26. ዬሱስ ፕክሼይንታም ክ ዬዝምሽ

ዬሱስ ሴጣንት ጴጽምናም ክ ሺችሻኬት ቡዑር ማንፔስ ጪልንት ዛምክ ይ ዶዖቕዳቓክ ጌልላ ፔጭንግር ማዓቴ፤ ዬሱስ ራቕ ራቕግር ኡንጋሮ ኤስ ኤስስዳቔ፤ ኤዔድ ሙዳ ክት ላቕሚ ማዓትንትንጎክ ኬዔዝዳቔኬ።

ዬሱስ ይንሤርምይንቴክ ይ ዶዖቕዳቓክ ናዝሬት ካትሜንግር ማዓቴ፤ ሃዉሽ ሴጽንክ ምክስ ኤይንግር ካዬ፤ ክ ጎስቴምሽ ማዓትካን ዬይዳኬታም ኬዔዝዳብን እሳስት ቑርታ ክልክሜናም ኪን እምሴኬ፤ ዬሱስ ቑርታ ክልክሜናም ፕእስት ባግኮታም ኤዔድኔን ጎስሤ።

ዬሱሴሬ «ቓምእንካን ዻቕሺ ኡፕስናም፥ ዎእሽትዮ ዪም ቴይራቔድኔን ባዛ ካይሳ ዉትንታም፥ ኣዓፕንት ሼዳዬድኔን ኣዓፕንኬት ሼድቴምሽ፥ ዻኬርታ ኤዔድኔን ቡልምንትናም እ ሳንቴምሽ ሳዓቢ ማንፔስይንታም ኢን እምቴ፤ ኮና ዪም ናሼርዳክ ባዓቤት ቦንኔ» ጋይሶ ጎስትሤ።

ኮዖዛንኬሬ ዬሱስ ዶዖቕሴ፤ ሙዴኔሬ ኡሣ ክራ ሼጄኮ ታ ክ ጎስትሣዓክ ሳዓብት ኡፕስና ሳዓቢ ዪም ሳይሳቓብንጎክ ኬዔዝዴ፤ ዬሱስ ኮዖ እ ጎስትሣቓክ ኡፕስና ታ ቦዖድምሴ» ጋይሴ፤ ኤዔድና ሙዳ ሪርቴኬ «ኮና ዬሶፕት እንስ ዳኮ?» ጋይሴኬ።

ኮዖዛንክ ዬሱስ «ማዓትካን ዬይዳኬታም ኬዔዝዳብ ይንት ፔጬግር ክ ቦንችማያክ ዶዖፔኔ፤ ማዓትካን ዬይዳኬታም ኬዔዝዳብን ኤላስ ቦንንክ እስራኤል ፔጭንግር ቤድሚ ማዓና ቡና ሃዓቔኬ፤ ዳይንኬሬ ቦን ማኬንኬ ባግክ ዶዖቢ ቓንክስ ጋርሻኬንክ ሳዓቢ ኤላሳም ፔጫ ኣብግሮንምሺ እስራኤልግር ዶዖቕዳክ ማዓና ቡኔንዳ ኪም ኬ ኬልሽቴምሽ ኦይታቕዬ።

ዬሱስ ይ ኬዔዝዳኬታም ማቕሽክሶ «ማዓትካን ዬይዳኬታም ኬዔዝዳብን ኤልሳእ ቦንንኬሬ እስራኤል ፔጭግር እሣ ሃዥም ዪም ዬዛቔድ ቤድሚ ኤዔድን ሃዓቔኬ፤ ዳይንኬሬ ኤልሳእ ዎላቓባባሜሬ ሃልሽሻቕዬ፤ እስራኤል ኤዔድናም ይዥዴድንት ዳዓሚ ዶብዴድናም ኤንሥዳብን ንእማንት እሣ ሃዥምናም ዬሌክ ሃልሽሻቔ፤ ዬሱስዳ ኤስርዜን ሃዓቔድን ኤዔድና ኣይሁድ ኤዔድ ሃዓቔኬ፤ ካንካን ኮዖም ክ ኬዔዝድክ ኬ ኤሴርሳኬንክ ክዜን ምዼርሴኬ።

ናዝሬትግራሜድ ኤዔድና ዬሱሳም ምክስ ራቕዛንክ ጎችቴኮ ኪም ዣቕሽዮ ዴይስካን ባሌት ማቴዜን ዣእሼኬ፤ ዳይንኬሬ ዬሱስ ኤዔድንት ሞልትግርክ ሙክሶ ናዝሬት ካትሜንግር ካዬ።

ኮዖዛንኬሬ ዬሱስ ጋልላ ፔጭንግር ኡንጋሮ ቤድሚ ኤዔድኔሬ ክራ ሃዓዴኬ፤ ሼድንቲ፥ ሙክክንቲ፥ ኤስርንቲ፥ ኬዔዝንቲ ዪን ማዓታዬድ ኤዔድናም ኣልክምሴሬ ቤድሚ ሃዤርታ ኤዔድናምኬ ዜኔይንት ዎብዛቔድናምክ ክራ ታዓዴኬ።

ዥኒ ዪም ዬዛቔድ ኤዔድናም ክራ ታዓዴኬ፤ ዬሱስት ኬዔዜክ ዥንና ኤዔድንዛንክ ዉታቕሴኬ ቤድሚ ካርክ «ሃዓና ሳዓብት ይንሥስናዬ!» ጋይሶ ኡዑግምሴኬ፤ ኤዔድና ሪርቴኮ ሳዓባም ጎዖፕሼኬ።

ኮዖዛንኬሬ ዬሱስ ክት ራቕክ ሙክዴድን ኬዔም ጋዓርዴድ ታሜኬ ቓስቴን ኤዔድናም እድዜ።