት ራቕንክ ሙክዴድንዳ ሼጄትዳቦ «ኮዖና ኤዔዳ ማዓታዬ ሳዓብዳ ዳይንክ ሙዳ ማማዓዴ» ጋይሴ።

ጴጥሮስ ዬሱሴን «ዎታ ሬይ ሙዴናም ጋርሾቶ ሃንት ራቕክ ሙክዶቴ፤ ባዛዎንት ሃራ ዳይኬ?» ኪን ጋይሴ።

ዬሱስ ኮይን ጋይሶ ኪን ማዓስሴ፤ «እ ጎዖካን ኤያይንታም፥ እንዴፕስኬሳም፥ እናንኬሳም፥ ባዓቤናም፥ እንዴናም፥ ዋይ ይንት ዶዖቕክ ቖልቴናም ጋርሻቓብ ሙዳ ማቶ ካርክ ቴቴይዴ ሌፒ ሴጽት ኡክናም ዻዻዓልዴ፤ ዳይንኬሬ ብሬዜናሜድን ቤድምና ቡዑር፥ ቡዑራሜድ ቤድምና ብሬዜናሜድ ማዓዴኬ።»