27.ላቕማይሳብ ሳምራ ኤዔሥንት ኣቴና

ሴጻ ዎላቕ ኣይሁድ ኤዔድንት ካርቴናም ኤስዳብ ዎላቕባብ ዬሱሳም ጴጽንትካን ክራ ሃዓዴ፤ «ዬ ኤስስዳብስኖ ሌፒ ሴጽት ኡክኔናም ሃዓፕንትካን ሃሪ ዎዖንስቴ?» ኪን ጋይሴ፤ ዬሱሴሬ «ሳዓብት ካርቴንግር ሃሮክ ክልኬርሳቔ?» ጋይሶ ኪን ማዓስሴ።

ኤዔሥኔሬ ሳዓብት ካርቴና «ባዓባ ሳዓብስሃንታም ዶዖፔናማ ቡዑዴግራንታንክ፥ ዶዖፔናማ ኡክንሳግራንታንክ፥ ጋእሻ ዛምሃንቴክ፥ ዶዖፔናማ ጶቕሽሃንቴኬሬ ኪም ናሽካ፤ ሃ ቤዔልሥስናሜሬ ሃማትምሽ ኪም ናሽካ» ጋዓዴ ኪን ጋይሴ፤ ዬሱሴሬ «ዶዖፔኔ ሃዓኔሬ ኮይን ዬይካ ኣዓፔኬሬ ዶዖቕዳዬ» ኪን ጋይሴ።

ዳይንኬሬ ካርቴን ኤስስዳብን ጪልባብ ማዓትንይንታም ዶዖፕስስካን ዝግዜ፤ ካንካን «እቤዔልሥስን ሃይዬ?» ጋይሶ ጎይሴ።

ዬሱሴሬ ኣታም ኬዔዝንትክ ኤዔሥንቴን ማዓስሴ፤ «ዬሩሳሌግራንክ ያርኮግር ሙክዳቓብ ዎላቕ ኣይሁድ ኤዔድ ሃዓቔ።

ዬሱሴሬ ኣታም ኬዔዝንትክ ኤዔሥንቴን ማዓስሴ፤ «ዬሩሳሌግራንክ ያርኮግር ሙክዳቓብ ዎላቕ ኣይሁድ ኤዔድ ሃዓቔ።

ኮዖት ቡዑር ሳዓና ኣይሁድ ኤዔድንግራንክ ዎላቕባብ ኤዔድናም ሳዓቢ ኪክን ቔዔሽምሽዳብ ጎዖግንክ ካይዳቔ፤ ኮዖና ኤዔሥን ቡዑድ እዝንትናም ኤንሥዳብስን ዜንክታንክ ቡርስዮ ዪም ጋሬርሻቓብ ኤዔሥናም ይ ሼጃኬንክ ጎዖግንት ፔጎክ ዳቕቶ ካዬ፣ ኬልሽንቲ ዪም ዝክስዳብ ኤዔሥናም ጋርሾ ጎዖግይንት ካዬ።

ኮዖት ቡዑር ቤድሚ ካፕክዳይክ ሌዊ ኤዔድ ዎላቕባብ ሃዓዴ፤ (ሌዊ ኤዔድና ጪሊ ኤዬንግር ኤዔድናም ሳዓቢ ኪክን ቔዔሽምሽዴድናም ኬልሽዴድ ኣይሁድንት ማታ ሱስን ሃዓቔኬ፤) ሌዊ ኤዔሥኔሬ ታዓሬ ጎዖግንት ፔጎክ ዳቕቲ ኤቦ ዪም ቡርስዮ ግኤርሳቓብ ኤዔሥንካን ጶቕሽክስ ጋርሽዮ ካዬ።

ጎዖግን ኮዖክ ካይዳቓብ ሳምራ ኤዔድ ሃዓቔ፤ (ሳምራ ኤዔድና ፔጫ ኣብዛሜድናም ቴያቔድ ኣይሁድ ኤዔድንት ካዓሤኬ፤ ሳምራ ኤዔድንኬ ኣይሁድ ኤዔድንክ ኪካም ይዝንዴድ ሃዓቔኬ፤) ዳይንኬሬ ሳምራ ኤዔሥን ግኤርቴባብ ኣይሁድ ኤዔሥናም ይ ሼጃኬንክ ክካን ጋእሻ ኣቴርሴ፤ ካንካን ኪም ስብትዮ ዻዓስንትክ ዲድንክታም ዻክሴ።

ኮዖት ቡዑር ሳምራ ኤዔሥና ኤዔሥናም ዻዓስትዮ ይንት ሃሬዜን ኪም ዶዖቕስቶ ሾዖቺ ጌሥዳኬትግር ቴዮ ኪም ራዓሥንትክ ጶይሴ።

ሼናክንኮቴክ ሳምራ ኤዔሥን ጎዖግይንት ካይንቲ ኪም ዝክሴ፤ ሾዖችን ጌሥዳኬት ኤዬንባብኔን ቶክሚ ሶሊ ኪን እምሴዳቦ «ኪም ጶይካ ኮዛንክ ኣብ ሶሊ ሃ ዉሥድንዳ ማዓሥንክ እ ማዓዳኬንክ ሃዓን ካካሽድቴ» ኪን ጋይሴ።

ኮዖት ቡዑር ዬሱስ ካርቴን ኤስስዳብኔን «ሃሮክ ሃዓን ጶቕዴ? ቡርስዮ ዪም ግኤርሳቓብን ኤዔሥንካን ቤዔልሥስክት ኤዔድን ማኬንንግራንክ ሃምንባብ ሃዓቔ?» ጋይሶ ኪም ጋይሴ፤ ኖዖሬ ክካን ኣቴርሳቓብኔ» ጋይሶ ኪን ማዓስሴ፤ ዬሱስ «ሃዓኔሬ ካያዮ ኮይን ዬይካ» ኪን ጋይሴ።