25. ሴጣን ዬሱሳም ጴጽምሽ

ዬሱስ ክ ሽኤርሻኬት ቡዑር ሳዓና ማንፔስ ጪሊ ኪም ፔጫ ዎቼንግር ኤንሤ፤ ኮዖግሬሬ ኦይዲ ታም ሮዖርኬ ኦይዲ ታም ሶይትክ እሥክስ ዶዖቕሴ፤ ኮዖዛንኬሬ ሴጣን ዬሱስዳ ሃዓድዮ ዳቔልሲ ክ ዎዖንቴምሽ ዬሱሳም ጴጼ።

«ሳዓብት ይንሢ ሃ ማዓሥንክ እሥካን ሃዓን ማዓቴምሽ ኬዔና ሴይንናም ባልሺ ማዓስሳዮ ኦዖካ» ጋይንትክ ሴጣን ዬሱሳም ጴጼ።

ዬሱሴሬ «ኤዔድ ባልሺ እሦ ዬሌክ ኣዓፔክ ዶዖቓዬ፤ ዳይንኬሬ ሳዓቢ ኬዔዝዳክ ኡፕስን ካንኮንምሺ ጋይስዮ ክልኬርቴ!» ጋይሴ።

ኮዖዛንክ ሴጣን ዬሱሳም ጪሊ ኤዬንት ዱዑርዜን ኤፕሴትዳቦ «ሳዓብት ይንሥ ሃ ማዓሥንክ ማታሃንታም ሾሽ ጹላ ዣቕካ ሃራካኔ ጋዓርስንክ <ሴይኒ ዱዑታንታም ግኣይምሽ ሃዓም ኬ ክልሽቴምሽ ሳዓቢ ርኬግራንክ ዎዖንይንትካን ይ ኦይዴድኔን ኬኬዔዝዴ» ኪን ጋይሴ።

ዳይንኬሬ ዬሱስ ሳዓብት ኡፕስግራንክ ኬዔዝንትክ ሴጣናም ማዓስሴ፤ «ሳዓብት ኡፕስግር <ባዓባ ሳዓብስሃንታም ሃይ ጴጽካ> ጋይሶ ኤዔድኔን ኬዔዝዴ» ጋይሴ።

ኮዖዛንክ ሴጣን ፔጬንት ባዓብናምኬ ቦንችምንኬታምክ ሙዳ ኪን ይ ዻዉስንክ «ጉምፔርሳዮ ኢም ሃ ምክስድንክ ኮዖም ሙዳ ሃዓን እምምድቴ» ኪን ጋይሴ።

ዬሱስ «ካይካ ሃዓና ሴጣኖ! ሳዓብት ኡፕስክ ኤዔድኔን <ባዓቤስሃንት ሳዓብካን ዬሌክ ጉምፔርካ ኪም ዬሌክ ምክስካ> ጋይሶ ኬዔዜርቴ» ኪን ጋይሴ።

ዬሱስ ሴጣንት ጴጽንክ ሺችራቕዬ፤ ካንካን ሴጣን ሴጼካን ኪም ጋርሼ፤ ኮዖት ቡዑር ሳዓቢ ርኬግራንክ ዎዖንይንትካን ክ ኦይዴድን ሃዓድዮ ኪን ፕክሼኬ